因為Blue Canyon下晝兩點先開門，我哋喺平昌嘅最後一個早上只能夠安排其他行程，先一日我哋已經決定要試下搭觀光纜車上山頂，一心諗住搭下啦，睇下風景啦，估唔到比預期更值得坐~點都好，一日嘅開始當然由早餐先啦，我哋照舊去位於酒店楝嘅餐廳排隊~

去韓國呢段期間啲靜電都非常勁，唔知係咪因為兩個小朋友好鍾意用個頭嚟捽喺我身上面，佢哋啲靜電特別勁，勁到好似美杜莎﹗唔知啲韓國人做咗啲乜？好似唔見佢哋啲頭髮亂得咁緊要，係咪有咩防靜電護髮產品？定係個個都有gel頭？

點知好不容易排到，就發生一件不愉快事件，酒店職員話我哋啲早餐券唔夠用，what？﹗我哋住三晚，三個早上食早餐，唔係好正常咩？﹗總之佢解釋唔清楚咩原因，總之話電腦顯示已經用晒啲早餐券，佢見我哋係外國人，就打電話俾一個講英文嘅同事同我直接對話，佢都唔知點解解釋唔到發生咩事，亦俾唔到咩解決方法俾我，反而係我逐個可能性問佢，總之搞咗一大輪，令我接受到嘅解釋係，因為我哋每晚住宿包2份早餐，即係住三晚總共有6份早餐，小學生以上要付費，所以頭兩日，我哋兩個大人+曉就已經用晒6份早餐，而家姐嗰邊住兩晚總共有4份早餐，第一個早上時已經用咗3份早餐囉~如果呢個係用晒早餐券嘅原因，咁入住時負責check in手續嘅staff，同埋頭兩日協助入座食早餐嘅staff都好唔啱了，入住時應該同我哋講6份早餐會點樣扣法，extra早餐要加幾多錢，喺邊度俾，大人細路有冇分別，甚至提供其他自費食早餐嘅途徑/地點等，而餐廳staff就應該同我哋講清楚原本幾多張早餐券，扣幾多張，剩番幾多張呢啲情報~係咪因為我哋係外國人所以講得越少越好？定係呢三年來接待太少外國遊客？如果我哋一早知道，我哋會一早plan好，究竟要俾錢要加額外嘅自助早餐丫，抑或索性去第二間餐廳食嘢，而家排咗咁耐隊打算入座，先晴天霹靂話我哋知咁嘅情況，實在有啲嬲，而且個餐廳職員亦冇安慰我哋，或者話我哋知正價食早餐要幾多錢，答應可以盡快安排入座之類嘅待客之道，嬲嬲地，決定去第二度食了~

所有人當然都失望啦，其中一個最失望嘅人係曉曉，仲喊咗出嚟添，我以為佢因為冇得食最後一日嘅自助早餐所以咁唔開心，問清楚先知道，原來第二日時三個小朋友之中得佢一個冇兒童餐具，本來應承佢第三日一定要要求攞一份兒童餐具俾佢，而家佢嘅期待落空所以咁失望，真係可憐豬豬~我自己呢，食咗兩日西式早餐，本來打算第三日一定要食韓式早餐，點知突然之間冇咗第三日喇，我就自己攞嚟衰，再一次印證「唔好以為將來仲一定有機會」呢啲錯誤嘅諗法~

結果我哋去咗平昌第一晚叫外賣炸雞嗰間咖啡店食早餐~

好在曉曉心情已經恢復~我哋啱啱入呢間餐廳時小朋友非常口渴，本身諗住去食自助早餐邊駛帶水壺嘅啫，但佢哋排咗隊好耐，後來又同職員傾咗好耐，口渴得不得了，所以一入去間cafe，第一件事即刻衝去斟杯水俾佢哋飲~cafe麵包種類都算多，而且同香港好唔同，叫咗三款，印象中一個係有內餡嘅芝士條(好似係明太子餡？)、一個朱古力包、仲有一個係夾咗好厚牛油嘅包(冇逐個影相唔記得咗添)，三款都幾好味，仲好貴添…咖啡就等咗好耐，好在小朋友揀咗盒裝飲品咋，如果唔係又等到嘈嘈嘈~

因為佢哋食得太慢，11點前又要check out，所以派爸爸返房抬啲行李落嚟先，好在我哋一早出門前已經大致上pack好啲行李~

我哋三個都搞掂就過去幫手~check out好簡單，基本上只係還房卡就ok了~我哋寄好行李去櫃枱，就可以過滑雪小屋嗰邊買纜車飛去玩啦~

排咗一輪隊，總算順利買好纜車飛~有部份人好似我哋咁純觀光搭纜車上山頂，但更多嘅人係搭上去滑雪，所以大家都著住滑雪裝備，手拎滑雪板或者單板上車，原來啲滑雪板可以插喺纜車外面，有條繩縛一縛，就跟同一車一齊上去了~好在一架車可以坐八個人，我哋七個自己包一個車廂，真係好喇~

