DAY 4 @ OKINAWA
最後一日行程lu~但因為超晚機返,所以仲有成日可以去玩﹗今日去玉泉洞、琉球王國、蛇博物館,其實都係同一個area o黎o架~為o左爭取多D時間玩,我o地都係好早出門口了﹗
日本街頭有好多自動販賣機,終於見到有得賣「海洋深層水」了﹗都係沖繩o既特產o黎o架,同埋呢個東東係「將太的壽司」有提過,我同家姐都好想試下,見有得賣梗係試下啦,不過嘛…味道其實同普通蒸餾水冇乜分別﹗
先搭單軌火車去那霸公車總站,再轉巴士去,哇,搭超耐﹗太多站要停了,搭o左成個鐘呀~又再一次證明沖繩o既公共交通非常inefficient﹗
去到lu去到lu~趁爸媽去買門券時我o地影下樣先~
玉泉洞
其實都係同一個area,買一張門券通行,不過佢有條suggest o既路線,即管跟住行啦,第一站去玉泉洞~
其實係天然鐘乳石o既山洞,以為入去睇一睇就冇,哇,原來全程要行25分鐘﹗好抵睇﹗入面濕濕暗暗的,俾著我細個時一定好驚﹗呢D大自然o既景物真係叫人歎為觀止,入面好宏偉﹗原來有別於其他o既鐘乳石洞,玉泉洞D鐘乳石生長得好快o架,你係入面可以感受到個洞o既活力﹗
係入面真係好難影到D靚靚o既相呢,要揀一兩張放係度都好困難…另外,玉泉洞入面有超清徹o既流水,入面仲有魚游o黎游去添﹗
琉球王國
其實有好多景點o架,首先行o左熱帶植物園~
唔講你唔知,呢D係vanilla樹o黎o架~佢放o左少少枝葉出o黎俾我o地聞,真係成陣雪糕味﹗好有趣~
你仔細D望就知道我影o既樹係咩了,冇錯﹗係火龍果﹗從來都冇想像過火龍果係咁o既樣呢~原來生係好似仙人掌咁o既樹上面﹗熟o左就變紅色啦~
之後行玻璃工房~
工房o既相就唔show出o黎啦,day 3都有見過了,但要俾大家睇一睇呢個百合工藝品,哇,太厲害了﹗竟然可以做得咁精細,而且顏色o既運用更加出神入化﹗呢個係非賣品o黎o架~
行緊去其他景點時忽然有隻螳螂爬上去家姐把遮上面,嚇到我o地呱呱叫﹗
呢張咪新o既profile pic o羅,我係度試玩沖繩地道o既「三線琴」,雖然原理同結他差不多,但因為唔熟悉三線琴樂曲o既調子,所以都模仿唔到呢~
入去睇呢個展館,講o左沖繩D獅子o既來歷,原來所有東方o既獅子呀、麒麟呀都係由中東地區傳過o黎o架~
除o左之前睇o左o既玻璃工房之外,仲有好多其他工房,好似呢度就講沖繩出名o既黑糖了,講下甘蔗有咩用途~
此外,仲有關於織布、染布、陶藝、音樂…唔同題材o既工房o羅~
蛇博物館
參觀o左一部份o既展館之後就要先去睇表演﹗
第一個環節係可以俾現場觀眾上台同大蛇影相﹗D小朋友個個都又怕又要影呢,淨係睇佢o地都夠開心了﹗
旅遊書話有貓鼬同蛇o既比賽,我o地幾驚係血腥o既打鬥比賽呀,好在,原來係鬥快游水﹗咁主持人問我o地覺得佢o地邊個會贏丫嘛,我估蛇o架,話晒呢度係佢做主角丫嘛,點知,蛇係大懶蛇﹗放佢出去跑道時佢郁都唔郁﹗太可惡了﹗
繼續睇蛇~難得可以捕捉蛇o既大特寫,你覺得佢靚定係核突呢?呵呵~
琉球歌舞表演
今日o既其中一個重頭戲呢~o黎到琉球王國點可以唔睇佢o地o既民族特色表演呀~
表演未正式開始前,主持人邀請D小朋友上台學用D琉球樂器,有呢D好細個o既小朋友,佢o地開心就開心喇,不過,傻呼呼﹗唔知道要點玩D樂器﹗anyway觀眾都睇得好開心o既~
超有震憾力o既演出呀﹗表演者都好落力,好有氣勢,好有魄力﹗實在太精彩了﹗半個鐘o既演出絕無欺場﹗其實跳呢D琉球鼓舞真係要消耗好多體力,佢o地日日跳幾場,係擺靜止post時都不由得喘氣,但音樂一再起時又充滿活力了﹗好good呀,好good呀~去到沖繩必睇項目﹗(睇呢個表演時係度諗,呀,可以係香港搞D「琉球舞瘦身」o既生意喎,呵呵,必瘦呀﹗不如我下年考完final之後o既ssm就o黎學琉球舞啦~)
仲有舞獅呀,一樣咁精彩﹗頑皮o既獅子走上觀眾席開口咬D觀眾,其中一個中招o既係我爸﹗
睇完都要趕番出市區lu~因為夜晚要搭飛機番香港咯~
偷偷影巴士司機﹗佢好好人o架~我o地去程回程都係坐佢o既車﹗
番酒店拎番D行李就要出發去機場lu,都冇時間食埋晚飯先去添,唯有去到機場先搵o野食吧~原來我o地酒店附近有一間俾普通人買餸o既supermarket,D o野真係超級抵呀,我o地之前好多o野都買貴o左了…
係機場買到便當o黎食﹗太高興啦~幾多款餸~點解香港唔興食靚靚便當o架~
順利抵達香港﹗yeah~
你在日本也留言比我…好開心呀!
