28-4-2011:上海pre-wedding+杭州day 4(part 1).出發往西溪濕地

嚟到杭州第二日,今日本身打算去西溪濕地,如果夠時間o既話,可以去埋未城就好lu~西溪濕地係杭州「三西」之一,同西湖、西冷並稱三西,係第一個國家級o既濕地公園喎,而家似乎都幾大力promote呢個景點,因為杭州o既官方旅遊page都講好多,仲有特別專輯添,加上而家有個「花朝節」,我哋更加要去睇下啦~如果大家睇過「非誠勿擾1」的話,西溪濕地更加係嗰度o既取景地方﹗不過我同day都未睇過呢套戲,所以冇乜特別強烈感覺,而家返到嚟都想睇番﹗

食個早餐先﹗

呢間杭州海外海智選快捷酒店,屬於Holiday Inn旗下o既Holiday Express,有牌子,早餐質素都比上海嗰間好得多~不過當然唔係話好豪華好豐富嗰隻啦~

可以的話我哋都想盡量搭多啲巴士,唔係錢o既問題,搭的士其實都好平,但的士一來難截啦,二來搭多啲巴士可以多哋了解呢個城市嘛~我覺得上網check杭州啲巴士都幾方便,打起點、終點入去,點樣轉車都check到,而酒店o既電腦有得用漢語拼音輸入,所以都好方便呀﹗等我記低啲巴士點搭先~

都係酒店門口影張相留念啦﹗除咗地點唔太方便之外,我覺得呢間酒店都幾好~不過呢,旁邊o既皇冠海外海酒店好似有KTV,所以夜晚都聽到人唱歌怪聲,有啲嘈,不過嘛,我就嘈都唔影響瞓覺o既,係有時有啲難聽就慘啲囉~

day叫我影呢張相時我都有啲抗拒,呢條「河」係杭州人心目中會唔會係「渠」嚟o架?如果有人係屯門臭河度咁樣影相我哋都笑佢啦…後來發現我哋呢條橋都有命名的,所以就放心影相了﹗呵呵~

嗱,搭巴士時影出去o既相就可以見到杭州係有幾咁塞車了﹗唔係咁啱塞o架,係市區範圍入面度度都係咁塞﹗衰到連高架路都塞囉~

好不容易去到黃龍旅遊集散中心,呢度去附近o既長途巴士都好齊全,好似去黃山呀、上海呀都有,平時啲明星成日話去橫店拍戲,呢度都有車去~我哋search咗有車去西溪濕地嘛,所以都充滿自信可以係度我哋要搵o既車﹗

不過嘛,有係有…但一個鐘頭一班﹗下一班係40分鐘後開﹗oh no no~咁呀,都係搭的士了…

所以嗰班巴士仍然係黃龍旅遊集散中心休息之時,我哋已經去到西溪濕地了~呢度有好多個入口,我哋都有啲濕亂,之前睇啲網頁呀,都冇講情況係點樣,只係建議大家搭船遊覽之類~唔理了﹗入去先啦~

複雜o既遊園地圖…冇得索取呀,不過後來先發現門票後面有張簡圖…原來成個公園唔係全部都收費o架喎,有啲部份可以免費遊覽,而收費景點嘛,如果你買咗RMB 80的門票,就大小景點都可以憑票入去,但有啲小景點亦可以RMB 10咁樣單次買票入去~

初時去到o既感覺…umum…係南生圍同埋濕地公園o既混合巨型版﹗

尤其呢個小碼頭就更加「南生圍」了,哈,呢張係自拍王嚟o架,不過辛苦day了,按完個掣之後要10秒內跑跑跑過嚟﹗所以影到第三張先影得成功,之前嗰兩張唔係動作未擺好就表情未預備好~

我哋亦帶咗兔子去影下pre-wedding相相﹗heehee~

當知道啲小景點可以憑大門票入去之後,day就出番去大門嗰度買番RMB 80嗰種門票,入到去,哇,大家如果唔打算俾RMB 80入去大景點的話,千祈千祈唔好入去嗰啲RMB 10 o既區﹗零嘢睇~嗰啲廟零香火,好似被丟空咗一排咁,而且啲廟更係近代修建o架囉,所以亦唔係咩歷史文物…不過呢,入咗去就算數啦~

我哋影pre-wedding上腦…哈哈~時不時都記起我哋個攝影師Raymond話「試下對望」~我哋又試下對望先﹗大家不妨留意下我哋今日著o既tee,heehee,係情侶tee嚟o架,係淘寶網淘番來的,每件RMB 40左右咋~兩件tee拼埋就係「Love signal never power off」,都幾有意思﹗:D質地都唔錯~係淘寶度search情侶裝…有28萬幾個product出咗嚟﹗

呢個小景點好少少,啲亭台樓閣都幾雅緻o既,但都係人煙稀少…

再次上腦﹗呢張仲要係自己手拎住相機自拍的~:p

好在人唔多,我哋可以好free咁樣自拍一下~

影到唔少靚合照呢~又唔會立立雜雜咁好多閒人~

而家仲未去到非誠勿擾o既拍攝地,下一篇blog會大家去睇下花朝節o既靚靚花花了~

待續

前往其他中國旅遊blog

Comments

comments

在《28-4-2011:上海pre-wedding+杭州day 4(part 1).出發往西溪濕地》中有 4 則留言

  1. 我也好钟意苏杭二州那种恬静宜然的自然风光,在那里闲庭信步,漫步于小桥流水人家那种亦动亦静中,时光都仿佛停顿了似的。难怪古书有云:窈窕淑女,君子好裘。(多补充一句,谢谢阿玮上次婚礼上作我的伴娘呀,辛苦你了哈。)
    [版主回覆05/19/2011 13:37:00]replied

  2. Re水水:
    唔駛客氣唔駛客氣﹗我都冇乜點幫到手~
    西溪濕地呢度好啲,因為人少啲,可以悠閒地享受一下,但係西湖真係勁勁勁多人﹗多人到寸步難移呢~

  3. 若光是看植物,也許中國人不願花八十塊來此地一遊;在外國,植物園一般是不收費的,在杭州可看的景色也不少啊!當然,倘若遊人如鯽,也失去賞花、賞樹的興緻了。
    [版主回覆06/11/2011 14:42:00]replied

  4. Re爹爹: 如果唔係係度拍過非誠勿擾,我覺得都唔值RMB 80,而且管理上有更多要改善o既地方呢,收得RMB 80就要有RMB 80 o既水準啊﹗

發表迴響

你的電子郵件位址並不會被公開。 必要欄位標記為 *