27-12-2019:熱鬧非凡福建探親觀光團day 1(part 1).鬧哄哄與食飽飽的開始

我同老公結婚八年幾,一直都未跟過佢返福建老家,其實我奶奶娘家既親戚,即係兩個父同姨媽都有邀請大家去玩,一直都未成事,適逢年中時大舅父大舅母來港一趟,就口頭上講好呢個約會了~有時就呢個就嗰個好難成事,我哋決定,無論最後幾多人join,總之我哋一家四口就一定去啦﹗雖然係聖誕黃金檔期,但都浩浩蕩蕩一行十人丫,day我曉詩,我老爺奶奶,另外就係Lily家姐,兩個表姐仔同埋佢哋既嫲嫲喇~

最鍾意plan旅行既我好積極地為大家book機票book酒店,八月左右我哋就book好咗今次既五日四夜之旅啦~我知道而家搭高鐵好方便,但我要首先舉手投降,帶住曉詩搭四個鐘頭火車恐怕會擠乾我既精力,而且旅程得頭尾五日,剩低落嚟既時間就變得少好多了,雖然飛機有啲頭頭尾尾既預備時間,但「唔郁得既時間」只有一個鐘頭鬆啲,對於帶住年幼小朋友既家長嚟講輕鬆好多既~至於酒店方面,我哋揀咗泉州既Intercontinental,最主要係雙床房有超大單人床,無論係我哋一家定家姐一家四個人入住都瞓得舒服啲,同埋國內既Intercontinental比起香港實在平太多,可以以低啲成本入住五星級酒店實在太好了,唔好錯過呢個機會~

我哋搭早上十點幾既飛機,諗住索性去到機場先食早餐~點知深圳航空既check in實在非常慢,估唔到今時今日仲會用手抄乘客既資料落張紙度~好在,我哋全部人都有比預定早少少到,入到禁區都唔太晏,我哋都可以坐低食早餐~食個四四正正既早餐都好重要呀,因為來往香港同泉州既深圳航空班機係冇供應飛機餐架,唔食飽飽就要捱肚餓到福建咯~

太肚餓,食物未到詩詩唔耐煩,要拎盒藍莓出嚟頂住檔先,原本盒藍莓係俾佢哋搭飛機時悶悶地食既,而家要提早出動了~

食飽飽之後大家去到閘口等候上機,四個小朋友當然開始玩、玩、玩啦﹗

旅程既day 1已經充分預告嚟緊呢幾日會有幾嘈同埋幾勞氣~

四個do-re-mi-fa既高度,齊齊睇飛機~

穎彤大表姐好親切咁同曉&詩表妹玩,所以兩個表妹都好鍾意表姐,特別係曉啦~

估下佢哋玩乜?係小明小明﹗上圖詩詩唱到「後後」,下圖詩詩已經「窿」,好明顯佢哋兩個唔同步~

佢哋四個有幾嘈?哈哈~嘈到咩地步?就係我哋聽唔到登機既廣播﹗看住四隻玩到咁上下,諗住叫佢哋去登機閘口度影個「指定動作」,當時先發現已經last call,我哋急急腳咁上飛機,真係好耐冇試過咁早去到閘口都咁趕囉,結果影唔切個閘口號碼牌~

始終機程短,所以來回兩程都搭得算輕鬆,我預咗飛機上冇得睇電視,都叫做幫兩個小朋友預備咗娛樂袋,詩好快就瞓咗覺,曉呢,佢急不及待要玩之前菊姨婆送俾佢既填色簿,好難先勸到佢畫一兩頁要瞓覺,好在最後都瞓咗~

