由知道香港會開大樹先生開始，其實一直都好想去試下，初初開幕時book到好爆，聽講連電話都打唔通，仲要一book就book三個月後嘅期，有啲人仲話要去現場book先book到，搞到我打退堂鼓，都冇堅持到底要去玩～早個禮拜本來大學housemate Helen約我帶埋大家啲女一齊去，話book到下午茶時段，點知曉又好唔爭氣咁病咗(而家啲菌已經由曉傳到去爸爸嗰度了～)，冇得去～但挑起咗我條筋又想去試下﹗上Openrice個app，原來可以app內book枱﹗不過似乎只限制咗少量嘅枱係呢度呢，因為我見到成個八月都冇晚市嘅枱，但星期一嗰日我哋去到現場又仲book到～結果要短期內book到枱，我哋幾個媽媽覺得早餐時段都係好主意，又唔駛就啲細路瞓覺嘅時間，早上佢哋又精神啲，玩到中午冇電又可以返屋企瞓覺～
早上時段係9:30至12:00，因為要晏少少先食到早餐，我同曉係屋企一人飲咗盒奶先出門口，打打個底先～去到當堂哎吔咗一聲，原來10:00先會開始上餐﹗﹗我就超級肚餓，啲細路？
有得玩就唔駛食啦～anyway，冇得上菜住都好，點都order咗先～原來全日都係用同一個a la carte嘅menu，所謂「早餐」其實只有兩款揀，我唔記得係叫「英式」定咩名，一個$128，一個$168，唔包飲品，不過以每個成人最低消費$120嚟講，點都要嗌啦，晨早流流點都食唔到個pasta或者扒㗎啦～因為兩款早餐嘅圖片實在太細，又冇詳細description講有咩分別，我本著「貴啲應該大份啲」嘅考慮，叫咗個$168同曉share，後來$168同$128嚟到，我哋發現內容大同小異，只係我嘅炒雜菌同埋火腿嘛，$128嗰份就夾埋入去English muffin入面，比對完一番之後，原來$168只係多咗舊蕃茄同埋茄汁豆，但咁樣貴$40好似唔係幾抵喎～
我⋯係一個唔專業嘅blogger⋯因為太肚餓，份早餐一嚟到就即刻分啲俾曉，settle好佢先諗起要影相打blog﹗所以⋯個包少咗一半，啲蛋同薯格又少啲咁，蕃茄又少咗一忽囉～anyway，我同曉兩個都食飽飽嘅～
玩方面就真係無懈可擊了，有四大個區，一個大波波池連滑梯區，一個大玩具區，入面有勁大嘅煮飯仔、勁多又勁大嘅娃娃屋、勁多積木同火車軌任砌、仲有樂器玩具同埋其他立立雜雜嘅玩具，有個超大棵樹嘅軟墊，係入面碌下瞓下都夠晒開心啦，一個0-24個月區，入面有細波波池、溫和啲又短啲嘅軟墊滑梯、仲有啲俾細bb玩嘅玩具，最勁係有玩沙區，係冷氣房入面堆沙未免太豪華了吧？﹗可能因為平日早上book得唔full，所以遊戲區都好鬆動，而且遊戲區只for 0-6歲小朋友入去玩，大家自然玩得溫和得多，之前去牛頭角Mabaland太多大嘅小朋友，曉呢啲兩歲左右就唔太生存得到囉～大樹先生就年齡比較啱～Mandy定金講嘅呢？可能係因為流感高峰，之前電視有叫家長唔好帶小朋友去波波池，可能有啲臨時取消booking都唔定，我哋原來4大4細，結果George爸都冇俾佢一齊嚟啦～
