三個小朋友俾幾個教練脅持先入去滑雪場，我哋四個大人換好衫，配好裝備再搭下一架車過去，司機就咁停咗喺停車場，我哋要著住好唔習慣嘅「硬鞋」，手拎住一對滑雪板行過去滑雪小屋入場，隻腳硬都唔大問題，拎住重重嘅滑雪板都唔大問題，最驚係要著住硬鞋+拎住重滑雪板搭扶手電梯，好怕叉錯腳跌親，好在都冇事成功入場~

入場了﹗相中間嘅係初級滑道，其實我哋學+練習滑雪嘅區域連初級滑雪道都唔算，只係右邊嘅空地位置，平時喺硬地時，我哋根本只會當呢啲係平地，但對於初學者嚟講，已經係個小小嘅斜坡了~

見到三個小朋友同三個教練，我哋一入到去，教練就苦晒口面咁問我哋：「乜佢哋唔識講英文架？」三個小朋友確實英文唔算叻，但睇英文卡通片都總算聽得明，講就差少少，我估佢哋溝通唔到嘅最大問題應該係嚇親囉，俾幾個韓國大哥哥/大叔夾咗過嚟，唔見咗爸爸媽媽，冇喊都算偷笑~話說教練出動埋翻譯軟件show俾曉睇，曉後來話我哋知，嗰啲唔知係咩字，又唔係中文又唔係英文喎~哈哈~雙方英文都唔算了得，老實講，用純身體語言+自己母語彼此溝通，可能仲有效過唔鹹唔淡嘅英文~

後來我哋一個爸媽+一個教練+一個小朋友嘅三人組合，好似好少少，小朋友個心定啲，爸媽幫手翻譯一下又示範一下，兩個大嘅總算有啲成就~

曉曉+教練

總算似模似樣~

我陪住詩詩爭扎緊時，遠遠見到曉曉都滑到下，媽媽老懷安慰~

詩詩太細，唔係好夠力控制對滑雪板，企定定都唔係好得，教練幾乎一隻撐住/抱住佢，雖然學費係費，但我哋都深深感受到啲錢真係唔易賺，名乎其實嘅血汗錢~加上詩詩冇鬥志時就好難逼到佢，唔好話滑雪呢啲咁高難度嘅事，即使係除件衫、著條褲，佢想自己得嘅時候就乜都做到，佢想自己做唔到時就乜都要人幫~後來教練夠鐘放工，爸爸帶住佢喺平地踏步，反而開始控制到對滑雪板~雖然唔太成功，但詩詩都話下次想再去滑雪喎~

教練表示佢自己帶住詩就ok，媽媽我都去玩下啦~之前一邊聽住教練教啲小朋友，我都躍躍欲試咗好耐~打橫用滑雪板一步一步切落啲雪度爬上山坡，再11字腳向前滑，用V字腳可以控制速度，試下試下都真係滑得到~開頭時唔係好識轉彎，sir咗落去啲雜物中間跌落地要人救，後尾越來越掌握得到，速度夠膽更快，亦可以按自己心意控制方向同轉彎~

初學者區域 – 紅衫青褲嗰個人，即使見唔到樣都知道係曉，好在套衫夠sharp﹗我喺滑雪場都唔係太分到我老公同恒仔，因為套衫一樣，戴住頭盔就唔係好分到，要睇下佢做緊咩、觀察下啲動作先估到~

靚靚曉~

詩詩嗌凍，我同佢去咗室內地方坐一陣，呢度係登山纜車站，之後嗰日我哋就有搭上去山頂觀光喇~其實因為詩詩停低落嚟先覺得凍，我哋keep住玩時，入面簡直熱到流汗添~

教練夠兩個鐘就走咗了，佢哋留低幾張滑雪場pass俾我哋，叫我哋玩完就直接離場就ok~

輪到爸爸照顧詩時，我同曉家姐、我家姐一齊滑咗好一段時間~

之前花費太多力氣一步一步打橫踩住滑雪板上斜坡，可能用咗九成嘅力+時間上去，好快滑咗落嚟又要重頭再嚟講，曉教我哋(佢個教練教佢)除咗對滑雪板，雙手捧上去斜坡頂，再著番滑雪板滑落嚟，咁就節省好多時間同力氣了~後來發現初學者區之中都有一個稍稍再斜多少少嘅位置，又好玩咗多啲添~

話說今日詩流好多鼻涕，仲要係綠鼻涕，但我哋啲行李留晒係滑雪用品店，匆忙之間連紙巾都冇帶一包出嚟，姨丈見到詩詩流鼻涕都愛莫能助，詩詩話爸爸有紙巾，原來係用舊口罩嚟抹頂住檔先，我就喺個錢包度搵咗張買嘢嘅單幫佢抹，女，真係好對你唔住呀~大家著住硬鞋行動太不便，如果唔係離場出番去都可以去便利店買紙巾~

最初喺滑雪用品店時老闆娘問我哋打算玩幾耐，我哋估啲小朋友好快會冇晒電，所以就話一晝就差不多，估唔到嘅係，因為滑雪太吸引太好玩，大家都意猶未盡，因為答應咗人只玩上晝，我哋決定一點前離場~滑雪有幾好玩？教練走咗之後，我同曉滑緊時聽到家姐同逸逸嘅聲音，逸逸一邊淒厲咁喊一邉嗌要玩，佢又凍又攰，但都要繼續玩，真係好神奇~如果唔係入一次場+租裝備咁貴，我都想之後嗰日再滑多一次~下次再去滑雪場，日本又好韓國又好，我哋唔駛花錢請教練時，一定要有幾耐滑幾耐﹗今次到尾段時我都有啲想去滑真正嘅滑度，點知滑雪三人組之中得我一個興致勃勃，家姐同曉家姐對於初學者個小斜坡都好滿足，所以先冇去到，下次一定要再滑呀﹗下年？plan下先~呵呵~

一點前我哋拉大隊離場，出到去滑雪用品店啲人忙到好似倒瀉籮蟹咁，似乎佢哋係等我哋盡快出嚟，俾佢哋其他客人入去~搭車返去時急急忙忙，司機仲車錯我哋去第二個店面，至於兩個爸爸就喺停車場等咗好一陣子先有人嚟接佢哋~

返到去鋪頭，一除咗對硬鞋，簡直係腳嘅天堂，原來赤腳係咁美好，著自己對鞋都係非常美好~換好衫，執好嘢﹗雖然今次滑雪真係花費唔少錢，但大家都認證係非常好玩，而且下次要再滑，小朋友就話，下次唔要自己先去滑雪場，一定要同爸爸媽媽一齊，係呀，下次我哋唔會再咁樣分開啦~

平昌鳯凰度假村網站：

https://phoenixhnr.co.kr/page/main

前往其他韓國旅遊blog

Comments

comments