我哋離開墓園時已經越來越大雨啦，正係度考慮一下之後o既行程，之前plan呢個清明拜山之旅時，打算除咗正事之外，想去長隆同埋去百萬葵園，我對於去百萬葵園都非常期待，因為聽講啲花花開得好靚，好似呢個時間仲有櫻花添，但好似話啲交通都好唔方便，要去就要又更多時間至ok，好啦，退而求其次，媽咪提議話重遊蓮花山，我雖然不太興致勃勃，但都接受啦，但而家大雨到咁，唔知仲去唔去得成…

搵個地方食飯先啦，可能食完嘢細雨少少去邊度都得啦~不過原來係石崗附近都唔係太多食肆，我哋都行咗唔少路(可能因為大雨，所以覺得行咗好耐…)先搵到呢間企理少少o既菜館~

呢間湖南大碗菜館總算光猛啲，睇落乾淨企理少少~

其實大家都唔太餓，所以叫得清少少，青菜多啲﹗個煨魚好多骨丫，而且湯汁好辣，食起嚟戰戰兢兢咁~蘿蔔鰂魚湯同印象仲唔係好多，好似係煮魚多過係湯~最好味係炒土豆絲，呢個係家姐o既favourite去親大陸都好想食下，因為自己整工夫好多，而且又好難有咁好o既刀工切到咁細，正~

食飽飽仲係咁大雨，我哋商量之後，見都一場嚟到，唔濕都咁濕咯，不如照去蓮花山啦﹗於是我哋上咗架勁逼勁逼o既巴士進發﹗係巴士上逼到「唔係咁樣，可以點樣呀」o既程度，我哋分散下注意力o既方法就係玩玩久違了o既接詞語o既接龍，有趣得嚟又好懷舊呢~細個時搭長途車就係咁樣過o架啦~

點解我哋講蓮花山講得咁自然？因為蓮花山係我哋都熟悉o既景點，而最為我哋家中o既人津津樂道o既就係，我好細個時曾經係嗰度o既竹林度施過肥(冇錯，就係今時今日熱爆討論o既周街疴o既事情，我細個時係做過的，不過唔係係城市o既垃圾筒上面，而係同大自然渾為一體嗰種…:p)~帶人去番禺？去蓮花山玩囉~好似係好自然o既一件事咁~

我印象中o既蓮花山就係係啲大石頭上面提下字之類，爹媽早兩三年再嚟過，佢哋話而家變咗好多，靚咗好多，都好值得再睇~大家可以入下蓮花山個網站：

http://www.pylianhuashan.com/index.html

原來蓮花山係國家4A級景區呢，咁應該都真係唔錯，印象中上一次去過o既4A級景區應該係海南島三亞o既大小洞天，嗰次印象都唔錯~(請參閱：22-9-2009：三亞 day 2．大小洞天)

但去到都係太大大大大大雨，一出去就會全身濕晒，恐怕入到場都唔能夠好好觀賞or影下相吧~大家決議，好啦，無辦法，出番去市橋啦，逛逛商場乜都好啦~有架白牌車向我哋招手，難得可以一次過載晒我哋六個人，都唔錯~記得尋日行去地鐵站時經過市橋站附近有個商場都幾大幾靚，我哋就叫司機係嗰度放低我哋~

商場叫鑽匯珠寶商場，入面都行得幾舒服o既，但硬係冇令人想消費o既感覺~我哋唯一幫襯咗o既就係呢杯芒果牛奶，事關有得小杯試飲，哇，真材實料，而且好平bor~兩人share一杯，正~

離開商場先進入今日下晝o既高潮，冇去到蓮花山又冇咩目的地好似好空虛咁，直至之後先有番啲意義，原來鑽匯商場對面有安踏o既outlet，本身要冒住大雨過馬路我都有少少猶豫，既然呢邊個商場都行完，去下都無妨啦~原來個outlet真係超級抵﹗﹗﹗我都唔記得咗個promotion係買幾多錢平幾多錢lu，總之我哋人人有收獲，人人都買得好盡興啦，我同day買咗兩件tee一件外套，最抵係我買咗對網網運動鞋，即是可以攀山涉水嗰啲，記得之前去日本長瀞激流時(請參閱：17-5-2010：東京埼玉trip day 3(part 1)．長瀞激流)，間公司借過類似o既俾我著，好輕可以著住落水游，又快乾，呢對都好舒服，我買到番嚟當casual wear著又得，做運動著又得，最重要係跳樓價只係RMB80一對﹗﹗﹗

我哋後尾返過去番禺賓館附近逛街，諗住到時間咁上下就食飯跟住搭一早買好票o既直通巴士番香港~行咗步行街，入到去裡面有個百貨公司，我哋本來話去行下超市，入超市前發現最頂樓有打機o既地方，上去睇睇啦~

哇，好多唔同款式o既遊戲，而且勁平丫﹗每局都係RMB3左右﹗連打鼓機、跳舞機、頭文字D嗰啲都係，實在大幸福了…可以盡情咁玩~我哋唱咗RMB30之嘛，已經可以玩咗好耐~

好高興呀~

係香港而家要唔要十幾蚊一局？

我哋玩晒嗰啲幣已經夠時間食飯啦~家姐介紹食康師傅私房牛肉麵，佢之前係第二度食過，印象好好~

雖然係簡餐形式，但呢餐其實係我哋咁多餐之中最貴o既一餐嚟o架，但實在物有所值，我覺得嚟香港開都會有市場﹗我食o既係金牌o既牛肉麵，麵質彈牙有嚼勁，牛肉湯底濃味得嚟唔會膩，牛肉份量好足，而且煮得好腍，正﹗呢種味道好溫和，係可以成日幫襯嗰種~近年唔知係咪腸胃差咗啲，食親啲肥膩嘢就會拉肚子，其中o既表表者就係日式拉麵，啲甚麼牛骨湯底豬骨湯底個身體已經唔係好接受，味噌湯底醬油湯底都仲接受到，但就冇咁好食啦~如果香港有得賣呢啲牛肉麵就好lu~配菜品質都好好~非常令人滿意o既一餐﹗

夠鐘搭車返香港囉~

番禺清明遊完滿結束

前往其他中國旅遊blog

Comments

comments