其實第二個景點Swiss Sheep Farm同啱啱去完既Santorini Park好近，搭冇幾耐車就到~落車後司機好親切咁樣帶我哋去買飛，仲幫我哋影咗幾張全家福，好nice呀~
買飛先~
影下個招牌先~
一家人齊齊整整就更perfect喇﹗
兩個好可愛~
四個更可愛~
曉話要飲牛奶喎~
大踏步去參觀農場既小小朋友~
睇下各種動物…
原來係天鵝~
呢度好多影相位，如果時間充裕又鍾意擺pose影相可以慢慢影~
我哋既小朋友暫時都係有得玩最實際，每度同你影少少啦~
紅蘿蔔，紅蘿蔔，甜甜香香汁又多…如果你睇呢個句子，心入面係有旋律的話，即係你都係啟思幼稚園既好朋友啦，yeah~
點解呢個位唔係同我兩個人sweet sweet地影？而係同小小情人？
小情人&小小情人~
旁若無人…
ok，終於輪到我~
一齊影啦~
入場券已經包括餵羊既牧草一份~
每份份量都好多，餵得夠盡興，但唔知係咪專登餓住啲羊等佢哋搶食，話說個農場差不多close時，職員引番佢哋入去裡面先真正飽餐一頓，係真既就慘慘lu~
我估唔到細膽曉都肯餵羊，仲積極到執起跌咗落地既草嚟餵添~
除咗羊之外仲有其他小動物，但我哋一邊行既時候，慢慢開始落雨啦，我哋又冇帶遮落車，所以有少少狼狽~由一處跑到另一處，其中一個避雨位係兔舍，真係好多兔兔﹗﹗如果想餵兔仔又要再俾錢lu~貴又唔係好貴，但入面啲兔多到小朋友會驚，甚至唔肯入去，我哋就咁企係外面睇另一個香港家庭餵兔仔就夠了~
雨越落越大，天色又開始暗，我哋唔夠時間慢慢等停雨，而且都行咗大部份，所以決定冒雨離開農場了~走之前拜訪一下個廁所先，見Swiss Sheep Farm各樣設施都比較殘舊，本身對個廁所不抱期望，甚至有啲擔心係曉唔識得屙既踎廁，點知不但係座廁，仲要幾乾淨添喎~其實今次去泰國，可能我哋去既多數係遊客區、酒店、大商場吧，發現多數廁所仲乾淨過香港，香港女士真係要習慣番坐低係廁板度，先可以中斷廁所污糟既惡性循環~
上車後天開始慢慢黑，我有少少著急，究竟幾點鐘可以去到第三站Big C呢？究竟司機會帶我哋去邊一間Big C呢？午餐咁晏食，如果好快到，係Big C食晚餐又未食得落住，但返到曼谷酒店先食又會唔會好夜呢？如果停低時食晚餐，九個鐘包車時間會唔會超時好多呢？會唔會搞到好夜呢？
係車上，瞓覺既瞓覺…
玩既玩…
終於到Big C喇﹗結果我哋停靠既Big C都真係好大間，出面既戶外停車場非常大，大到要我哋逛完時要message司機嚟接番我哋~不過呢度應該屬於市郊吧？主要係本地人多，冇乜遊客，所以唔似係我哋上次曼谷酒店附近嗰間咁，冇乜搶購手信既氣氛~我哋呢啲唔係好識泰國流行咩手信既人，就變成唔知買乜好~雖然冇話買得好盡興，但都叫做辦好晒手信吧~
呢個停靠點最最最重要既收獲，反而係行完超級市場之後去既書店，估唔到我哋會買泰文書﹗﹗哈哈，其實唔係純泰文啦，因為啱啱見到有曉詩兩姐妹最愛既「愛探險的朵拉」，仲要係香港未見過既故事，既然係英文泰文雙語，其實都可以睇既~我哋買咗兩本，其中一本朵拉幫狗仔沖涼既書，簡直成為咗詩詩好一段時間既最愛，喊喊時、扭計時、悶時，搵「狗仔沖涼」就可以解決問題﹗一個一歲半既人仔仲可以斷斷續續咁講個故事出嚟添，「好污糟呀」、「番梘」、「過嚟沖涼啦」、「唔係度喎」、「乾淨啦」~
逛完街確實大家都未餓，好啦，返到曼谷先食晚餐啦~
買咗杯荔枝凍飲上車飲，實在太太太太太甜啦，兩個細路好鍾意咁甜，但我要啲冰融多啲先飲到，同時又唔想佢哋飲太多甜嘢，陷入兩難局面~
好不容易返到曼谷既酒店，我哋再次入住Grande Centre Point Rachadamri酒店，抵達時已經九點啦，結果都係要補超時費用，另加額外俾既小費司機，欣賞佢呢兩程車咁照顧我哋~
雖然小朋友有係車上小睡，但成日舟車勞頓，又去過咁多地方都攰，如果要係餐廳坐定定等食大家都會好辛苦~決定先上房，再叫room service，跑住等、睇住電視等應該會輕鬆啲~
哇，今次又upgrade咗間房俾我哋，仲勁呀，係套房﹗有大梳化，有廚房，有四人餐台，有大浴室，仲有化妝間衣帽間~
大客廳~
開放式廚房連餐枱椅~
大浴室~
雖然好大，但冇變既係，張床依然係嗰張六尺闊雙人床，結果瞓覺都係唔會鬆動咗~anyway，活動空間多咗點都有好處既~
叠高兩個咕臣，已經可以開鋪頭煮嘢食~
呢次去泰國，因為要揀啱兩個小朋友食既嘢，所以炒飯係經常出現既菜單﹗room service都唔例外~可能因為太攰，原來我哋一張相都冇影，而家回想番兩個半月前食咗啲咩，好似係肉醬意粉、炒飯同埋炸雞翼~我記得都係食得有啲勞氣，可能兩個小朋友都真係太攰，食得好污糟，大好靚靚酒店房間，跌到好多飯粒落櫈度落地下，食完要執餐懞~
算啦算啦，快啲食完沖個涼，瞓一覺好既，希望reset咗第二日有精神繼續出動啦~
Swiss Sheep Farm網站：
Grande Centre Point Rachadamri網站：
https://www.grandecentrepointratchadamri.com/
待續
前往其他泰國旅遊blog