Facebook上見到朋友講玩緊手機遊戲「菇菇巢穴」，話好可愛，又話原來遊戲入面嘅菇菇都有住屋問題，引起好奇心之下，我又開始咗我嘅菇菇巢穴，果然幾好玩喎，heehee～
免費download咗落嚟之後玩緊第四日，cap張圖時玩到level 19，呢一刻已經level 22了，我仲邀請埋day一齊玩﹗其實我覺得呢個game應該係家姐會鍾意玩多啲，但估唔到我介紹咗老公玩之後佢又一齊玩咗呢幾日，可以交流一下，雖然個game玩法好簡單，所需技巧唔多，但佢啲意見都好值得參考丫～
簡單嚟講，我幫菇菇們建立佢哋嘅社區，並令佢哋變得更加壯大、更加繁榮～要起各種設施啦，啲菇菇好努力工作，佢哋住嘅屋企同埋好好休息嘅地方都唔可以缺少，要發展農業、工業、採礦啦，要招募新血啦，又要裝備啲菇菇以加強佢哋嘅能力啦，要做到以上嘅咁多樣嘢又要賺錢啦，好忙丫﹗其實個game免費，要花嘅就係時間同心機﹗﹗要做嘅決定就係點樣取捨，究竟你想先打好基礎丫，定係想盡快升level呢？同一塊農地，究竟幾時種麵粉菇幾時種粟米呢？告示板上有徵求嘅物資時，究竟賣礦物賺錢好啲定係賣農產品賺錢好啲呢？
老公inspire咗我嘅部份，係佢話要執一執好啲位，因為菇菇去採完礦會好攰，要將佢哋個別菇菇嘅屋企同埋休息設施放係礦場旁邊，令佢哋盡快恢復元氣(暖男？nonono，等佢哋恢復元氣之後再盡快去做其他工作呀，係無良僱主至真⋯哈哈～)﹗一啲菇菇唔需要經常出入嘅設施，好似巢公所、劇院、帽子店、飾品店等等就盡量放係遠離主要通道嘅位置，目的都係增加佢哋嘅效率﹗至於佢提及要唔要遣散部份早期嘅菇菇，以提供機會俾能力更高嘅新血菇菇，我就唔認同喇，呢片天下係大家一齊打拼出嚟家嘛，我對於我早期嘅成員菌太、菇之助同埋嗯哼吉都好有感情(所謂「早期成員」其實都只係講緊四日前﹗)，要加強佢哋嘅實力咪幫佢哋造帽造飾物囉，不過嘛，要比的話，無論係體力定係能力，佢哋都只係新成員莢、川崎嘅一半左右，你哋要加油呀﹗
我最新嘅工作？上頭話要製作仙人掌牛奶喎～吓？﹗知道啦﹗我會好好安排菇菇們去洞穴取水製作㗎啦～