今次打八號風球真係後知後覺,因為冇睇電視又冇留意新聞,尋日鬼咁大風以為係天氣轉涼時嗰啲甚麼季候風,點知係Facebook見到有人講甚麼又打風先知原來當時已經係三號風球﹗星期日嘅早上變成八號風球,冇得返教會,留係屋企除咗諗下煮咩打風餸之外,最好就係執下嘢﹗
上次好似未正式話俾大家聽吧,我肚入面嗰個係妹妹嚟㗎~知道呢個消息之後,我家姐就好開心咁執好逸逸bb啲舊衫拎俾我,咁佢又有空間可以接收曉曉嘅衫啦~到呢一大堆衫嚟到我度嘅時候,雖然只係0-6m嘅衫,但已經有四大袋丫﹗﹗﹗﹗因為集合咗穎彤表姐穎妍表姐嘅衫、Gabby表姐Rebecca表姐嘅衫、曉曉嘅衫、再加上逸逸bb嘅衫,真係超級墟冚﹗﹗
我揀揀揀揀揀,執執執執執,揀咗一兩個鐘,筋疲力盡﹗終於分好晒啲衫~我哋fufu嘅和尚袍、包pat衫(我咁樣稱呼bodysuit)、連身衫、保暖連身衫、保暖袍仔、出街衫⋯仲可以分到三大袋送俾人哋嘅bb呀﹗﹗
到天氣變好,我就要逐少逐少洗乾淨啲衫啦~(仲有曉曉當季嘅冬天衫同埋冬季校服要洗呀⋯^^”)
前往其他懷孕扎記blog