滑完雪咁攰，我哋一致決定買嘢返房食，我哋再一次幫襯嗰間包羅萬有嘅CU便利店，好多時去旅行都唔會諗到想自己煮，但好似今次咁，早少少返房總好過喺外面蕩，又要搵位又要張羅，果然condo有廚房係有原因，而間CU便利店亦配合得非常好~我哋買咗包裝公仔麵一pack五包，再加腸仔、雞蛋、泡菜，另外買多份三文治，加上之前食剩嘅杯麵，份量應該夠了吧~有諗過買埋餃子，不過怕份量太多，結果就咁算數~
我哋間房大少少，所以大家喺我哋房食，我煮麵，家姐就拎個牛肉湯包返佢房翻熱，因為一間房得一個爐頭，咁樣應該係最好嘅安排了，小朋友唔食得辣，所以打算用先一日買咗未飲嗰個牛肉湯包俾佢哋做麵湯底~
最攰係你哋三個，你哋食先啦~
Yummy~戶外活動咗成朝，返房食個熱熱公仔麵真係正呀~唯一不足係…麵少咗啲﹗如果可以煮七包麵應該就差唔多了，哈哈~
食飽飽就各自返房午睡啦，唔瞓下先，期待已久嘅烤肉就會變得唔順利了~我哋四個全部迅速倒下，不過都未至於瞓到食晚餐，早咗起身就睇下電視，打下機咁啦~
晚餐就係食曉曉期待咗三日嘅烤肉﹗
既然去戶外包廂，點都要著大褸，我哋索性行露天路線過去Center Plaza，你睇兩表姊妹幾friend？
呢度係我哋幫襯嘅度假村烤肉店，一早book定枱，今次終於食到了﹗話說家姐早過我打呢日嘅旅行blog，佢叫我打烤肉店嘅韓文用whatsapp send俾佢，等佢copy and paste落blog度，我順便search埋鋪頭名嘅意思話佢知，我話可以譯做「平昌肉店」，佢話咁樣叫好頹喎，我就話，一係譯做「平昌庖丁」啦，佢話即刻勁好多﹗我哋當時冇考慮過呢個店名嘅意思，結果就發生咗之後嘅事了…
第一日就吸引我哋嘅戶外雪地包廂﹗
烤肉包廂嘅旁邊就係Blue Canyon水上樂園了，本來以為會嚟玩，結果帶咗泳衣都冇機會玩啦，因為Blue Canyon每日下午先開門，今日滑完雪之後要午睡，跟住又要烤肉，再之後嗰日午餐後就離開平昌了，好在呢幾日都好充實，即使冇玩都唔算好遺憾嘅~(少少遺憾嘅係，滑雪用品店送咗水上樂園嘅discount coupon俾我哋，仲平過度假村住客嗰優惠，可惜用唔到添~)
入座﹗
坐低就發現長枱旁邊有張小茶几，上面放咗三個免費贈送嘅暖包，雖然話有暖爐又有火爐，但都會凍嘅，我還好，不過個包廂門口嗰條拉鍊有少少爛，所以度門唔係完全關得密，三個暖包正好俾三個最怕凍嘅小朋友用~
我哋入座時已經set好晒枱，連火爐都點著好了~嗰啲好似粉紅色蟲蟲嘅小菜，原來係醋醃嘅蔬菜嚟，冇想像中咁可怕，不過味道就唔算特別好味，唔辣嘅白菜泡菜就好啱小朋友食~
點解冇肉類嘅餐牌嘅？放喺廂房入面嘅餐牌只有飯麵酒水嗰啲嘢，咁肉呢？點order？我哋等咗好一陣都冇人過嚟serve我哋，我就專登上番度假村個網頁搵番個menu嚟睇(凍丫嘛，懶得出去…)~
於是我哋就揀好叫邊款肉，幾多人份，仲有冷麵、飲品嗰啲，準備order~因為我哋之前洗落咗衫，day去收衫返房，佢遲一步先嚟到廂房，嚟到時佢又未除褸又未坐低，就叫佢順便出去落order~咦，點解救求？明明寫得好清楚lu bor…
果然間鋪頭叫「平昌肉店」係有原因嘅﹗
肉原來係喺個凍櫃度自己揀嘅﹗真係好似一間肉店咁~酒水都係自己喺個雪櫃度拎，連埋啲肉一齊俾錢，如果要加飯麵就俾錢時order埋，服務生會送過去~我哋當初睇嘅網上餐牌係每款肉100g嘅價錢，並唔係等於一人份，我哋結果揀咗兩款肉同埋一pack菇食住先，反正唔夠可以隨時出嚟再加碼~
