7-8-2017:細bb懷孕扎記16w3d.健康院產前檢查(2)

諗唔到多一個有趣少少嘅標題添⋯一般嚟講健康院嘅檢查係我呢個週數應該係六星期檢查一次,但上次我嘅體重比起懷孕前輕咗2-3kg,所以今次約咗四個星期就要覆診了~其實上個星期先有去過好朋友Helen嘅診所,佢幫我照過超聲波我見過fufu,生長、心跳都正常,所以都冇話特別掛住佢,所以今次檢查都算好淡定~

我比較關注嘅係曉嘅表現,既然第二次嘅檢查簡單咁多,我都索性唔搵人幫手睇住曉,帶埋佢去算啦,反正健康院都係佢去慣去熟嘅地方~最重要最重要嘅係--瞓醒覺先好去﹗為咗令佢appointment嘅2:45前要瞓醒覺,我花費嘅工夫就係上晝帶佢去遊戲室放電,約埋Mandy姨姨同愷揚一齊去就仲開心啦,玩完一個45min嘅session之後再去圖書館,果然攰啦攰啦~不過嚴重咗少少嘅係,攰到要叫佢走同埋同佢去換片都有啲困難,已經變成一pat曉~

果然我哋搭西鐵返屯門時已經瞓著,我攬住瞓著嘅曉,我哋一齊食埋個lunch,Mandy食飽飽走先佢都仲繼續瞓,唔得啦,到2:15呀,點都要走啦,我埋單再抱佢行出去都仲唔醒,總共瞓咗差唔多兩個鐘﹗抱到差唔多去到健康院先醒~好在佢都有義氣,一醒咗都肯落地行~曉,冇辦法啦,食飯時你又瞓覺,你今餐只有得食包包咋~(曉可能心諗仲好)因為去到健康院曉一直食包and食包,我帶去嘅曉曉娛樂都冇出動過就完成檢查了~雖然叫做得個揹字,都好嘅~

檢查應該叫做分三部份啦,首先係磅重量血壓驗小便,聽到叫名之後自助入去房度磅重,之後姑娘幫你量血壓,然後再自助驗小便,俾姑娘望一望張試紙就ok~今次要準備帶小便去都有啲論盡,姑娘話可以去藥房買個膠樽仔,我去藥房都買唔到,上次用過個Materna樽又掉咗咯,結果去Miniso只有30ml嘅細樽仔,將就啲用住先啦,如果唔用呢個就要用屋企啱啱用完嘅意粉醬玻璃樽,會唔會未免大個咗啲?﹗用個30ml樽仔嘛,test嘅時候係ok的,但collect小便時⋯有啲污糟,因為個樽口太細了~我下次都係要再諗辦法,不如都係用下一個materna樽啦~

第二個station係摸肚聽心跳,呢part我係之前未經歷過㗎,因為曉嘅時候,睇完第一次我就去屯門醫院覆診了~唔怪得之啲丈夫們唔可以入去啦,原來係超級流水作業嘅狀況~呢間房就係平時bb檢查嘅日子時磅重、換片嗰間房,產前檢查嘅日子呢,換片枱就變成檢查枱,所以特別高,上落要小心~入面床有兩張,用布簾隔開,然後外面就有八個太太坐住排住隊等入去檢查,一個入去布簾裡面,之後大家自動移動上前一個座位,非常自動化嘅設計~曉曉果然係27m差唔多28m嘅家姐仔,我等候時、我檢查時佢都非常合作,又唔會周圍亂走,又唔會扭要我抱或者黐住我,可以乖乖係旁邊等候,姑娘仲特登俾bb心跳佢聽呢,之後我哋再講起時曉都識得講有「噗噗噗噗噗」,同埋「今次唔係照bb」~

最後一部份就係見姑娘面談了,基本上我又冇咩特別唔舒服,又冇咩特別問題想問,姑娘逐一解釋咗之前嘅驗血報告,唐氏screening嘅報告之後就完成了~可以去預約下一次啦﹗

bb好乖,要繼續健康成長呀~你幾時真正郁俾我感受下呀?(呢幾日有啲疑似疑似嘅胎動,但又唔係好持續地日日感受到,可能都唔係住啩?)曉曉就好叻女~下次媽媽再去檢查時你已經返緊學啦~

前往其他懷孕扎記blog

Comments

comments

2 關於 “7-8-2017:細bb懷孕扎記16w3d.健康院產前檢查(2)” 的評論

  1. 我個時係先用紙杯接,再倒入小樽,紙杯沖洗完留番下次,始終帶小樽出去方便好多。

    • 我已經掉咗上次個超小樽,因為自己都唔想再咁勉強咁痾尿入去同埋洗個超小樽,我諗我之後應該都係重用個materna樽啦,始終個口闊少少~

發表迴響

你的電子郵件位址並不會被公開。 必要欄位標記為 *