7-6-2019:世界夢號家族海上假期day 1(part 2).蝸牛登船、衝鋒自助餐、夜夜笙歌

原來check in好、領咗船卡之後都未可以登船,因為原本郵輪上既乘客落船後,有好多好多房間要整理,又有其他嘢要預備吧?我哋各自去領取郵輪公司提供既包點同埋清水之後,落番去最底底嗰層度一齊食嘢,有甜包(好似係豆沙?)同鹹包(好似係菜肉?)~

但比起食包,三個小朋友可以一齊玩就更高興,有空間可以跑跑跳跳,有大人可以陪佢哋玩就最開心~

呢啲時候,我哋就會俾人笑:「你哋可以生多個喎~」…

七點零鐘我哋開始去排隊登船,因為唔同房型排唔同登船隊伍,所以我哋四個就同其他人分開了~太婆向郵輪公司借咗輪椅,始終九十幾歲老人家要排咁耐隊,同埋係咁大隻既郵輪上面走動都會好辛苦~好在太婆有輪椅,又好在我哋寄咗行李﹗真係估唔到排隊登船排咗成個鐘﹗﹗打蛇餅不特止,仲要好長時間條隊完全停頓,唔知發生咩事,又冇職員出嚟解釋,乘客都數度鼓譟,我估都好大係呢個原因,令day今次覺得「郵輪唔好玩」,上次去海洋神話號真係好好架,我哋下次去番Royal Caribbean既船啦~再試多一次啦~打blog時我專登search番當日既whatsapp記錄,我哋應該由七點幾排排排到八點幾先上到船~條隊唔郁時點樣安撫兩個小朋友呢?我講咗帶嚟既故事書講咗好多次啦,又出動餅餅啦,又唱歌啦,我個心又急得不得了,又擔心佢哋未食晚飯就會好眼瞓,好不容易終於上到船了~

上船lu,yeah~

下一個難題係,搭唔到lift上艙房~似乎大家都嚟過同一隻船好多次,唔知點解其他乘客咁熟路,我哋都未orientate到自己位置時,大家已經直奔船頭船尾兩邊電梯大堂搭電梯~我哋後知後覺,拖男帶女行動又慢,入lift動作又慢,唔知同大伙兒既進度會唔會相差得越來越遠~

100個邱曉﹗

長長既走廊~

不過嘛,去到我哋既露台客房就即刻開心晒了~

個露台好大呀,個夜景好靚呀既聲音此起彼落(應該係我同曉兩個既聲音)~

無敵香港夜景~

呢個時候要聯絡番另一team先,因為房間係唔同樓層唔同位置,其實佢哋都分開咗三個小隊啦,船入面收電話收得非常差,要出去露台先勉勉強強收到少少,我哋盡量定個目標,希望去自助餐廳度集合食晚餐~難怪後來同朋友講起時,佢哋話,多人一齊去郵輪要帶定walkie talkie架~郵輪其實有收費wifi,但都真係幾貴,好似唔太值得,所以我哋回歸90年代既生活就好,約定時間地點,不見不散囉~

估唔到既係,原來個自助餐廳非常大,又有室內又有室外座位,我哋剛剛抵達時人唔算多,室外座位仲可以坐埋一齊,但好似溝通有啲失誤,搞到冇咗啲位,anyway,結果都人人有得坐低食既,不過就分開兩枱囉~

鍾氏坐一枱,胡氏坐一枱~

自助餐既印象非常一般,食物種類唔算多,質素都平凡,最激氣既係,居然連雪糕都要額外收費﹗

圖為房間望出去既海

好似係我哋食嘢期間,郵輪啟航了,不過今次呢個三日兩夜之旅其實只係駛出公海,冇目的地架,純粹享用船上設施,其實淨係望住海都好舒服丫~

食飽飽之後,「大人們」決定要係郵輪上周圍逛逛,我哋同埋兩個小朋友決定早少少返房沖涼瞓覺,因為其實食完晚飯已經一啲都唔早啦~

不過郵輪當然係夜夜笙歌啦,我哋決定刻意經過幾個表演台既樓層返去艙房~

興緻勃勃gogogo~

曉詩對於各種表演都非常著迷呢,無論係懷舊金曲(「夜來香」嗰啲)、舞蹈表演、吵吵鬧鬧既互動遊戲都睇到好有興趣唔想走~

懷舊金曲

其實影咗video,動態的話可以見到邱曉跟住音樂扭動身體~

呢個吵吵鬧鬧既節目其實我麻麻地,不過…

有人睇到好專心

正好爸爸媽媽可以休息下~

同埋自拍下,曉係完全唔知我哋影過呢幾張相囉~

我哋返到艙房,三母女一齊沖涼,曉好鍾意呢套兒童用品~

爸爸接到職員既電話問駛唔駛幫手鋪加床,爸爸其實自己已經打開咗張梳化床就拒絕咗,第二晚有鋪好咗俾我哋先知原來真係舒服好多,早知鋪啦~

曉詩都要黏住我瞓,冇辦法啦,女子組瞓真正既雙人床,男子組(成員一名)就瞓梳化床,養足精神第二日要玩玩玩啦~

待續

前往其他遊輪旅遊blog

Comments

comments

發表迴響

你的電子郵件位址並不會被公開。 必要欄位標記為 *