今個trip之所以出現，主要係逸bb嘅保姆未開工時，婆婆幫忙湊咗逸bb一段日子，家姐為咗答謝媽咪嘅幫忙就話請佢哋去一次短旅行，咁我哋三個就成為陪客一齊玩喇﹗今次意義重大，因為係逸bb出世之後第一次一家八口一齊離開香港外遊呀～跟住家姐恒仔兩個澳門通，我哋對於行程都冇咩idea，我淨係話想食好味嘅自助餐，其他就由家姐佢哋發板啦﹗當大家嘅星期六日都好繁忙嘅時候，家姐居然發覺復活節紅日假期嘅星期日、一呢兩日去嘅話，酒店房比平時星期六仲平呢～既然大家都ok，逸bb嘅證件又ready，就呢兩日gogogo～～
多謝家姐安排好晒船飛酒店嘅booking，我哋可以好安心等出發～今次係我第一次由屯門搭船去澳門，一程的士去屯門碼頭仲平過幾個人搭過海巴士去上環坐船，時間慳咗就更加唔駛講，雖然班次冇出面咁密，但時間合適就得啦～我哋約好一齊食個靚早餐，就去上船喇～
出發gogogo，姨丈因為有嘢漏咗係屋企要趕返去拎，我哋第一張大合照暫時係8-1～
去完旅行返嚟，曉曉去葉太姨姨度時，話佢自己去咗澳門，葉太問好唔好玩，曉曉就答「搭咗船」，搭船對佢嚟講原來係重要嘅行程呢～
我都攬攬曉影張合照先～
上船lu～去旅行時曉只係啱啱兩歲，佢嘅yeah仲係手掌，到upload blog blog時佢已經27m，而家可以快速而準確地兩隻手指yeah啦～
如果唔同兩個星期後去珠海嘅船比較，都唔會覺得呢隻船搭得咁舒服，之後去珠海來回兩程拋到不得了，先覺得呢隻船好穩，當然天氣都可能有關係啦～
同曉曉搭長途交通，最重要當然係預備曉曉娛樂啦，除咗基本嘅圖書同埋玩具之外，仲有好kill time嘅貼紙書，今次帶去嘅係詩蓁表姨媽送嘅puzzle套裝入面嘅動物貼紙書，曉曉貼到津津有味～其實一直好想曉曉係船上面瞓一覺，咁去到澳門就可以好有精神去玩啦，但佢唔瞓你都冇辦法～好在，過完關仲有一程酒店shuttle，咁就當然速速倒下啦～
開心抵埗～
今次住Studio City新濠影滙，正正就係我哋上次住嘅巴黎人旁邊(我未打嗰次篇blog丫﹗唔好放棄，永不放棄﹗honeymoon blog都唔知慶祝咗結婚幾多週年之後先完成啦～)，酒店最突出嘅就係嗰室外8字形嘅摩天輪，而商場裡面嘅設計，就採用New York、Hollywood嘅風格做主題～去到酒店時間尚早，未可以check in，我哋就放低行李，先出動啦～
day 1第一站係去官也街食葡國菜，本身家姐恒仔佢哋有心水餐廳，但原來好受歡迎，我哋冇book枱，去到已經滿座，於是去咗佢哋之前幫襯過嘅另一間葡國菜，呢間比較家庭式，我哋人多都盡量幫我哋拼埋啲枱，仲安排到兩張bb櫈俾我哋添～
三個家庭輪流合照～
曉㗩㗩㗩包包～
order方面，有家姐推介必食嘅海鮮飯，其實我都唔係好識咩葡國菜式，只記得去親澳門食葡國菜都有甚麼甚麼馬介休，家姐又揀啲，我又按菜式種類同菜肉比例等俾啲意見咁，總算完成order了﹗
飲品方面，non酒精飲品都唔平，汽水又冇話特別想飲，哦，原來有sangria呀﹗﹗好耐冇飲，平時出外食飯午餐通常都唔會有酒飲，晚餐嘛，曉臨瞓仲要食奶奶我都唔敢飲得多，今日午餐又唔駛掛住餵奶，又有爹媽陪，我哋就飲sangria啦﹗好味～逸逸bb都唔輸蝕，佢都有份飲⋯葡萄牙礦泉水﹗﹗總算有參與大家嘅午餐～
比起味道，食物俾我嘅印象最強烈嘅應該係portion，全部都超巨型﹗炒雜菜啲椰菜花明明已經切咗都好似用咗放大電筒咁～
海鮮飯真係幾好食，好足料，湯汁又好味，但對曉嚟講太多湯汁嘅飯都有啲問題，因為「呼」極都唔凍丫，好在有少少餐包打咗底先～
角色非常重要嘅餐包～
另外個雞飯都好味～佢哋好似comment係成餐入面最好味，但呢個飯嚟到時我都飽咗大半，所以明明高分都顯得冇咁好味了～
但個烤排骨同埋馬介休都比較鹹，空口唔食得多～anyway，整體都算係令人滿意嘅一餐﹗本來飲咗好多sangria都冇醉意，但埋單時有免費贈送嘅甜品酒，居然呢細細杯嘅甜酒好勁，飲咗就成個胃暖笠笠，行到出去有少少浮浮地，真係唔好睇小佢﹗
食飽飽我哋就出發去下一站－－熊貓館啦～
前往其他中國旅遊blog