27-12-2018:台北+北投溫泉2+2之旅day 1(part 2).北投亞太溫泉飯店

當車由高速公路轉行local小路+開始上少少山,附近又睇到好多「溫泉」字眼同標誌,就知道就快抵達我哋將會入住兩晚既北投亞太溫泉飯店了,咁多間溫泉飯店之中點解會揀中呢間?我諗最吸引我既係日式房間同埋靚靚既房間內既私人浴缸溫泉池吧﹗瞓日式塌塌米最大既好處係,唔怕詩碌落床,無限大既「床」可以俾大家瞓晒出界都得,仲可以當去咗日本旅行,呢度房價已包早晚餐,而大眾風呂又係分開男女既裸湯,更加似日式溫泉旅館~今個trip我既期待台北超多既親子景點,另外一樣好期待既就係溫泉了,上一次曉16m去北海道嗰次(請參閱:30-8-2016:北海道三人行day 3(part 3).心のリゾート 海の別邸之食好啲、住好啲、開心啲)到而家好耐冇浸過溫泉啦~

酒店lobby係7/F,我揹住詩辦酒店check in手續時,兩父女就影下聖誕樹,坐下lobby既梳化咁,兩個係咁話「好靚呀好靚呀~」輕鬆又開心既對話令我感覺終於放假lu~

未瞓醒既呆呆曉~

Lobby既大聖誕樹~

我哋既房間係2/F,三個女孩子都好興奮,因為浴室有大浴缸好興奮,因為有免費水果曲奇餅minibar好興奮,因為有四件浴衣好興奮,因為搵到電視遙控好興奮…

透過agoda.com book房後,酒店打電話過來確認小朋友既年齡、性別,話會做好準備,又講到雙人房嚟講住兩大兩小會比較細,其實間房都唔細丫,夜晚酒店方面仲主動幫我哋鋪咗三張床鋪添~

有大浴缸好興奮,雖然當時曉都冇打算自己要浸~

連詩詩既浴衣都準備咗丫﹗

詩好快搵到個遙控﹗day成日都叫詩去佢公司度返工,咁就有得成日玩遙控啦~

酒店提供既水果同曲奇餅﹗仲會每日更新呢~結果嘛,雖然有complimentary既minibar,最後一次都冇飲過~

房間好舒服,時間又早,我哋都唔急住出去玩,搭飛機時冇出動過既「娛樂袋」反而而家出場了~曉曉學校平時冇乜功課,但長假期就會有少少功課,今個聖誕新年假要做7頁「創思維數學」,既然回程返港已經係假期最後一日,唯有帶埋嚟做啦,曉有得做功課都不知幾高興^^”~

火速做完功課,就繼續畫圖畫同蓋印仔,不亦樂乎~小朋友開心自己玩,大人終於有靚靚心情甜蜜自拍~

詩詩有遙控係手就好高興,反而對於第一次食既大人餅餅反而唔算特別雀躍~

day?咁舒服梗係想瞓啦~

未到晚飯時間,我哋決定去1/F睇睇,1/F有泳池同埋各種遊樂設施,其實啲設施反而係for大個少少既小朋友/青少年同大人,有好幾款VR遊戲,又有day鍾意既氣墊球同足球機,不過原來個DIY教室冇堂上時係自由進出既,入面好多玩具就啱細個既小朋友玩~

先玩氣墊球~

遊戲室入面人人都搵到自己鍾意玩既嘢~哈哈~

女孩子當然鍾意玩煮飯仔啦,不過今次曉曉既guests係…恐龍﹗因為恐龍有大有細,曉不嬲都好照顧啲bb既,仲會提佢哋食嘢前要洗手,真係好可愛~I mean阿曉…

兩姊妹都唔嫌棄啲恐龍~

詩詩,你自己係咪玩具?

我哋都玩到差不多到晚飯時間~

晚飯係半自助形式,兩個大人一人一份主菜,沙律、前菜、湯、白飯、水果、甜品就任食,仲有幾款熱菜添,所以四個人都實食得飽﹗

有曉細個時去旅行既經驗,我哋一早立定決心俾11個半月大既詩詩解禁,俾佢跟我哋大人食嘢算數,冇額外準備食物了,尤其佢中途出家行BLW,除咗食完要幫佢清理現場之外,總算食得輕鬆啲~

主菜係牛扒同大蝦~

我哋仲有個好幫手—-曉家姐,兩姐妹早啲食飽飽可以兩個自己玩,我哋就繼續jap jap jap,點解去旅行都真係大食咁多既呢?呵呵~

食飽返房就到沖涼環節了,詩已經好攰,加上係陌生環境,即使安排咗bb浴盆佢都沖到喊晒,所以我同day盡快幫佢離開現場著番好衫,跟住我幫曉沖涼時就開始放定溫泉水係浴缸,諗住之後到我沖完就浸得幾耐得幾耐,即使兩隻嘢唔俾我浸都可以留俾day浸~曉嘛,我對佢都冇乜期望,佢一向沖涼啲水沖得好凍,暖少少既水都唔鍾意,出發前佢自己都到明「但係我唔浸溫泉喎」,所以都唔預佢會浸~點知,幫曉沖完、著好衫,我自己沖完、跳入去大浴缸後,我邀請曉嚟浸腳,佢又肯喎,隔多一陣佢仲主動要求除番衫入嚟一齊浸添﹗

實在太好啦~生咗個女之後,我既其中一個願望,其實係同佢可以一齊浸溫泉,上次曉16m去北海道嗰次佢完全唔想浸我都冇佢乎,估唔到三歲半就可以實現願望了~不過都唔浸得耐,因為詩詩要瞓覺啦,個溫泉就交俾爸爸慢慢歎啦~

其實好想影張四個人著晒浴衣既合照,無奈詩已經等咗好耐超眼瞓,相中詩已經奶奶ing…

雖然浸咗舒服既溫泉,又有寛敞既房間,啲b半夜要係咁醒同係咁嗌真係同呢啲冇關係,媽媽既生活就係半夜不停醒,算啦,好在有得瞓晏覺,我估我既睡眠質素都要等多兩三年後先有得改善番架啦~

北投亞太溫泉飯店網站:

https://www.apresort.com.tw/

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *