二零二二年八月五日(星期五)
今次是慶祝爸爸媽媽結婚週年的STAYCATION,目的地係西貢。
逸逸放學之後做埋功課先出發,本來好理想咁諗住坐屯馬線去到鑽石山再轉巴士就去到目的地好簡單,點知原來去西貢的92號巴士要半個鐘頭一班,好彩有個旅行喼可以俾逸逸坐住等車,我地傾下計玩下包剪揼,時間都算易過。
我地大約2:15PM係屯門出發,最後交通時間用咗兩個鐘頭,4:15PM先去到西貢。係西貢落車的時候仲要遇上傾盆大雨,而且有少少水浸,馬路上的車濺起的水花成個人咁高,逸逸著埋雨褸都半落湯雞咁去到酒店。
我地今次入住西貢白沙灣的THE PIER HOTEL
小小的酒店, 樓高三層,只有40間房。
房間都算闊落,可惜也是沒有浴缸。
有個小小的露台,不過因為外面很窄沒有座椅,所以也沒有像長洲時的華威酒店般吸引我們在露台逗留。
爸爸媽媽和妹妹一家比我們早到達酒店,外面落雨邊度都去唔到,大家聚在房中談天說地。
小朋友玩下遊戲,玩左水果蹲同埋估手手,唔出去都一樣玩得咁HIGH。
開始細雨就出去行下
我地去參觀下酒店對出的白沙灣碼頭,無諗過星期五的白沙灣咁多泊車位,諗起今日用左兩小時的交通時間,早知就駕車過來,定時遙距入錶就OK。
著咗雨褸既逸逸專走去滴水既地方停留
因為今日係星期五,加上又落大雨,個碼頭無乜人。
我地去對面的西餐廳Padstow Restaurant & Bar食晚餐。
我地坐樓下,雖然無冷氣不過都唔熱,而且係疫情期間空氣流通真係好重要,不過唯獨係有蚊比較難搞。
典型西餐的食物,我地叫咗吞拿魚沙律、牛扒、藍青口同埋FISH AND CHIPS,樣樣都唔錯,特別係個藍青口肉質好嫰,另外叫咗個焗芝士長通粉俾逸逸都好好味。我地又試咗兩款啤酒,各自有好獨特的風味,其中一款好似加咗蜜糖咁甜絲絲……
我同阿妹果然係兩姐妹,口味都好相似,大家各自點菜,成大本MENU咁多嘢揀竟然大家都揀咗吞拿魚沙律同埋FISH & CHIPS。妹妹佢地另外叫咗甜品,大家都有SHARE來吃,我同逸逸仲老實不客氣咁坐埋過去。
食完晚餐就散步返酒店休息
今次唔記得幫逸逸帶私伙牙刷,要用酒店的,個牙刷頭同佢個口一樣咁大,真係好搞笑。