Re小姑娘: 哎吔吔~有一點點美麗的誤會添~其實…umum…o個D留言係我番o黎先寫o架~當然我係日本時都有掛住我個blog blog同埋各位親愛o既blog友啦~
乜野係海洋深層水 d水起好深好深既海度抽上黎架?? 你未講佢同普通既蒸餾水冇乜分別前, 我以為會咸咸地添 因為海水係咸架嘛~~ 估唔到0個d未熟既火龍果係咁既樣架喎, 似d唔靚既花多過似食得既生果
Re uHnsUi: 我都唔係好知其實係點樣整出o黎o架喎~我都以為會係鹹的~ 係呀,我都未見過呢~難得可以見到﹗(已經可以令我大驚小怪了,哈哈~)
日本真係好興出啲各式各樣嘅水,總之就係一個共通點︰「對身體有益」不過通常飲嘅時候都分唔到有咩特別 個玻璃花花真係好靚,日本人真係好手工! 隻螳螂鑋好大隻呢!
Re墨西: 哈,反正飲多D水就係有益~ 所以特別影俾大家睇~ 隻螳螂嚇到我o地嘩嘩叫﹗
可能用來整壽司才分辨得到… 你做咩在鐘乳洞影相影到呆呆的!!~?! 我對那三線琴很有興趣~ 那蛇可能游得太多,覺得不好玩了!
Re day: 不是吧?應該係「係岩崎翁先分到」~ 可能因為入面黑麻麻,有少少不安吧? 要彈到o岩o既音唔難,但要識得佢o地o既傳統樂曲先可以彈得出風味呢~ 可能是吧~
那場鼓舞,我們坐在前排,表演者雖說年輕人居多,但不論年紀,都很起勁,都很賣力,都很投入。他們天天都這樣表演,客人送往迎來,沒法建立起甚麼關係或感情,到底那位幕後團長,是怎樣維持全團員工這股勁呢?很值得每個行業的人深思。
[版主回覆10/21/2008 23:55:00]replied
Re爹爹:
o個場鼓舞show真係好精彩﹗最主要係氣氛好、夠熱鬧﹗個個演出者都好投入~所以觀眾都睇得好投入﹗真係好難得呢~會唔會係民族性o既問題?日本人做咩都全力以赴?
請問「將太的壽司」是甚麽東西?以上鼓表演,是不是「鬼太鼓座」的一部份?
[版主回覆01/11/2010 00:09:00]replied
Re littleZAKU: 「將太的壽司」係一套好耐歷史o既漫畫書﹗係同「妙手小廚師」(味吉陽一呀、味皇嗰套)同一個作者o架~講o既係一個壽司少年奮鬥o既勵志故事,我同我家姐都勁鍾意睇,係入面學到好多日本傳統文化,又知道多咗好多關於壽司o既東東﹗如果鍾意日本文化、美食o既人就極力推介~ 我唔知「鬼太鼓座」係咩喎~
我攪錯了,你們看的應是傳統的沖繩太鼓表演。而我所說的「鬼太鼓座」,是似樂團般的,有打下面o甘大個鼓,也是HiFi發燒友愛聽及用來試機。
另外,你猜中了,因我太肥,太太和女兒坐另一隻船仔。
[版主回覆01/11/2010 22:48:00]replied
Re littleZAKU: 咦,我都未聽過「鬼太鼓座」添~