之前見到人哋用Bruno其實都有興趣，不過覺得屋企咁多嘢邊有位擺丫，又覺得自己未必好堅持用落去，所以都冇諗住要買～早排行書局時見到一本Bruno嘅食譜，一揭就不得了，愛不釋手，好想自己都整下呢啲美食～同老公講起，佢居然又冇潑我冷水喎－－「買囉～」咁⋯我就買咗喇﹗其實對於顏色我都冇乜太大強烈嘅要求，當然有我喜愛嘅粉紅色就梗係好啦，其實其他色靚都ok，不過我唔知點解俾個百老匯sales sell咗我買咗Winnie the Pooh特別版，哈哈～本來明明話買普通家嘛，我又唔係特別鍾意Pooh Pooh～因為想用嚟整各式各樣嘅食物，所以其他烤盤我都一次過配埋lu～
anyway，買咗返到屋企當晚就試機了﹗其實拎啲嘢太多已經冇辦法額外買餸，就住屋企有嘅剩餘物資，決定整個一鑊熟白汁意粉～上網啲人教整一鑊熟嘅白汁意粉，意粉：水：牛奶嘅比例係1:1.5:2，即是100g意粉就用150ml嘅水同埋200ml嘅牛奶嚟煮，除咗跟呢個配方之外我就freestyle啦～洋葱啦、少少蕃茄啦、薯仔啦、蘑菇啦、莎樂美腸，其實最後仲可以加啲芝士，不過後來唔記得咗加～
開始煮lu～因為廚房冇位擺，係廳度煮仲熱鬧～
好開心﹗
原來熱力都幾夠，開頭炒啲洋葱好快就好香lu，成間屋都係香味～(係咪好事？﹗)材料全部略略炒好之後，加啲水同牛奶，落埋啲天使麵落去，就可以由得佢一鑊熟啦～平時煮意粉要先烚好，又過冷河又再煮汁都幾多步驟，用呢個一鑊熟方法，成件事即刻變得好簡單，煲都洗少隻，仲可以直接上碟添～
效果都ok㗎～太簡單了﹗又好味～曉好快速食晒我俾佢嘅成碗呀﹗呢個人仔真係食麵就食得勁快，飯就慢好多，你係咪西人？
之後嘅星期一我跟住食譜整咗個「法式燉雞」，其實都唔太忠於原著，所以都無謂影相or打blog了，當珍珠洋葱變成普通洋葱，百里香+bay leave變成雜錦香料mix，上湯變成史雲生瑤柱雞湯，又skip咗人哋個蘋果白蘭地時，似乎唔太法式了～好在我有我永遠嘅支持者－－食飯最乖嘅老公﹗乜都幫我食清光，抵錫～
題外話，因為買咗Bruno返嚟，好多好靚嘅紙盒，曉好興奮咁話「好多禮物呀，呢份可唔可以俾我」同埋「多謝」之外，兩父女仲用紙盒嚟打鼓，打個不易樂乎，不過兩日後因為間屋實在太混亂，除咗曉最愛嘅紫色之外，其他俾我掉晒啦～