奕朗哥哥放暑假，金姨姨好積極為佢安排周圍玩，上個星期上咗嚟我哋屋企玩啦，又一齊去咗書展啦，星期一一齊去咗大樹先生的家啦，今日適逢天氣晴朗，決定一齊去沙灘玩～佢哋而家變成沙田人，去邊度沙灘都遠喇，我哋梗係方便啦，約咗係黃金泳灘，行路去就ok lu～曉而家出街行路越嚟越乖，由屋企行去黃金泳灘應該都要15分鐘，佢完全冇叫過要抱(當然我事先做定功課、催咗眠啦)～

平日嘅早上，未夠十點，居然都有唔少一家大細嚟沙灘玩，我本來prefer黃昏先嚟㗎，不過啲小朋友嘅瞓覺時間實在太難預，佢哋普遍都係朝早醒晨啲，所以最後都係早上一齊玩～

上年其實一次都冇去過沙灘，曉反而係前年大概五個月大左右去過一次(因為嗰次成個屋苑室內室外全部停電，就相約公公婆婆一齊去沙灘)，嚴格嚟講直到今年年頭佢都未試過去沙灘玩～今年春天天氣未完全暖時我同佢去過一次，佢唔肯除鞋，又唔肯行落啲沙度，一直坐係石壆上面玩沙～後來天氣暖咗之後，帶埋個帳篷同爸爸一齊去咗一次，嗰次都係唔肯出去沙地玩，又係坐係帳篷邊度玩沙，想拎啲水返嚟都要抱住去拎～今次嘛，因為星期一去大樹先生的家時，係個室內沙池度玩得高興，又肯坐係沙上面玩，今次應該ok了～

果然，一去到沙灘，曉竟然主動話：「要除鞋～」可能佢記得去大樹先生嗰日入去沙池要除鞋啦～之後佢都毫不猶疑就除鞋、踩沙、坐沙、玩沙～好叻呀﹗有進步﹗

我哋去到沙灘時，許氏一家已經到咗啦～

玩沙沙好開心～

曉：飲水水～

媽：你自己去背囊攞啦～

佢又ok喎～果然唔怕沙了﹗

成功自己去飲水﹗

更令我驚訝嘅係，佢竟然都肯落水呀﹗今日冇著泳衣，諗住著住短褲去淺水嘅地方嘅話濕就由得佢濕啦，曉都冇心理準備會落水～奕朗哥哥去拎水返嚟，令佢同愷揚都想去拎水呀～曉第一次去到水邊時呆呆地又驚驚地，驚到要抱住，後來我同佢講，啲水嚟就跳起啦，玩玩下就唔驚了～仲要擔水擔上癮，來來回回六七次都有，本來係樹蔭下玩都冇同佢搽防曬，後來出去水邊太多，唔得了，要搽番啲防曬呀～啲小朋友出去拎水通常都係為咗要堆沙用，但曉就更享受拎水嘅過程，拎到返嚟求求其其倒咗佢又再馬上出發﹗

回程時要幫手捧埋我個杯呢，曉話：「你好重呀，我幫你拎啦～」直到我都攰啦要坐一陣～

玩到後來，越嚟越熱又越嚟越攰，大家都返晒嚟帳篷呢邊，幾個女人坐埋一齊梗係吱吱喳喳，奕朗話：「你哋好嘈呀～」哈哈，姨姨們控制唔到自己丫嘛～愷揚就不停嗌「媽～」話我哋好掛住講嘢唔理佢﹗

結果都玩咗個幾鐘呀，大家移司過去黃金海岸商場食飯，原本等位飲茶，但隔離地中海餐廳即刻有位又有bb椅就梗係過去啦～地中海餐廳唔知會唔會後悔做我哋生意？5大4小，食食食佢嘅自助沙律bar + 自助餐湯，食完主菜，連餐飲都飲埋，又番兜沙律同餐湯，哈哈，我哋不停食食咗好耐，可能隔離啲枱都turn over咗好多次了～

而家終於可以坐低打blog，因為隻豬豬玩到攰晒，而家充緊電啦﹗(不過可能玩到太hyper，頭先要佢瞓都花咗好多精力同功夫～)

Comments

comments