其實揀由華欣包車返曼谷既景點都難揀架，因為我想趁包車時先去七岩一帶既景點，唔好浪費華欣既兩個full day來來回回，但曼谷包既車指定最早12點先由華欣出發(我估原因係全部都係曼谷既車吧，司機要花時間由曼谷過來)，如果12點出發去景點，啲小朋友就實眼瞓，但車程又得半個鐘就去到，又唔夠時間瞓一覺，咁點算呢？都唔理得咁多，未出發前同曼谷包職員傾行程，佢都話，按你同你老公鍾意既行程嚟去啦，大不了帶埋bb車去俾佢哋瞓覺啦，結果冇帶bb車，但行程就照安排算數~

我哋四個停靠點分別係曼谷包推薦既海鮮餐廳食午餐，之後就係我揀既希臘主題公園Santorini Park、有得親親小動物既Swiss Sheep Farm，同埋最後去Big C購物買手信~雖然曼谷既酒店步行距離都有一間Big C，但而家買完可以直接車我哋返酒店，點都好過買完自己托返酒店既，何況路上既Big C應該口咁多遊客，應該會行得舒服啲~

我哋華欣最後一個早上，去Big Fish餐廳歎多一次早餐，當然要encore生蠔啦，香檳就唔駛喇，我都係唔習慣一朝早就飲酒~

Big Fish外面有啲露天座位，好正，不過早餐時段冇開放，我估唔係唔坐得既，但下下要入去拎嘢食就太麻煩了~

要同呢個靚靚海灘講bye bye啦，可惜幾日都冇藍天白雲，如果個天藍啲，個海一定靚啲，但同時邱曉應該會dur啲~

原本我想check out前叫曉曉去Kid’s Club參加多一個手工班，玩到盡，但佢寧願黏住我執行李返房睇電視，咁冇辦法啦~

我哋早咗出去lobby check out，但與此同時，原來司機都早咗到，咁就更好喇，早啲出發~今次載我哋既司機，就正正係帶我哋嚟華欣時既同一位，上車第一件事係要同佢講，我哋食完早餐冇機耐，要skip午餐地點了，因為佢既英文真係有限公司，所以我用超簡單英文單字，再加指手劃腳，佢再拎番之前定落既行程表同我再三確認，明白了﹗我哋直接去第二站Santorini Park吧~

買飛入場，原來送遊戲券，除咗3D美術館我特別有興趣之外，都未諗過有咩要玩~

玩乜都唔夠既細個小朋友~

既然名為Santorini Park，當然係以希臘Santorini為主題啦，園區入面全部都係小白屋，其實大多數係商店同餐廳~

有啲攰既詩詩唔想企定定影相，只想不停行樓梯同埋暴走~

不過入到去兩個小朋友都想瞓覺，冇心機影相又冇心機睇嘢~曉見到揸船仔話想玩，但入面個職員根本唔想俾佢玩，曉只係剛剛夠高，可能佢見得多嗰啲上咗船就即刻喊住要落船既細個小朋友，一而再再而三咁說我哋唔好玩，叫我哋去玩Merry-go-round，但曉又唔肯喎~算啦算啦，搵個地方瞓一覺先再講啦~

園區入面有好多餐廳，而且位置好集中，我哋要揀一間有冷氣、坐得舒服、坐得耐唔怕阻住人既餐廳嚟瞓覺，好啦，就去Miffy Café啦~Café好靚，但我都冇餘暇影相，務求兩隻嘢盡快瞓覺盡快起身盡快玩，所以兵分兩路，我抱曉坐低café瞓，day用揹帶抱詩出街瞓，但唔知點解兩邊都唔順利，結果day抱住三十幾磅曉出去瞓，詩食奶奶又唔肯瞓，結果我又要抱佢出去行一趟先ok~

我哋各自成功，終於可以返嚟café坐低飲下凍嘢，篤下電話，休息下~係Miffy Café，我哋又剛巧碰到之前係resort一齊做過手工既一家人呢，佢哋就只係嚟食嘢，所以遲過我哋嚟又早過我哋走~可能間café太適合瞓覺，除咗我哋之外，仲有另外帶住幼兒既家庭俾佢哋啲B係度瞓~講起係呢度飲嘢，我今次叫咗泰式奶茶，話說我係香港已經戒左咖啡好耐，好難得地今個泰國trip我有買過咖啡嚟飲，原因係，其他既飲品全部都太﹗﹗﹗甜﹗﹗﹗smoothie甜、soda甜、奶茶甜，乜都勁甜﹗可能Mariott Resort既飲品係調整過，為要乎合國際性既口味，所以冇甜得咁犀利，其餘出到去任何地方都甜得好離譜，甜到我要飲咖啡囉~另外都係椰青水最檼陣，純天然嘛~

其實Miffy Café好靚呀，Miffy fans一定唔好錯過，食物同飲品既造型都有Miffy﹗好開心~

兩個小朋友醒咗，我哋就可以出發去玩啦~

啱啱瞓醒，佢哋未有mood影相~我哋兩個自己影住先~

雙層摩天輪呀~

行出去有個大型過三關係草地度，小朋友熱下身先~

3D美術館其實就係韓國時我哋去過既同一間，但當然展品有啲同有啲唔同啦，曉大個啲識驚，詩就冇有怕周圍行~有一個展品係遊客坐係隻匙羮度，隻怪獸拎住隻匙羮嚟食，曉驚到唔敢行過去﹗要爸爸抱住佢合埋眼衝過去先得，嗰個位一定要經過先去到下一部份，唔通我哋用緊急出口出去唔繼續參觀咩~不過有啲係可愛啲既或者夢幻啲既主題，佢哋都肯配合影相既~

