二零二四年一月二十一日(星期日)
報咗名參加人生第一個10K茶記為食跑無幾耐，都未跑就到咗渣打馬拉松報名，渣打馬拉松係香港知名度最高的長跑比賽，而且賽道係因為駕車已經無數次而非常熟悉的東區走廊，唔知自己跑唔跑得掂都同阿妹走去報名。
渣打馬拉松仲有一樣好出名的就是好難報名要抽簽，我同阿妹都好好彩第一年就抽中咗，仲安排係同一組，可以約埋一齊起跑有個照應。
作為屯門友，朝早4:45AM就起身，吃埋屋企最後兩件係澳洲買的朱古力曲奇做早餐。
5:15AM就出門口，好彩天氣唔凍，可以比較輕裝出發。
5:27AM係兆康站上車，架車九成都係跑手，好搞笑。
恆仔特登搵返個屯門背囊俾我揹，細細個好方便，可以將大會寄存專用的膠袋放在小背囊，寄存時可以將背囊和外套放返落膠袋去寄存，PERFECT﹗
由紅磡站轉車，再到金鐘站轉車，越來越多人，不過都係向同一個地方進發，跟住大隊行就無錯。
銅鑼灣站一出閘就見到指示
阿妹比我早到，佢已經寄存好行李，原來寄存的行李唔可以有液體包括水，結果係屋企帶咗樽水出嚟都要倒咗佢。
完美咁放晒所有行李落去大會指定行李袋
10公里起跑區係東區走廊近中環及灣仔繞道(城市花園對出)，所以由維園行過去都要一段路。
10公里賽道圖
大家跟隨指示步行去起跑區
為了今次馬拉松周圍都封路，唔單止要封賽道，連前往賽道的通道都要封，真係好大規模。
沿住興發街向住東區走廊前進
見到周圍都係人已經開始覺得興奮
我和妹妹約好在銅鑼灣消防局，我們終於碰面了。
終於來到維園道的起跑區檢查站，在這兒會檢查號碼布，另外有袋的行左邊要檢查，沒有袋的行右邊可以直接通行，我件衫入面都收埋咗個腰包仔喎~原來咁細個啲唔計。
我們是10km第6組，7:40AM才起跑，7:00AM就來到起跑區了。
今天是很適合跑步的天氣
一路上的廁所都大排長龍，妹妹聽到有人話起跑區會無咁多人，於是我們來到起跑區才上廁所，結果不單止也要大排長龍，廁所還要極度污槽，不過已經無得揀了。
因我都係見過大場面的人，小時候去旅行都遇到不少惡劣的廁所，不過我想講本來人生遇過最惡劣的廁所一直是小時候跟爺爺返鄉下時番禺石崗餐廳旱廁，只有一條深坑，前人留下的糞便可以睇得一清二楚，仲要有好多蟲仔係上面爬下爬下……雖然今次依個廁所無蟲仔，但係個廁盆已經滿到瀉咁滯，距離非常近，已經成功榮升我去過最惡劣的廁所第一名。
去咗廁所就可以飲返啖水先出發
真係好難得有機會企係東區走廊上面同維港景色SELFIE
10KM第5組係7:20AM開跑，截止起跑時間係7:30AM，差不多夠鐘時就有工作人員不停大叫仲有無第5組未出發，有人舉手其他未開跑的人就會即刻讓條路出來。當時我發現站在我旁邊有一位女士是第5組的，但完全無任何反應，於是我提醒她要出發她才突然醒覺自己原來已經可以起跑。
到我地出發喇~今次跑10K心情好輕鬆，因為已確認過是自己能力範圍做得到的事。不過開跑前輕輕拉筋時突然覺得右邊腳跟痛，好彩跑起咗都無乜影響。
7:42am都未過起跑線，不過就算過咗起跑線，頭1km都係持續出現塞人的狀態。
同平日練習的路線相比，東區走廊的高低起伏相對較多。
長跑真係一項既熱鬧又孤獨的運動，身邊咁大班人一齊跑，但要完成都只能夠靠自己，而且身邊的人有人會超前，有人會墮後，一直陪著我跑的只有星野源的音樂。
好大個渣馬廣告牌
依架就係傳說中接載跑得太慢的跑手的巴士
著住依件COSTUME跑10KM真心RESPECT
超人特攻隊
跟上次茶記為食跑一樣，今次賽道都係有兩個水站，大約在4KM和8KM的位置，雖然今次無咁熱唔一定要飲水，不過兩次我都有停低飲，因為水真係非常好的BOOSTER。跟上次不一樣的是今次沿路有大量的FIRST AID COUNTER，每個FIRST AID COUNTER都有跑手需要協助；無諗過會有咁多人受傷或抽筋；不過更不可思議的是沿路有好多臨時廁所，而每個廁所都有人排隊，仲要起碼三四個人……
順利完成賽事
拎獎牌、水、香蕉同埋紀念品，特別要鳴謝義工姨姨係一箱青BB的香蕉入面揀咗隻黃色的俾我。
依個係我自己手錶TIME的時間，點解跑咗10.16km?我估係因為頭1km不停左穿右插，跑多咗啲冤枉路囉。
所以今次步速控制得好好，雖然Pace比茶記為食跑只係進步咗6秒（上次Pace 6:46)，但分段Pace全部保持低過7分鐘，還有餘力去用星野源的音樂節奏控制上斜時的步速，同埋無再問自己做乜攞苦嚟辛，我覺得都算係今次的成就。
即刻已經可以睇到非官方時間，仲可以睇埋名次，不過佢係由起跑槍聲開始計時，真實時間起碼要減2分鐘。
我地都順利完成了﹗
行到出嚟行李區先有足夠空位影獎牌相。
影完相拎埋行李之後，我仲同妹妹去咗中環食返個大早餐先返屋企。
——————————————————————————————————————-
後記一：
今年妹妹幫手取選手包，原來取選手包當日有嘉年華會，如果下次再參加一定要去湊下熱鬧。
仲有塊BOARD印晒所有參賽個名
THIS IS ME
後記二：
之前提到開跑前突然覺得右邊腳跟痛，結果跑完返到屋企之後行路都痛，好彩休息咗三日就無事，不過我都開始懷疑對跑鞋個底已經跑到薄晒，依隊鞋係去年預備DISNEY RUN時買的，係時候要換鞋了。
後記三：
明明我擺咗好多靚靚跑步POSE影相，可惜原來佢地唔係大會攝影師，所以我只搵到下面依兩張衝線相。
又唔係影得靚就無謂俾錢買喇~
後記四：
最後出咗成績喇~
個人時間：1:07:15
總名次：13336 / 35124
女性跑手名次：3538 / 14648
成績都唔錯呀﹗