二零二二年八月十七日(星期三)
逸逸終於放暑假了﹗
今年因為疫情關係，部份暑假提早在三月放，當時學校很好的KEEP住上網課當補課，等於沒有放假，然後一直返學至8月11日才行K3的散學禮，8月23日卻要開始返小學的銜接課程，真正的暑假只有短短的11日。
雖然8月初才去了西貢STAYCATION，不過有見去年暑假在長洲玩了三日兩夜非常回味，今年決定再戰離到，去下我都未住過的梅窩。
出發喇~
點解我會戴咗眼鏡？因為出發前一星期因為線網膜穿洞而做了眼手術，唔戴得隱型眼鏡，仲唔落得水添﹗咁樣的狀態之下去離島旅行其實真係有點掃興，不過也沒有辦法。
我地係中環碼頭搭船入梅窩
其實這時已經1:30PM，不過晏食早餐的我們又未算超級肚餓，所以我地打算入到梅窩先食午餐，未上得船就買啲小食頂住肚先。
前往梅窩船程大約40分鐘
叫做有少少藍天白雲不過有點大浪的維港
我地來到梅窩了，我上一次來梅窩可能仲係讀中學的年代。
今次我們入住銀鑛灣渡假酒店
酒店沒有升降機，要自己搬行李上樓。
間房同上年的華威酒店一樣都有海景，不過依度無露台唔可以行出去，加上天氣麻麻地，吸引力真係差好遠。
放好行李我地先去酒店的餐廳吃午餐
依度係由送餐機械人為我地服務，都幾唔錯，大家都覺得很有趣。
食物味道都OK，價錢略貴，不過為了節省時間都預咗﹗
銀礦灣泳灘就在酒店下面，好方便。
靚靚泳衣
落水喇~
去海灘最鍾意就係玩波
我唔落水，所以今次帶埋西瓜帳篷做大本營俾我休息，點知玩咗唔夠15分鐘就話黃雨兼雷暴警告生效。
上水之後我地開始執拾，逸逸就用埋嗰小小時間玩多一陣沙。
雨越落越大，我地又無帶遮，結果要好狼狽咁冒雨跑返酒店。
歷時20分鐘的BEACH TIME宣佈結束﹗