Alive Museum既招牌~

戰戰兢兢既曉~

呢張相完全冇泰國或景點特色，但都想保留係blog，因為影得詩詩幾可愛，哈哈~

開頭時曉唔知要做啲咩，所以由爸爸示範下先~

爸爸抱住詩詩去擺pose，曉見到有趣就肯去加入了~

曉主動去玩~

呢個無論點都係day比較適合~

我都要扮下嘢~

運動選手﹗詩，你企呢個位好危險架~我哋球來球往~

小朋友都可以飲既啤酒~

呢個唔算扮嘢，我以前真係練過跳舞好多年架~

大邱詩於小邱曉，邊個勁啲？

似乎係呢個bb勁啲…

詩詩都夠高坐既過山車~

我唔再係女主角…嗚嗚…

你哋兩個咁緊張既？係咪畫得太逼真？

呢個好似由我吹冇咁尷尬喎~

呢啲奇奇怪怪既就由爸爸負責﹗

學家姐伸脷脷既詩詩~

我估到佢哋兩個大個啲，可以影到更多有趣既相﹗

出到去，day同詩詩去換片，我就同曉曉去坐咗Merry-go-round先，我諗呢個旋轉木馬對曉曉嚟講都係重要既事件，因為返到嚟香港，佢都要分別同婆婆同逸逸分享佢坐過呢個兩層既旋轉木馬，同埋原來落雨時會拉埋窗簾，入面繼續轉繼續開動，呢件事對於四歲曉嚟講都好amazing~

我哋坐咗一陣，自拍咗幾張…

爸爸同詩詩就嚟到，順便幫我哋影下相~雖然曉要買飛入場，但玩旋轉木馬，我哋一大一小職員只收咗我哋一張遊戲券咋~

曉其實好多遊戲都唔夠高玩，媽媽我見到水上碌碌下既吹氣波波就躍躍欲試，早一兩個月去百萬葵園時見到有人玩我已經好想玩，今次唔駛額外買飛就不如試下啦~

感覺…不受控制﹗原來係個波波入面並唔係等同滾輪入面既倉鼠，唔係話想爬去邊就爬去邊，因為倉鼠個轆係圍繞一條軸嚟轉，而球體活動係任何方向吧？爬爬下會係入面打筋斗~雖然自己跌跌撞撞個樣好蠢，但面上又不住掛上笑容，真係奇怪既遊戲~係入面時間越長，越覺得波波既內壁越黏答答，應該係我自己+之前玩過既人既汗水同埋呼出嚟既水氣，諗起都有少少核突，不過我玩完之後都冇病，係污糟啲啫但都頂得順既~我都唔係限時夠未，但自己已覺得玩夠，就好努力又好乏力咁爬番過去「碼頭」，希望職員早啲幫我上番岸~哈哈，唔係唔好玩，不過真係試過一次就夠了﹗

好啦好啦，食嘢啦﹗到我哋食lunch時，其實已經過晒一般午飯時間，啲食肆都靜英英，我哋揀咗其中一間冇人既入去，見有日式又有泰式，應該都搵到啱小朋友食既嘢既~我哋叫咗牛肉飯俾兩姊妹分，我就自己食一個pad thai，day好似食咗咖喱之類~

小朋友又食得唔錯喎，做咗阿媽，佢哋食得乖乖我就食得安樂，自己食咩好似都唔太重要了，最緊要食得心情輕鬆~

我哋睇下仲有咩遊戲啱玩，仲有遊戲券未用完丫嘛~

原本想去坐下摩天輪，因為係Santorini Park既landmark嘛，點知維修中，就放棄啦~決定睇埋紀念品店就離開~

臨走影下啲影相位~

靚~

紀念品店有兩個亮點，第一係詩詩勁鍾意入面啲象象磁石，原本冇諗住消費，但佢咁鍾意就揀咗幾個俾大家做手信~另一件事係，啱啱Santorini Park有人拍戲，可能係Bollywood電影或者music video之類，總之有一眾跳舞印度男同埋一眾印度美女，美女們要列隊由紀念品店舞動出去樂園內的大街，NG咗好多次，所以班美女又出又入咗好幾次，關我哋咩事？班美女居然好鍾意詩詩﹗﹗﹗係咁話佢可愛，仲要同佢自拍影相，哈哈，所以係世界某角落，係某個陌生人既手機入面，有佢同詩詩既合照，嗰張相連我都冇~乜原來詩詩係印度人心目中係咁可愛架？﹗

唔知拍戲定拍MV~

跟住我哋就趁拍攝既空檔，閃過咗一眾演員，離開咗Santorini Park啦，估唔到我哋留咗係呢個景點咁長時間(瞓覺)，之後既行程可能會有少少趕lu~

Santorini Park官方網站：

http://santoriniparkchaam.com/

待續

前往其他泰國旅遊blog

Comments

comments