係我俾兩個壓到腳痺啫,瞓咗就好~

瞓醒玩下表姐俾既水彩填色紙~

仲有難得既珍寶珠,糖/珍寶珠唔係成日有得食架,係入戲院睇戲或者搭飛機先有得食咋~

捱埋今次啦,下次再搭飛機,詩詩滿咗兩歲就有自己個座位啦,應該可以坐得冇咁逼啦~

一心諗住福建會凍過香港,睇天氣預報日夜溫差大,實質身體既感覺有幾凍都係去到先知,小朋友們就幫佢哋帶晒厚中薄既衫,我同day就相對帶得冇咁齊全喇(基本上只有厚褸,唔係唔夠衫著,係多得滯啫~)~落機馬上要搭接駁巴士去客運大樓,即刻要感受泉州既天氣,啊,原來唔太凍喎,弊喇,我哋兩個大人啲褸太厚啦﹗

yeah,抵埗﹗

過咗關拎咗行李,大舅父大舅母已經嚟咗機場接我哋啦~

佢哋既新抱(即是day既表嫂)幫我哋包咗一架18座位旅遊巴,跟晒我哋五日既行程,放到晒行李之餘又可以坐得好舒服,小朋友瞓覺都夠位,實在太好了~事關今次所有行程都係坐車點到點,其實對於各個地點既地理位置完全一頭霧水,要不斷睇地圖先知自己去咗邊~

大舅父一家安排我哋去食午餐,第一餐就見識到非常豐富又華麗既福建海鮮宴,我哋一行14人可以坐晒同一張大枱喎,令我哋感覺好amazed既係自動轉盤,所以無論坐幾多個人既圓枱都唔會夾唔到餸,不過呢間搞笑啲既係,個轉盤轉得有啲快,未到自己前面之前要開始準備,然後要好敏捷咁夾先趕得切,我又要夾俾自己+小朋友,所以都要眼明手快~

照顧住小朋友唔得閒影相,都係後來上車先慢慢記番起食過啲咩餸~今次其實係我第二次去福建,第一次去時係小學時同爸媽佢哋跟團去,印象最深刻既係,當年唔係搭飛機搭火車去,而係搭瞓過夜既船去福建,另一樣最深刻既就係好多靚茶飲~今次去完返嚟媽咪都問起我福建既茶,不過呢,而家原來去酒樓既筵席呢,唔係招呼你飲茶先,而係好興有啲暖既粟米汁/五穀漿之類既飲品,似乎大家好鍾意飲(又覺得好健康吧?),連酒店自助早餐都有得飲~呢啲飲品就啱晒小朋友口味啦~咁多樣食物之中最吸引我都係海鮮吧?焗大海螺好肥美,涼拌八爪魚同里涼拌小海螺都好鮮美~另一樣好神奇既係,今個trip終於解釋到點解我奶奶咁重視食飯時嗰啖湯,無論係質定係量都係非一般既程度,我哋廣東人通常都係一餐飯一款湯嘛,返我奶奶屋企食飯時,有時我奶奶會預備兩款湯,原來福建人真係好重視飲湯﹗﹗呢一餐有一款豆腐魚湯,一款酸辣牛肉羮,之後試過一餐有三款湯添,所以完全唔知道自己食到邊個階段,食幾道菜會有個湯,飲完湯又有幾道菜,之後又湯,好似無限loop地出現,end point應該係…超級飽+滿足?總之福建人就係非常熱情好客啦~

同場加映小插曲,今次係曉詩第一次同兩個表姐去旅行,表姐s都好想同兩個表妹s親近,每一次食飯,每一次坐車,大家都要爭論一次邊個同邊個坐~(^^”)非常疲累~另外,今餐既水果拼盤有龍眼,似乎大表姐平時少食龍眼,佢請龍眼愛好者曉教佢點樣剝龍眼,曉當然沾沾啦~呵呵~

食飽飽我哋就開始今日既行程啦~

待續

前往其他中國旅遊blog

Comments

comments

在《27-12-2019:熱鬧非凡福建探親觀光團day 1(part 1).鬧哄哄與食飽飽的開始》中有 2 則留言

  1. 睇文字描述都覺得熱鬧,同埋嘈。
    講到食飯,雖然無相,都想像到放滿晒成個轉盤,令我諗返起大學時去山東北京交流團,每一餐d餸都多到要叠兩層先放得晒。

    • 所以講到下年聖誕仲一唔一齊去旅行,雖然今次好開心,但都因為太攰而要猶豫~
      係呀,真係好多餸,我哋係車上好努力咁記番起有咩餸,不過因為唔知原本叫咩菜名,我就咁列晒出嚟冇乜意思,所以我揀嚟講咋~

發表迴響

你的電子郵件位址並不會被公開。 必要欄位標記為 *