29-6-2019：曼谷華欣暑假快人一步親子遊day 1(part 2)．酒店開心upgrade、商場遊樂場Central World

的士一直係highway都好暢順，但返到曼谷鬧市範圍就塞得不得了，明明知道轉個彎就到都坐多咗幾個字，好在坐的士唔貴，如果唔係個錶都一跳一驚心~

好不容易到咗酒店，小朋友可以落地即刻非常開心啦~

今次book咗Grande Centre Point Rachadamri酒店，地點好、泳池大、family friendly又有遊戲室，其實最最最殺食令我即刻book既原因就係間間房都有洗衣機﹗﹗﹗我book既時候睇啲相覺得，普通Grand Deluxe Room張床好似仲大張過高啲級數既房間，所以即使我哋有四個人都冇book到價錢唔貴好多既各種suite，去到酒店，櫃枱職員好善意咁幫我哋upgrade咗做Suite Room~

張床冇得比較真係唔知，上到房係好大~

個view望酒店泳池又開揚~

附有洗衣機既廚房，更令人高興既係，原來部洗衣乾衣機同屋企嗰部一樣﹗簡直合埋眼都識開機~不過唔知呢間房係咪少人開部洗衣機，個乾衣功能唔太ok，好似我哋部洗衣機啱啱買番嚟時咁，乾完都仲要拎出嚟晾，好在我哋認識呢部機，知道佢係咁既，唔會失望同放棄，後來去完華欣再入住既另一間房部機就正常啲~

曉最開心係有浴缸~

不過放正係中間既King Bed有啲令人困擾~因為兩邊有得落床會瞓得更逼，怕兩隻嘢碌落床就要俾佢哋瞓中間，但偏偏兩隻嘢唔鍾意蓋被，我同day又要蓋被喎~打電話去guest service即管問下加床要幾多錢，1600 baht一晚真係有啲貴要考慮下，book多一間房都冇幾多錢之嘛~好在加床貴，我係度躊躇加唔加之際諗到可以打橫瞓，呢張正方形既King Size Bed打橫瞓雖然size一樣大，但可以俾詩詩bang埋牆就即刻鬆動好多，實在太聰明了~

試瞓成功﹗即刻開心晒可以去街lu~

始終兩隻嘢係飛機瞓得唔耐，又舟車勞頓，我只安排傍晚去睇下酒店附近既四面佛同埋行商場就算，原本有plan過去附近另一間酒店既Sky Bar睇日落，但都因為太疲累而取消呢項行程~

其實由酒店行過去最近既BTS站同大商場，呢個香火鼎盛既四面佛係必經之路，所以除咗day 1話去參觀之外，後尾都經過咗好多次~

最吸引曉既就係啲人俾錢奉獻俾個佛既舞，信眾俾錢後會向住四面佛合十跪係舞者前面，舞者跳舞時就誠心祈禱，仲有樂師即場演奏音樂伴舞~我哋坐係長椅，曉想睇完一個舞又一個舞，佢真係好鍾意所有現場表演，旅程之後有好多睇人唱歌演出既機會，次次都唔願走~

跟住我哋就過馬路去對面既Central World大商場了~

曉問過好幾次，點解泰國咁多樹既？呢個問題問得好好，土地問題囉~係香港，人都冇地方企…

原本想幫曉影，但佢唔理解我想做咩，合作唔到，都係要爸爸先work~

一入到商場就見到呢間賣bear bear熊同埋佢哋啲衫仔既鋪頭，真係唔買都睇下啦~我都暗地裡諗過，唔知呢啲衫啱唔啱我哋屋企既Dora同Daisy著呢(曉既洋娃娃)？

呢種程度就合作到既~

第一個任務係要換泰銖，因為市區既rate實在比起機場差太遠，所以係機場只換足夠出市區既錢，去到市區再換整個旅程需要既錢~曼谷既找換店真係好多，即使一次換唔夠，之後要再換都好方便~我哋target網上blogger推薦既Super Rich找換店，上到去商場4/F，有大量銀行同找換店，Super Rich個rate真係比起其他找換店略勝一籌，不過要排隊等8個，所以我哋都係放棄咗好少少既rate，去咗間唔駛排隊既換咗就算~

去搵餐廳食嘢途中都好多「障礙」架，因為個商場太多嘢玩~行冇幾多步又有啲公共空間俾人休息，行冇幾多步又有啲俾小朋友玩位，因為商場超大，可以有幾個唔同位置搞特別活動，又要停低嚟睇下人講嘢唱歌表演~

其實呢個係休息空間，不過設計到好似攀登架咁，好開心~

結果我哋揀咗一間靚靚既泰式餐廳，坐得好闊落~

因為餐廳同時serve西式menu，叫咗個Carbonara(曉口中既芝士麵)俾兩個小朋友食之後就好放心可以叫其他嘢~因為詩詩太攰要奶奶，auntie級侍應生誠意推介一款增奶湯水俾我，話所有泰國女人要餵奶都一定飲嗰款湯，其實詩已經去到多奶少奶都冇乜所謂既年紀，最重要係嗰款湯冇得走辣，我都係婉拒咗佢既好意，叫咗一款完全唔辣既菜湯等大家可以分嚟飲~

結果叫咗曉詩實啱食既芝士麵，auntie介紹必食pad thai，一款泰式香腸，嗰款唔增奶既菜湯，後來覺得唔係好夠，再追加一份青咖喱小食配脆脆薄餅~個青咖喱真係好辣，好在只係小食portion，如果唔係實搞唔掂~

食完再玩﹗難得曉肯去試下~

未夠班既詩都唔執輸~

呢個Sale吊飾好華麗呀~

免費波波池？﹗其實係化妝品公司既夏日專櫃，呢啲波波池係海嚟架~有空間可以咁樣設計，應該會令媽媽們駐足耐少少吧？

無論係講嘢定聽歌，曉都要停落嚟聽下~

另一個已經結束活動既舞台~

睇咩咁入迷？

又係另一場live show，呢個係介紹泰國國內某旅遊區既推廣活動~

食完之後，因為詩食得麻麻地，有諗過搵間超級市場買啲水果等佢食多少少嘢，但搵唔到~另一方面我同曉曉見到酒店房有個浴缸之後興緻勃勃，想搵下有冇得賣泡泡浴或者浴鹽之類既浸浴用品，但又唔係好覺眼~後尾放棄都打算慢慢行返酒店，一來商場太大要搵正確既出口唔容易，二來個商場太吸引，時不時有嘢令我哋停低，結果都晏晏地先返到去~