2022年8月10日（星期三）
晚上回娘家食飯，臨走的時候開始覺得眼睛唔係好舒服。
2022年8月11日（星期四）
早上起來眼睛情況轉差，多咗好多飛蚊同埋怕光，早上即刻去睇普通科醫生拎轉介信睇眼科。起初先上網睇吓各公司眼科醫生的評價，㨂咗幾個嘗試去預約，無諗過最快都要兩星期後先有得睇，突然諗起普通科醫生轉介信都夾咗一個同集團的眼科醫生資料，打電話去查詢，今日下午有得睇，真係感謝天主。
陳浩然醫生的診所在佐敦，上到去唔係等好耐就有得睇。陳醫生簡單問症之後就叫姑娘幫我滴放大瞳孔藥水，藥力發揮後就開始檢查。最後陳醫生在我的左眼發現視網膜有個窿，並安慰我說這情況不會致盲，但要立即處理，於是約好了第二天一早到中環診所做激光修補手術。
2022年8月12日（星期五）
今天一早先送逸逸去媽媽屋企，然後由恆仔陪我去中環診所做手術。
中環診所真係比佐敦診所高級得多。
今早要再用電腦做一次詳細檢查，確認只有一個窿要修補。激光修補視網膜手術唔太複雜，雖然叫做修補，其實只係封實佢唔好俾佢惡化。助手先幫我滴麻醉眼藥水，然後固定我個頭係儀器前面，醫生好似打機咁用激光圍住眼角膜個窿射幾個圈就完成，過程是有痛，不過是可以忍受的程度。
飛蚊原來係穿窿的血，唔會消失，但會慢慢移去眼球後面就唔影響睇嘢，不過老花依個後遺症就似乎無法改善了。