28-12-2018:台北+北投溫泉2+2之旅day 2(part 1).北投小散步

我估大多數人去住北投既溫泉旅館都係住一晚,但今次我決定要住兩晚,主要係帶住兩個細既小朋友,一來唔希望行程太趕,二來想盡量keep到佢哋正正經經瞓晏覺,唔瞓晏覺又會好易病,又會唔好老脾,又要爸爸成日抱,所以day 2既行程只有上晝,下晝既重點項目就係返酒店瞓覺喇﹗

瞓醒梳洗後我哋又去返先一晚既酒店餐廳食早餐,早餐冇分兩個時段入,都要等一陣位,我哋唔趕行程嚟講都冇乜所謂啦~自助早餐選擇都多,曉有麵包有蛋有芝士就好滿足,詩暫時都仲係難啲捉摸,可能夜晚食奶食得多,早餐食量唔算多,但今次第一次俾豆漿佢飲,佢超鍾意呢~

day 1既blog介紹酒店房時都唔記得講個廁所,係日本人首創嗰啲溫熱噴水廁板,每次去個廁所時曉都大讚好溫暖好舒服,佢就叫做第一次經歷呢啲廁板,我當然以前有坐過啦,但從來都唔敢用個洗pat pat功能,但係曉不停讚不停讚既時候就引發我試下洗pat既好奇心,我又記得我有個表哥當年一試就愛上,仲要後來自己買樓之後要安裝一個(話晒香港其實唔算普及),我都係一用就覺得好舒服了,暖暖地,感覺乾淨過用廁紙好多丫﹗不過暫時未有自己層樓,未有機會安裝一個係屋企住~

同曉講今日會去地熱谷、溫泉博物館、北投圖書館,佢就想skip晒其他景點,直奔去圖書館了,咁我哋都要睇下邊度順路啲家嘛~由酒店出去北投既景點帶算係步行距離,我哋問酒店櫃枱拎咗張散步地圖就出發了~

曉曉因為好鍾意睇「愛探險的朵拉」故事書系列,入面無論去邊都要問地圖,加上今次搭飛機睇埋卡通片,入面「the map, the map」仲要有歌唱添,所以佢就爭住要拎住張地圖(又唔識睇)喇﹗今次我哋冇買定上網卡去旅行,沿途只用餐廳、景點、酒店既wifi嚟上網,同埋後來有其中一日啟動過Smartone既流動wifi囉,所以冇得時時跟住Google map嚟搵路呀,張地圖係真有用~

今日一直落住毛毛雨,幫曉著咗雨褸,佢可以行得自由啲,好在啲雨冇大過,未去到濕身既程度~

曉話幫爸爸影,點知有人就冇景,有景就冇人~哈哈哈~

好靚既彩色玻璃~

我哋由山上既酒店群,慢慢散步落到去景點附近,先去地熱谷~

地熱谷入口

地熱谷就係溫泉池,肉眼都見到啲水有滾起既氣泡呢~

曉本來冇乜特別興趣,但我同佢一齊hello啲煙佢就開始興高采烈了(hello啲煙係佢教我架,佢有時會hello食麵時、飲湯時冒起既煙,我都唔係太明點解…)~

一家四口,齊齊整整~

地熱谷風景

曉興致勃勃幫大家影相~

跟住我哋沿住溫泉水既下游方向行,搵到北投溫泉博物館同埋北投圖書館﹗

周圍都有溫泉標誌呢,有種去咗日本溫泉小鎮既感覺~

北投溫泉博物館,左下為攝石曉~

溫泉博物館入館要除鞋換拖鞋,最細既小童拖鞋都太大,曉索性更free地就咁著襪行~

因為要換拖鞋,入場要排少少隊~

始終3歲半未識自己睇博物館既展覽,我哋要好似睇繪本時咁引導佢睇,曉帶咗兒童相機嘛,當佢知道睇緊啲乜時就有興趣樣樣都影下相了~博物館入面有講下北投既特產、溫泉既發展歷史、以前啲人浸溫泉既用品等等,內容都幾豐富~

不過三父女最鍾意既應該係中間既超大塌塌米吧,好通風好舒服,day即刻忍唔住瞓低,但係一秒後就俾工作人叫番起身,可能真係環境太舒服,博物館又免費入場,怕有啲人真係係度瞓覺吧?

關於溫泉既展覽模型~

點解我同詩冇既?

小浴池

大浴池

好靚既彩色玻璃

我哋借埋個育嬰室換片片就進發去北投圖書館了~

臨走影番個招牌先~

仲有個門口﹗曉呢?

北投圖書館之所以成為景點,係因為佢好藝術性既建築外型~

好似隻船咁~

附近環景都好舒服~

圖書館外面睇落好宏偉,但入到去原來空間唔算大,我哋上咗2樓一轉都搵唔到兒童書藉,再兜番落去先發現原來係地下1樓,不過時間都晏,小朋友要趕快午餐同埋返酒店午睡,所以我哋匆匆忙忙睇咗兩本書就走啦~

知道兩隻嘢都又攰又餓,我哋直接走入馬路對面既一間日式家庭餐廳~

雖然冇bb櫈,但卡位坐得都算舒服,菜單睇落都啱食,但真係…等—-得—-太—-耐—-﹗其實客人真係唔算多,可能認真製作吧?要搵好多玩意娛樂住大細兩隻先可以keep住佢哋唔好嘈到其他客人~攰死人~

好在,三文魚同雞都好味,曉個兒童餐都好精美,佢食得好開心~

仲有甜品添呀~

亦幸運地,食飽飽之後一出門口就有的士啦,大家已經冇能力行路返上山上面既酒店了,上午行程完滿結束~

北投溫泉博物館網站:

https://hotspringmuseum.taipei/

前往其他台灣旅遊blog

Comments

comments

發表迴響

你的電子郵件位址並不會被公開。 必要欄位標記為 *