望番落去就係酒店楝、condo嗰邊啦，右邊啲小屋可以租嚟bbq，原本都有諗過想去試下，不過一來唔係好安排到時間，二來感覺太長時間喺戶外會超凍，三來我都覺得收費有啲肉赤，結果就冇去到~

上山去~我哋見到雪地上有啲動物嘅腳印，唔知係咩動物呢？小鹿？

心情靚靚開心詩~

我好鍾意呢張一家四口合照，仲用咗嚟做FB嘅profile pic添~

搭纜車其中一個好處，係可以欣賞到啲高手嘅滑雪英姿，我哋先一日滑雪時，附近嘅人全部都同我哋差唔多，而遠少少嘅滑雪道都係初級滑雪道，上到嚟半山，終於見到高手中嘅高手，喺好斜嘅斜坡都神態自若，輕鬆又優美咁滑落嚟~我哋話，嗰個斜度，如果我哋著住正正常常嘅鞋行落嚟都會好驚~

遠處嘅山景

到咗山頂lu~原來度假村改咗座山峰嗰名做白朗峰，感覺有啲唔好意思呢，真正嘅白朗峰有4808公尺高，呢度有幾高呢？

答案係1050公尺~

雖然比起香港最高嘅957公尺大帽山高，但都唔算太高嘅山吧？

不過山頂呢度有好大嘅空地，對於滑雪嘅人嚟講係稍作停留嘅地方，有間小食店喺纜車站下面，可以食下嘢暖下身，對於我哋唔滑雪嘅人嚟講，係另一個休閒享受白雪世界嘅好地方~

喺我哋扮二人世界嘅時候…

小朋友已經開始打雪仗了~執執執，掉掉掉~

你睇下佢幾開心~話說我哋今次去韓國時，已經放寛防疫規定，戶外可以唔駛戴口罩都得，喺呢個偽白朗峰山嘅山頂都係我哋其中一個有除過口罩嘅地方，其實每次除口罩都唔除得耐，因為啲空氣太凍了，戴番口罩暖好多，即使係韓國人都好多戶外戴住口罩~

曉：我砌咗個小雪人呀~

點解影到好似落雪咁？因為有道具部姨丈灑雪花落嚟囉~

雖然係會落雪嘅韓國，為咗保證滑雪道嘅雪有一定厚度同質素，都係需要人造雪機~

呢幅地圖就顯示咗鳳凰滑雪場嘅咁多條滑雪道了~由呢個山頂滑落去，頂級、高級、中級嘅滑道都有~成個滑雪場總共20條滑道，初級到頂級都有，梗有啱你嘅~

我哋今次發現，原來要堆雪人都唔容易，究竟人哋點堆嘅呢？啲雪好鬆散時點用力揑都係好鬆~

山頂好多打咭位~

唔知點解，我覺得喺同一個位影，我居然可愛得過詩詩，哈哈~

我同day落去間餐廳睇睇，外面有呢架Cinderella嘅南瓜車呢~

原來係專食公仔麵嘅自助式餐廳，職員只負責收錢，收銀機前面堆滿咗高高嘅包裝公仔麵+紙碗~

然後大家就排隊去淥麵，呢啲一部部機應該係加熱水同埋加熱功能~

上去匯報，如果要喺度食公仔麵，就一定要坐到最近窗邊嘅景觀座位先有意思，但要專登等嗰張枱又唔容易，大家決定落番去山下面搵嘢食~

好幾間餐廳我哋幫襯過了，Center Plaza嘅韓式餐廳、韓牛烤肉餐廳、酒店楝嘅cafe包括外賣炸雞、自助餐廳、又有兩餐喺便利店買嘢食，今次決定轉戰滑雪小屋嘅餐廳~滑雪小屋都有buffet供應，我哋時間唔算多，而且食buffet又有啲太heavy，我哋決定食快餐店Lotteria~

上層係Lotteria，下層係buffet，有啲滑雪pass係可以包一餐滑雪小屋buffet的，如果全日去滑雪，運動量咁大，中途食一餐勁嘅都唔錯~

我哋叫咗兩份韓牛漢堡餐同埋炸雞件share嚟食，個漢堡上面真係印住「韓牛」字樣架，漢堡係幾好味，但有少少辣小朋友食唔到，佢哋唯有不停食炸雞同埋餐嘅炸芝士條~

好長嘅芝士~

食完時間差不多啦，我哋要拎番啲寄存咗嘅行李，準備call車出平昌車站，我哋要返首爾啦~

平昌鳯凰度假村網站：

https://phoenixhnr.co.kr/page/main

前往其他韓國旅遊blog

Comments

comments