雖然話去泰國頭尾八日，但其實正式係曼谷係得兩個full day嘅啫，必去景點之中呢，一定要去Children’s Discovery Museum同埋Siam Paragon周邊嘅幾個景點，全亞洲最大水族館啦、Line Village同埋小朋友職業體驗Kidzania，我哋決定第一個full day先去Children’s Discovery Museum~因為趁住星期日，（如果有體力嘅話）可以順道去埋旁邊嘅Chatuchak週末市集丫嘛～
一日嘅開始當然係酒店自助早餐開始先啦~
曉就簡單啲，有麵包有蛋就ok，加上佢又鍾意食沙律菜同埋各種水果，完全唔需要擔心，有芝士就錦上添花喇～問題係個揀飲擇食詩，麵包又麻麻地，係外國邊度搵到啲港式湯通粉俾你呀，佢向來鍾意飲湯，呢排又鍾意學用匙羹，原來泰國人都常食類似粥嘅湯飯，今次旅行佢就朝朝食粥，係我哋之中口味最中國人嘅中國人～Grande Centre Point Rachadamri嘅自助早餐，除咗西式、泰式食物之外，居然有好多日式食物同埋少量中式食物，不過熱愛奶黃包嘅曉表示，香港啲奶黃包好食啲～我每日必捧場嘅就有廚師現煮嘅雞蛋station、salad bar同埋切成小粒嘅水果沙律，泰國真係農業大國吧，各種沙律菜同水果都特別新鮮，每日都食好多，所以去泰國旅行呢段期間都特別暢通~我哋住呢間酒店期間都盡量揀坐窗口位食早餐，小朋友快食完可以落地玩，我哋再慢慢歎~
今日去兒童發現博物館，係咁多日之中唯一一日搭咗公共交通BTS，如果大人由酒店行過去最近既BTS站就一啲都唔遠，拖住曉揹住詩行都唔算遠，但玩到好攰，兩個人抱住一個曉一個詩加一個大背囊時，就會埋怨曼谷擠塞既交通，妨礙咗你搭的士，然後搭番BTS再行番嗰段路~離晒題添，講番我哋行程啦，我哋由酒店既Mo Chit搭八個站去到Chit Lom其實都係十幾分鐘，之後行幾分鐘就去到啦~
行去BTS站，路經四面佛，曉又話要睇人跳舞~
路上經過麥當勞，去泰國一定要同泰國麥當勞叔叔合照﹗我叫曉一齊合十影相，詩又望下家姐做緊乜~左邊嗰張係曉曉既大作~
今次去泰國旅行，適逢新泰皇登基冇耐，到處都掛滿泰皇既大相，有時仲有埋皇后添~
嗲嗲曉~
其實行去兒童發現博物館途中，已經會經過Chatuchak Market既外圍~
影下個招牌先~
一朝早啲熟食檔已經開門招攬客人lu~我哋就快快經過，玩完先出嚟逛~
曉話呢條柱好似唇膏，所以佢係度搽唇膏~
到咗兒童發現博物館啦~
離10點鐘開門仲有少少時間，已經有唔少家庭係門口等緊啦~一到十點就紛紛登記入場lu，博物館入場費全免，但就要登記證件號碼同大人小朋友人數~
一入到去最吸引一定係玩水區同埋繩網陣，原來玩水區分三個時段開放，我哋其實都為咗玩水帶定替換衫，但好似冇理由一嚟到就玩到濕晒先，所以決定先玩乾爽區~
個繩網/攀爬區都俾大人陪入去少少，但無奈我哋嗰個係細膽曉，唔肯爬上去啲睇落有啲難既嘢，所以好快就離開呢個區~
只夠膽玩少少~
後面有個for細個小朋友既攀爬區佢就願意嘗試了~
都係熟悉既玩意令人感覺安全啲~呢款仲可以同詩詩一齊玩添~曉，唔好搖得咁勁呀~
