食完非常豐富既午餐，我哋先返酒店check in，稍稍梳洗休息先至再出發~
等候check in既嘈吵區~
酒店方面話先一晚full booking，房間仲未全部整理好，所以我哋未攞到自己既房間，我哋就去咗爺爺嫲嫲間房歇一歇腳，曉最鍾意酒店，入到去見到浴缸呀、落地玻地玻璃呀就高興到哇哇聲咁~
見爺爺嫲嫲仲有嘢要整理先出門口，我就同兩隻嘢落大堂行下影下相~
有幾棵唔同大細既聖誕樹，兩姐妹就話係爸爸媽媽bb聖誕樹，另外有隻好大既薑餅船，我話係用餅乾嚟做既，後來同表姐們講起佢哋都半信半疑呢~
坐下舒服既櫈~
大堂免費供應冷熱飲品，正~
今日下晝既行程主要去探親，先去爺爺鄉下—-石獅既港東，見見爺爺既堂兄同侄仔，之後再去二舅父位於石獅既傢俬店~本來嫲嫲有意叫我哋帶住小朋友留酒店休息，因為車程長又匆忙，但我覺得一場嚟到咁遠，梗係要去下啦，何況仲會去爺爺嫲嫲既舊居呢~
車上當然係小朋友吱吱喳喳既天地啦，每一日搭咁多程車，我都唔記得佢哋邊一程玩過啲乜做過啲乜了~不過好記得既係，每一晚晚飯後返酒店嗰程車我哋都會聽Frozen 2既sound track，因為小朋友攰到跌晒watt，唔想佢哋唔小心係車上瞓著覺，寧願撐到返酒店沖埋涼先瞓，所以要keep住清醒就要聽啲高興啲、激昂啲、興奮啲既歌~
練習鬥雞眼~哈哈~
路上見到急速發展中既泉州，有好多基建同埋地盤~
似乎係通去好遠既大橋~
沿途風光
我哋先去咗幾個爺爺既親戚既屋企，都係堂兄嗰邊既家人，對於我嚟講，最特別既係屋企門口既牌匾同對聯~
我當然知佢哋家族幾代都係基督徒啦，但我估唔到既係，原來基督徒家庭都會有牌匾同對聯係門口，頭頂上面四個大字係「以馬內利」係成條村入面都見到~
爺爺同堂兄聚聚舊~
太爺太嫲張相呀，三個邱、邱、邱梗係要影下啦~
茶博士曉？
去到陌生既屋入面，詩詩好自然咁搵到張啱自己既櫈，好唔客氣咁坐低咗，哈哈~
爺爺堂兄屋企後面，就可以通去爺爺嫲嫲既舊居，即係佢哋以前結婚後住既屋企~
舊居
嫲嫲好多舊回憶即刻出晒嚟，喜孜孜咁同我哋講解，以前就係呢度煮飯架啦，以前就係呢度瞓覺架啦等等，所以真係不枉此行~
對於小朋友嚟講，鄉村風貌都係好特別既見聞，走地雞、走地鴨，棚上既瓜等等~
點解要抱住？因為曉好驚啲狗呀~
不過又凍又大風，睇一陣都要盡快入番屋啦~
超大既屋~
所以親戚既小朋友可以有好多空間玩，仲可以招呼埋啲鄰居嚟玩，好明顯佢哋四個都想玩，不過言語不通，唔知可以點樣加入~
晚飯之前要去多一站呀，去拜訪二舅父，二舅父開傢俬店，係路上詩詩瞓著咗，我諗住我同詩詩留係車度等佢瞓耐啲，就派day同曉落去玩，但二舅父二舅母一家真係非常熱情，拎埋條被俾我包住詩詩抱佢出嚟~
原來佢哋係傢俬店既地鋪位置僻咗一個鋪位，開咗間鮮果店，賣果汁、沙律、鮮果盤、小食等等~室內裝修好明亮，坐得好舒服，佢哋招呼我哋試食鋪頭既招牌產品，啲水果堆到山咁高，啲米紙卷都非常好味，明知好快要食晚飯唔應該放咁多其他嘢落肚，但我都忍唔住每款試咗一舊，另外食咗好多件點梅子粉既醃青木瓜，yummy~
曉，你咪好鍾意開餐廳既？有機會啦﹗
二舅父仲送咗啲好靚既車厘子同埋士多啤梨俾我哋帶走添~
原來晚飯好大陣象呀，好似有3-4圍，全部都係我奶奶嗰邊既家族成員，day既兩位舅父、一位姨媽既仔女同孫，所以都好多小朋友呀~
我哋一家四口同day既老表同佢哋既家庭坐，我都唔太sure第二代同第三代既親戚關係了(唔好話我，連day都唔太清楚)~總之席上會不停轉channel，廣東話、普通話、福建話，轉得太多，大家都有少少亂龍，最亂應該係我老爺奶奶，最搞笑既係佢哋會對住曉and詩講普通話，聽到佢哋一頭霧水~
食物又係嚟一道哇一道，因為樣樣都好好味，而且擺盤亦好精緻，食物又好吸引~詩詩不嬲唔太食嘢又瘦孟孟，但今次福建之旅似乎激發佢既小宇宙，食下又停下，停下又食下，餐餐都由頭帶到尾~可能因為佢鍾意「飲飲飲」吧，又有汁又有湯又有糖水開正佢嗰瓣~曉呢，俾人知道晒佢鍾意食鮑魚，鮑魚一嚟到就兩眼發光，好失禮丫~
大人食到如火如荼時，小朋友已經大半飽，佢哋當然想落地玩啦，其他表兄弟姐妹都一齊落地玩，打破語言隔膜既係猜皇帝，小朋友都玩到好興奮，詩詩呢一刻未識出剪，加入唔到，就周圍食嘢，更加氹到啲舅公高興~day真係平時帶慣兒童崇拜，總係忍唔住出手，帶佢哋玩多幾款新遊戲，小朋友梗係開心啦，不過要顧及唔同年齡同埋語言不通既狀況去揀遊戲都真係有啲難度~佢哋玩得開心實在太好了，因為day 2晚上其實都會再見面丫，到時又可以一齊玩lu~
超級攰既一日過去，終於可以返到酒店房啦~
支撐住佢哋唔瞓覺住既，除咗有聽住Frozen歌，另一樣就係曉期待咗好耐既浸浴了，屋企冇浴缸，平時都係淋浴，係去旅行時住酒店先有既福利嚟架咋~一定要瞓一覺好既，要儲足精力day 2繼續燃燒呀~
待續
前往其他中國旅遊blog