day 2嘅早餐搵食有啲狼狽，我哋決定幫襯酒店食一餐舒舒服服嘅自助早餐，因為幫曉加床已經自動附帶一份早餐，所以我哋俾多三份嘅錢就食到啦~
泉州悅華酒店唔係咩國際品牌，上次跟團去潮汕食過一般般嘅自助早餐，今次真係好有驚喜，選擇多、品質好、乾乾淨淨、職員又親切有禮夠專業，食得好開心~我去鮮打果汁嘅櫃枱時，本來已經有好多款式嘅果汁可以選擇，有客人問可唔可以幫佢打啲唔知咩汁，居然可以客製添﹗勁﹗另外，可能酒店同其他福建人一樣熱情好客吧，之前提過嘅各種美食都可以一次過係自助早餐試到晒，蠔煎、麵線糊、牛肉羹，仲有先一晚食過嗰個炸五香捲，恐怕都係名物之一，係唔同地方都見到佢出現﹗咖啡機旁邊有部全自動養生飲品機，準確地講番有咩飲品唔係好記得，總之係蕃薯呀、淮山呀、芝麻呀嗰啲朋友啦，咁特別應該要試下，但結果我都係飲番咖啡…
有得食下西式早餐~
食完個舒舒服服嘅早餐，我哋去lobby集合上番架13座，先去附近嘅大舅父屋企兜一兜大舅父大舅母，跟住就出發去陳埭堂參與復活節主日崇拜~我開頭以為會去番四年前去過嗰個教會(請參閱：29-12-2019：熱鬧非凡福建探親觀光團day 3(part 1)．法石堂的主日崇拜)，原來法石堂係近屋企，表哥表嫂去嘅教會，至於今日去嘅陳埭堂，就係身為牧師嘅大舅父一直服務嘅教會，車上我哋聽下大舅父講陳埭堂嘅發展，原來最初只有二三十人，到今時今日變成有多個團契、小組嘅大堂會，教會嘅building亦多次翻新改建到今日嘅面貌，仲起多咗一楝宿舍俾牧職人員添，咁就可以更安心咁侍奉了~本來最初嘅行程係話我哋留係酒店聽崇拜直播，why？原來有法例規定18歲以下未成年人士唔可以入教會聽崇拜講道，只可以去兒童托管(類似主日學咁啦)，我哋幾個小朋友唔識聽福建話，普通話又唔太靈光，所以就提議留酒店算數~但我哋覺得，復活節喎，又有去教會嘅行程，點可以唔親身去呢？小朋友照去主日學，最多佢哋搞唔掂就由我過去陪佢哋啦，上次去法石堂時都係咁啦~
去到陳埭堂，大舅父帶我哋入去會客室，話要沖茶俾我哋飲喎，係大舅母話唔夠時間啦先至冇飲茶，動身上去聖殿~
最初詩要黏住我，三個姐就照去主日學，詩就黏住我去大人嗰邊，到大人嗰邊開始咗，佢覺得真係好悶，就叫我帶佢去小朋友嗰邊，佢俾我返大人嗰邊參與崇拜嘅，但隔一段時間之後，我哋接到穎彤表姐call，話詩詩喊得好犀利，我又過番去囉~主日學個導師為免我錯過講道內容，佢用自己手機開咗直播俾我睇，但啲聲有啲散聽得唔係好清，又費事阻住人哋咁耐，我就帶番詩過去，後來佢瞓著咗我就可以聽崇拜到尾了~
趁未開始拍照留念
大人嗰邊印象深刻嘅部份，其中一樣係詩班會著好靚嘅制服，女士們係好似香港大會堂表演嘅黑色長裙禮服，而男士就著恤衫打煲呔，唔知係咪嘅收音問題，定係真係其中一個alto太勁，歌曲嘅主旋律有少少弱，聽起嚟和諧感係爭啲啲，但可以有二三十人，用心練習過嘅詩班係崇拜獻唱已經非常難得了~呢啲時候，不得不提信眾自動和音嘅斐濟教會(請參閱：13-11-2011：斐濟蜜月day 7(part 2)．懶洋洋的下午@Lalati．叫人驚異的美妙歌聲)，同埋夏威夷彌撒嘅和諧伴奏(請參閱：3-8-2014：加州婚禮+夏威夷day 9(part 1)．主日彌撒@Waikiki St. Augustine Church)呢~至於講道方面，同上次去法石堂一樣，都係普通話講，福建話即時傳譯，雖然進度會慢咗一倍，但因為每句聽多一次，變相多咗時間去思考一下內容~
後來訪問番曉，覺得小朋友嗰邊點，佢話有益力多飲，但冇遊戲玩，另外都有俾啲video定slides佢哋睇，但因為又唔識睇簡體字，又聽唔明福建話，普通話就有限公司，所以覺得好悶囉~福建話就隨緣啦，但普通話同簡體字真係學好啲有著數，當年我都係睇簡體字小說學之嘛，easy~
完咗崇拜之後我哋搭番車出去泉州市區，原來午餐同大舅父一家食自助餐呀﹗
個摩天輪有啲熟口面喎…
原來自助餐係我哋上次嚟福建時住過嘅泉州泰禾洲際酒店嘅自助餐，國際品牌梗係一定正啦~
復活節裝飾，你睇大舅公幾cute~
復活節主題甜品區
即使朝早食得好飽，嚟到見到啲食物又可以重新啟動再嚟食咯~我最鍾意冷盤同沙律，小朋友們食咗兩日全中餐，見到意大利粉同pizza就特別開心~
詩詩幫大家自拍
曉：等我嚟啦~
好多嘢食~
食到咁上下，有職員走嚟邀請小朋友去參加裝飾復活蛋活動，三個細啲都興緻勃勃要參加~
而家大個女啦，詩詩都肯自己跟住兩個姐入去個房度參加活動~
詩詩可能係細個組，用水筆裝飾~
曉同穎妍就屬於大個組吧，有得畫下水彩~
大家都好滿意自己嘅作品﹗
yeah~
但有少少問題，曉嘅水彩未乾，於是我哋就要小心翼翼地拎住佢隻蛋嚟行，後來坐上表嫂架車度又掛隻蛋係度，落車之後又掛係我個袋度，有啲搞笑咁~
等表嫂開架車嚟接我哋時，係酒店lobby影下相先~係開元寺兩座塔呀﹗
有人傻咗~
睇嚟酒店都好多客人叫外賣呢，都幾大方丫，專登整個架俾大家放外賣，方便客人﹗
表嫂架車到了﹗下一集我哋去扮靚靚影靚相啦~
前往其他中國旅遊blog