二零二三年八月五日(星期六)
自從去年八月初籌備一家九口西貢STAYCATION的時候看過玩獨木舟的資料之後，一直心思思好想試下。八月中一家三口去梅窩小旅行，留意到銀礦灣有得租獨木舟，點知出發之前視網膜穿咗個窿要做手術，做完手術唔可以落水又無機會玩。
可能INSTAGRAM偷聽到我想玩獨木舟，今年5月中讓我接觸到划艇仔有關這個親子獨木舟探索團的廣告，成人每位$450，送15L雙肩防水袋一個，小朋友每位$250，送沙灘玩具一袋，於是我報名參加了6月11日的活動，點知嗰人落超級大雨，雖然我們一家三口都已長途跋涉的到西貢集合，最後還是決定改期，因為7月去旅行，所以就改為8月5日出發。
上次是坐的士過來，不過留意到附近有大量爛地停車場，所以今次決定駕車過來，點知發現WM HOTEL的停車場竟然比爛地停車場更便宜，只要$25一個小時，還要是有蓋車位，而且更近集合地點，因為我們的集合地點就是WM HOTEL前面對出海濱長廊……
今天早上其實也下了一場大雨，幸好最後成個行程都好好陽光。我地身上的抗UV上衣和長褲都是划艇仔職員推介我們在迪卡儂買的，今次曬咗一日我只係腳踝以下曬黑咗咋，恆仔無買長褲就似乎曬傷咗小腿。另外，出門的時候本來忘記帶帽，見個天落雨都諗過唔戴就算，好彩最後有返屋企拎……
我們今團大約有10隻艇，兩個教練隨行，教練先教大家基本的扒獨木舟技巧就出發了。
我和逸逸用雙人艇
恆仔則用單人艇
教練話依款艇比較穩陣，反艇的機會好細，不過缺點係比較重，特別係雙人艇……
我們第一個停靠點係羊洲，只係依度小休大約10分鐘，逸逸已經忍不住泡在水中。聽說羊洲上真的有幾隻黑羊在島上棲息，不過我們看不到。
再划大約半小時，我們就來到今天吃午餐的地方 – 白沙洲。雖然說我們來的是白沙洲，其實它與對面的小鏟洲連在一起變成了一個連島沙洲，而我們其實兩個洲都無去，只是在連島沙洲上面逗留。
逸逸又係二話不說的就跑進水裏玩，所以落船休息大家都脫下救生衣，逸逸由頭到尾都無除過。
我們索性坐在水中吃午餐，食物就是預先準備的麵包、蛋糕和餅乾。
因為是連島沙洲，所以前面後都係海。
教練主動幫我們拍全家福。
既然有沙灘玩具，食飽飽就係沙灘玩下沙，相比起玩沙，逸逸其實更熱衷去拎水。
我整的龜龜
午餐過後再次出發，下一站係去年我們才去過的橋咀島。
這一段航程扒得非常辛苦，因為超級大浪，俾浪一沖就方向錯晒，扒到咬牙切齒先啱返角度，稍一鬆懈又被沖走。
我同逸逸隻雙人艇嚴重落後，最後一段係靠鈎住教練隻獨木舟埋岸，成程扒咗大約1小時15分鐘，我跟逸逸說上岸後要睡一下。
終於來到橋咀島，因為已經筋疲力盡的關係，沒有走過去連島沙洲，只想在沙灘找個樹蔭坐下休息一下。
精力充沛的逸逸繼續玩沙
去到橋咀島終於有士多，除咗一人一支寶礦力之外，恆仔食咗燒賣，逸逸食五色冰，我就食咗椰子紅豆冰味甜筒，另外仲係依度去咗洗手間。
休息後就直接扒返WM HOTEL對出的海濱長廊，其實全程也要1小時，不過浪無咁大，水流方向又啱，所以舒服好多。
因為開始潮退，最後一段係要落水接返隻艇同逸逸埋岸。
明明睇人哋玩獨木舟好優雅，點解玩完一日的我會成個人都散晒？
教練中間幫我地影咗啲相，臨走用AIRDROP SHARE返俾大家，所以所有人的相都會係入面。
除了大合照之外，都沒有我和逸逸扒獨木舟的照片，所以好羨慕恆仔有教練幫佢影咗幾張大頭。
點知細心一睇：
原來好多張相都搵到我同逸逸的身影架~
依張相仲有齊晒我地一家三口添~結果一邊搵自己一邊忍唔住爆笑﹗
上岸之後本來我們打算去壁球場沖身，但係太多人排隊，所以最後抹抹身換件衫就算了。
其實逸逸由最後一段航程開始有啲情緒，因為有團友上咗我地原本隻船，而佢個小朋友比較細所以支漿亦比較短，逸逸覺得好難扒所以好唔開心，仲唔開心到喊，去到中段爸爸開聲同教練講幫手換返先好啲。不過始終已經好累，結果頂帽太大跌落嚟又唔順心、座墊唔舒服又唔順心、我無按佢方向扒又唔順心、覺得我們隻艇最慢又唔順心(其實我地明明唔係最慢)、仲有上岸之後職員唔見咗我地寄存的保溫袋我地話由佢又唔順心……
上述的情緒除咗累之外應該仲同肚餓有關，因為去西貢市中心食完碗餐蛋麵之後即刻開心晒，連行返WM HOTEL攞車一聲累或者咁遠既都無講過，仲話獨木舟好好玩，下次要再玩添﹗