個波波池好令人興奮，入面仲有水泡同沙灘波可以俾你扮游水同去沙灘，但我個女似乎對玩具區更有興趣～
可以買餸買得好盡興﹗
有一堆衫可以扮鬼扮馬，呢條紫色紗裙佢好鍾意，但就唔肯著，拎住嚟影相就ok～佢完全對飛機師嘅制服冇興趣～
佢拎咗一堆食物話要野餐呢﹗
食物全部都係曉揀嘅，但擺盤⋯我係有幫手，睇都睇得出啦，哈哈～唔係邊有咁精美喎～
野餐好開心﹗似乎佢對我幫佢開嘅兩歲野餐生日會印象好深刻同埋好開心呢～(btw，曉曉生日週嘅blog都未打添～)
曉(扮食西瓜)：要搣走啲核﹗(真實對白)
唔好話咁大嘅娃娃屋丫，連細嘅曉都未玩過呀，我咁大個女都未玩過咁大咁豪華嘅娃娃屋﹗﹗
不過我個人更喜歡呢間玩具屋，公仔可以爬樓梯、打鞦韆同埋sir滑梯㗎～
大樹先生的家當然有大樹啦﹗
我嚟啦～
令我估唔到嘅係，居然佢好鍾意玩沙﹗今年去過兩次沙灘，兩次都唔肯踩沙，兩次都係坐係硬地/帳篷邊緣玩沙，除鞋都唔肯～今次係因為又大個咗幾個月丫，定係有奕朗哥哥係度激勵咗佢，令佢充滿勇氣？﹗佢冇乜猶疑就除咗鞋入去沙池了，開始都有少少戰戰兢兢嘅，又要坐大脾，但冇耐都唔介意啲沙整污糟自己，又肯坐係沙上面，沙潑到上去褲上面都冇驚驚或者唔開心～叻叻﹗後來係我提議不如去玩下其他嘢佢先肯走咋～
一兜兜嗰啲原來係麥皮嚟㗎，曉自己啦、我啦、Mandy姨姨啦、愷揚啦、金姨姨同埋奕朗哥哥一人有一碗～
沙池有好多工具，比起我哋可以自己帶去沙灘嘅都要多～
小朋友去玩當然要玩到最後一分鐘、最後一分力氣啦，到咗12:00清場我哋先走～臨走問一問book枱嘅嘢，原來八月都有好多日子有得book晚市呀，要book晚市或者星期六日先有得同爸爸嚟丫嘛～既然book得枱，不如預埋逸逸bb，索性一家八口一齊去啦～好嘢，book到﹗
未離開D2 Place前知道有個大熊貓展覽，順便去玩埋～啱啱開門，人好少，展板對小朋友嚟講唔太吸引，奕朗大個少少都有啲興趣去㩒下啲掣，聽下大熊貓嘅聲音～最吸引佢哋？當然係擺放咗好多大熊貓公仔嘅小平台啦～
攬下佢哋、同下佢哋影相﹗
奕朗就執晒啲木頭排晒整齊係地下等熊貓們可以返學～
曉就坐係小平台邊jap jap jap大樹先生個姐姐請佢食嘅Peppa提子乾，佢哋實在太可愛了，愷揚因為俾表哥們餵慣咗，想食提子乾時唔係伸出手嚟接，而係直接擘大口，曉可能平時餵慣我，佢又居然會放提子乾入去愷揚個口喎﹗
個畫面就變得好sweet好warm了～
啲熊貓公仔有大有細，我同曉講呢個(第二細嗰隻)係曉曉，曉曉就話最細嗰隻係BB，跟住佢就特別喜愛最細嗰隻熊貓啦，奕朗哥哥本身想拎去有其他搞作，曉都要保護佢返嚟，因為係佢嘅「細佬妹」嘛～
曉曉攬住「曉曉」同BB，後面就有爸爸媽媽同埋公公婆婆～
媽媽攬「曉曉」，曉曉攬BB～
玩得太盡興了，所以一上巴士，即使唔抱住，就咁挨住我隻手，曉都超快瞓著啦～
八月我哋又再嚟啦，大樹先生的家see you﹗