離開野生動物園，我哋移動至馬戲大劇院，但離場時人太多，搭shuttle可能要等幾班車，我哋決定行路啦﹗其實行咗大半日腳板底已經痛痛地，事關今次著咗新布鞋仔嚟，舒服就舒服，好似冇著咁，但承托唔夠好，所以就好似赤腳行咗好多路咁累，唉，都唔係第一次係咁，次次話去旅行要著air底波鞋，結果成日都貪襯衫…>_<“

到咗lu~好大o既帳幕呀~不過我哋要開餐先~

開頭唔知道馬戲劇院嗰邊都有好少少o既餐廳，所以我哋幫襯咗呢間up up dup dup o既小食亭…

食物就又貴又唔吸引o架喇，但起碼食飽咗先睇馬戲都好啲o既~

好在容易搵位，我同day share咗個餃子同埋牛腩麵，day話我朝早個胃咁唔妥，唔俾我食咁多喎~ 🙂

好，入場lu入場lu~不設劃位，所以早到早揀到靚位坐﹗點解中間最正o既冇人坐？因為係VIP席，額外再加錢就可以坐入去﹗我哋到時感覺都唔算太側，當然唔會每人俾多唔知幾十定百幾蚊坐中間啦~

未開場前，兩旁同埋中間o既screen都loop住播放演員介紹，原來好多都嚟自烏克蘭、俄羅斯呢啲東歐國家，當然，美國、非洲都有少少，亞洲人就真係比較少了~仲會介紹埋佢哋表演o既項目，最喜歡or最討厭o既東東咁~

開場先係熱熱鬧鬧o既巡遊﹗其實到中段要過場時都有呢啲色彩繽紛o既巡遊，咁就keep住唔會有冷場啦~

夢幻o既氣勢開始~

呢個位係咪唔知我影乜呢？頭先咪一個個小丑公仔係天花吊落嚟o既，一轉身就變成小丑退上去，吊落嚟o既係真彈彈人﹗﹗﹗忍唔住嘩咗出嚟~

當然唔少得華麗o既群舞~

馬戲一定有馬啦﹗後來發現，今時今日o既馬戲入面，馬、大象、馬騮已經唔係唯一可以參演o既動物﹗即使係睇落嚟蠢蠢地，腦部佔全身好細部位，可愛or唔可愛o既動物都可以參加馬戲團﹗﹗

非常精彩又驚險o既馬術﹗﹗睇到啲演員藝高人膽大，係馬上面、下面、左面、右面跳嚟跳去、翻來翻去，見到都緊張，我呢個時候又諗起「射雕英雄傳」入面，郭靖都識呢啲馬術，而「步步驚心」入面，馬爾泰若蘭o既馬上技術亦都係一等一﹗所以，唔係筆下至有呢啲英雄人物，係現代、係眼前一樣都有﹗

又緊張轉番做浪漫tone，一個個o既透明泡泡唔係淨係裝飾用o架，而係放咗真人係入面跳舞﹗﹗好靚丫~

馬戲當然有空中飛人啦，發覺空中飛人o既跳法、配搭都與時並進，花樣上都同幾年前睇過o既唔係好同了﹗媽咪話最欣賞o既係而家更著重演員o既安全措施，唔係以玩命作招徠~

令我驚訝o既，唔單單係演員o既高技術、超美超華麗o既場景…仲有…佢哋﹗﹗哈，原來河馬、羊咩咩、鴨子都可以參演﹗佢哋有咩show off？冇o架，show可愛囉，仲有乖乖咁列隊出場走一圈~

仲有豬豬都係同等功用~cute~

熊都一樣？nonono~佢哋超勁﹗熊同埋大象係我高度懷疑有人著住件熊衫係度扮熊，因為實在太靈活太叻了﹗佢哋可以推車仔、駕電單車、跳舞(我唔記得跳gangnam style係熊定係大象了，邊樣都係咁勁啦~)…

大象都好叻叻~

大象跳break dance，用一隻腳撐起全身，係咪有啲匪夷所思呢？太過份了﹗﹗

間場的美女parade~重點係…美女後面﹗﹗第一次見紅鶴可以參與馬戲團演出丫~佢哋又遊行﹗

點解呢啲演員啲costume咁特別o既？因為要襯番佢哋o既partner—-鱷魚嘛~所以我話囉，唔可愛o既動物又冇乜絕技都可以演出o架~

輕鬆過後又要緊張一下，睇呢個鐵球內o既電單車亡命演出，令我深深感受到馬戲團真係唔係人人可以做﹗話我份工辛苦嘛，佢哋真係仲辛苦，唔係train咗就做得，你at the very beginning你真係要有嗰種膽量入行先囉~睇一架架電單車加上去，真係要屏住呼吸同佢哋一齊肉緊，好在，有驚無險~great~

100%美的飛飛人+佈景~

又一驚險之作，毫無安全裝備o既特技人，係高速運轉o既輪上面做各種事情，最得人驚係要跳花式跳繩丫﹗

緊張過後又俾你輕鬆一下，其實跳水項目都可以做到係緊張type，但呢個show入面，跳水同跳彈床結合，走搞笑滑稽路線，個個水手都急急忙忙咁衝上去，跳/跌落嚟~

到finale了~day話唔係好明點解要發飛人大砲，可能係想製造完場前o既高潮吧？不過確實唔係特別亮眼…

反而個水幕大謝幕就更有氣勢吧~

我覺得個大馬戲超好睇呀~10個推介~~如果大家未去過就去下啦~家姐話聽到附近有觀眾將大馬戲同水舞間去比，我覺得冇得咁比喎~水舞間有故事有主題，著重放係「美」上面，而大馬戲就比較多元化，合家歡啲啦~除咗水舞間之外，我近年都有睇過唔同o既特技show，大家有興趣可以睇睇我個blog比較下：

2-2-2011：USA trip day 1．抵步Las Vegas + “O” show by Cirque du Soleil

6-3-2011：澳門戒指團第二部day 2．璀璨澳門+水舞間

應該我仲去咗海泉灣睇過一個show o架，想搵出嚟先發覺原來嗰個trip我竟然冇打到blog乎？

散場後我哋搭番shuttle出去地鐵站~好在地鐵都好快有車~肚子餓了，食個糖水啦~

本來我哋話好想食下雙皮奶呀、薑撞奶嗰啲，但又唔係好熟路，可遇不可求~市橋站出嚟見到呢間「五代同糖」，哈，入到去至知原來係香港糖水鋪嚟到番禺開分店喎~咁呀，價錢的確係香港價錢…一個糖水都要廿幾至三十幾蚊人仔，都幾貴，但客人都好多bor~我叫咗個桂花燉雪梨，好甜美o既桂花香丫，正~

好lu，夜lu，我哋番去龍泉大酒店休息啦~睇佢肉肉酸酸咁，估唔到沖涼都唔錯，水夠熱、水壓夠，正~

待續

前往其他中國旅遊blog

Comments

comments