玩咗一陣，決定入去室內玩，原來每間房分開唔同年齡組別，簡單嚟講就係bb組、幼稚園組同埋小學組，而且每節限入場人數，可能見我哋一家人啦，好在佢又俾差不多一歲半既詩詩一齊入埋去2-6歲遊戲室~入場要除鞋，係香港，多數會除低對鞋係門口既鞋架入去玩嘛，呢度呢就會派個索繩袋俾你，自己放對鞋入去，自己保管對鞋~呢個遊戲室大就唔駛講，其實主要係有唔同場景既各種體驗，仲要有埋衫俾你著，警察、消防員、美髮師、獸醫、空姐、飛機師、農夫、記者、收銀員等等…一節時間都未必夠玩晒咁多樣~如果有差唔多年齡既朋友仔一齊嚟玩應該仲開心~
呢個微型城市原來叫Rainbow Town~
我同曉影完，詩就自動走埋去影~
有教育意義既小鎮~
首先最吸引一定係小火車啦，又可以做司機，又可以做乘客喎~
其實曉不嬲都好鍾意超級市場，不過可能因為今次有其他唔識既小朋友係度，佢好快就出咗嚟~
大家一齊美髮~
曉醫生~
曉曉上電視呀~其實曉好少睇新聞，不過佢睇過一齣Peppa卡通片係關於停電既，嗰次Peppa搵咗個紙皮箱，開個窿，呢埋係入面報導新聞，曉就知道報導新聞要坐得好端正，個樣要好正經咁款~
我覺得呢個真係最搞笑，特別係詩詩空姐，不過佢一戴頂制服帽就想除囉~
招呼客人~
曉就扮得似模似樣~
跟住一齊做乘客~
仲有爸機師同曉機師~
小農夫~
消防員呀~
一節完咗我哋一定要離開呢個遊戲室，就去睇下其他地方~另外有一座三層既建築物，入面好似主要係同自然科學數理有關既內容~
地下有恐龍展館，恐龍迷小朋友一定鍾意得不得了，但我哋兩個都係女，唔單止對恐龍冇特別興趣，嗰啲會郁會叫既假恐龍仲令佢哋驚驚，行都唔肯行過去，變成對外面有個可以掘化石既沙池都冇興趣玩了~
睇完恐龍尤有餘悸，要摸肚肚定定驚~
呢楝building入面有多個小組活動，有啲做實驗啦，有啲做手工啦，甚至連烹飪堂都有，我非常有興趣呀，不過曉唔夠年齡，而且佢都未必肯自己入去玩吧(可能就係因為四歲未夠獨立，又未夠能力玩，先將年齡限制條線定得高啲)~
我哋就搵啲可以一齊玩既嘢啦~原本想去砌大Lego起屋，不過上一節未完，等候期間我哋去咗個小舞台~
有啲動物帽俾你戴嚟影相，仲可以上去個小舞台度搵雞蛋(？)，莫非呢個係出自一個泰國著名既兒童故事？
我哋就唔知點解要搵雞蛋，但兩個小朋友就係個舞台度自high，詩詩就好似跟屁蟲咁跟住家姐行出行入~
夠鐘我哋就去砌大Lego啦，入場時職員講定，大家大概砌到幾多點，要預留時間收拾，Lego要跟番顏色、size放整齊，我覺得呢個係非常好既教育，去遊戲室玩，好多時大家都會玩到亂糟糟，幾好玩都會變成唔好玩~
兩個充滿幹勁既地盤工友~
我哋花咗啲時間著建築工人既衫嚟影相，慢咗少少，拎唔到起屋既門，不過都ok既，只有大大小小既積木，都可以起到一間有門有窗既屋既~我懷疑起屋起得最起勁既，可能係我同day囉，當然曉同詩都玩得開心啦~
其實玩咗咁耐佢哋兩個都冇乜電，要瞓下，但博物館入面又冇適合瞓覺既地方，要食午餐其實要出番去外面~其實要玩既大多數都叫玩完，係冇玩到嬉水區啫，所以同曉商量一下，不如我哋食嘢、返酒店午睡，跟住係酒店游泳池游水啦，佢都同意放棄嬉水區~想佢哋乖乖食埋午餐先瞓，首先要飲嘢提一提神，我哋出去拿拿聲買咗個椰青，飲咗先講~
我哋再經過Chatuchak Market外圍時，聽到其中一間酒吧有live演奏既聲音傳出，如果食物都啱食，似乎係好既選擇喎，曉最重要聽live~下一blog再講啦~
待續
前往其他泰國旅遊blog