小朋友們都叫晒肚餓，拿拿聲開始烤啲菇先啦~
等開餐嘅小朋友~
食韓式烤肉，點都要襯白飯吧？﹗餐牌入面只有附大醬湯嘅白飯套餐，對於我哋嚟講如果要5-6碗白飯，有5-6個大醬湯會唔會太多？了解咗呢間餐廳嘅setting之後，我哋又記起偉大嘅CU便利店，於是一位恒仔爸爸繼續烤肉，另外一位day爸爸就出去買叮叮飯，偷運入嚟~
佢返到嚟時個冷麵已經到咗，理論上唔會再有職員嚟搵我哋啦，我哋關好個簾，就可以秘密享用呢幾個白飯了~
韓式烤肉必備—-白飯﹗
冷麵唔係唔好食，不過都係白飯更加絕配~
大家齊齊整整影番個大合照先~
今晚我哋試試學下韓國人溝燒啤，之前睇過啲韓劇，話有啲人鍾意7:3，有啲人鍾意8:2，我哋今次溝7:3，七分啤酒三分燒酒，又真係幾好飲喎，燒啤冇啤酒咁多氣，麥香之中又多咗啲甜味，比起啤酒更濃味，又比起燒酒更易入口，甜丫嘛，總之就係更加易醉啦~我哋兩個人一支燒酒一支啤酒，醉倒就遠遠未至於，不過可能因為飲咗酒高興咗，之後打保齡球時就覺得特別搞笑~
全靠兩位燒烤專員，我哋享用咗美味豐富嘅一餐~食完兩盤肉有少少唔夠喉，今次輪到家姐同恒仔出去揀咗一pack肉加碼，我嘅要求？希望肉嘅件數多啲，可以食得耐啲囉~
佢哋返嚟烤第三盤肉時曉同逸已經食飽咗，可能第三款肉比較肥，烤起嚟特別大煙，曉頂唔順話要出去透透氣…
有少少恐怖，哈哈~
後來day帶兩個周圍去逛逛影相~
BTS in the soop
BTS之前嚟呢度拍過節目，所以多咗個咁嘅景點~
兩個姐出咗去行街時，最細嗰個包到暖一暖繼續留係度等肉食~佢真係食到最後一刻﹗證明詩詩好番了~
大家都瞓咗晏覺，所以都同意食飽飽可以玩多陣先瞓覺，我哋入番去Center Plaza，落樓梯就係保齡球場同埋機鋪，有好多年冇打過保齡球，小朋友們更加未試過，大家一齊玩番鋪啦~可能因為真係一家大細嚟嘅度假村，居然好似詩詩咁細隻腳嘅保齡球鞋都有得租喎~因為一條lane六個人，day就讓俾我哋玩~
呢次玩保齡球真係好爆笑，或者因為飲咗酒high high地所以特別搞笑，因為小朋友們唔太夠力，所以我哋成日要幫啲波加油打氣，希望佢哋可以夠力碌到去啲樽度~
曉用盡全身嘅力氣，總算十球都順利碌到過去，球速都唔算慢得太交關~
我幫詩時就當然冇問題啦，唔中都夠力水，但後來我由得佢自己碌，有一次真係停咗喺路中心，結果要職員哥哥過嚟救番個波，佢都做慣做熟，又冇笑我哋又冇講啲乜~
另外呢個保齡球場可以選擇要唔要「防落坑裝置」，好多年前都有見過，不過當年未有細路，所以自己冇親身試過~我哋個個都唔係打開保齡球嘅人，水準當然係冇嘅，偶爾手氣好都會高分少少，但個波撞完個防落坑欄之後全中，又變成爆笑之作~
做觀眾時都睇到笑騎騎~
我哋水鬥水之中嘅冠軍係100分嘅姨丈，我同家姐就不相伯仲，另外就係三個小朋友啦~話說我嗰75分唔係我自己一個人攞嘅分，近年我食咗肥膩嘢都會肚疴，因為啲韓牛太肥，中後段時我都去咗廁所好一段時間，期間聽講day有夾硬著我對38碼鞋碌過，兩個女又有幫我手碌過~大家下次再比拼吧﹗邊個贏好輸好，總之就笑到肚痛啦~
除咗保齡球之外，仲有好多其他嘢玩，我哋見到有snooker同遊戲機中心~
非常勁嘅跳舞機選手﹗
其實打機都唔貴，有時間我都想玩下~另外仲有間酒廊，好似話有live表演，同埋入場的話飲品同snack都係放題，我都好有興趣~不過都夜啦，要返房沖涼瞓覺了~
平昌鳯凰度假村網站：
https://phoenixhnr.co.kr/page/main
前往其他韓國旅遊blog