4-10-2014:美妙歌聲.維也納兒童合唱團

有一次去開Cityline嘅網上購票系統買戲飛,偶爾發現原來除咗電影門票之外,仲有好多演出呀展覽嘅門票賣﹗隨便click click睇下,發現原來維也納兒童合唱團會嚟香港演出呢,仲係做善事為東華三院籌款﹗感覺爹媽都會有興趣,就邀請佢哋一齊去欣賞啦﹗IMG_5075.JPG

演出係理工大學綜藝館舉行,我哋都唔係第一次係呢個場館欣賞節目了,我哋相約早少少係靠近尖東嗰邊嘅太興食咗晚飯後,就慢慢散步返過去PolyU入場觀賞節目~

睇睇場刊,原來維也納兒童合唱團有幾個小隊,每隊大概25人左右,全團有100人,分開四小隊去世界巡迴演出~我哋今次睇嘅小隊由韓藉指揮Bomi Kim帶領,指揮+司琴一個人包辦﹗小男生比我想像中大個少少,諗住既然係未變聲嘅男孩子,係咪全部都係小學年齡?原來去到14歲嘅都有,所以呢啲大哥哥就擔起帶領同埋獨唱嘅重任啦﹗至於今次嘅歌曲,由聖詠至傳統歌劇歌曲至流行曲至世界各地嘅民謠都有,金髮碧眼嘅小男生係咪可以駕馭得到?

開場了﹗鋼琴放係正中央,司琴(即指揮老師)背向觀眾,當然啦,因為佢同時都要指揮企係兩旁嘅團員嘛~我後來再上Youtube睇下其他維也納兒童合唱團嘅片段,原來佢哋一般演出嘅陣式都係咁樣嘅呢~

開場曲係節奏輕快嘅「強盜快步舞」,音色瞭亮和音合宜,當然都係唱得好聽嘅,但點解少咗一種一鳴驚人嘅感覺?明明係世界第一嘅兒童合唱團bor⋯到正式開始時我就馬上入迷了﹗第二首曲係清唱四部嘅聖詩「讚美上主」,wow,我諗呢啲就係佢哋最高嘅實力,溫柔又和諧嘅聲線,懾人嘅魅力,難怪遊客們去維也納旅行時,都要去合唱團獻唱嘅聖堂度參與彌撒啦,如果係聖堂入面,氣氛應該更濃厚﹗之後連續幾首都係歐洲十七至十八世紀之間嘅古典音樂同戲劇音樂~除咗合唱之外,原來都有好多變化㗎,佢哋會輪流有獨唱同埋小組合唱嘅歌曲,某啲樂曲又會突然間係後面拎咗樂器出嚟伴奏﹗有一首曲佢哋甚至入咗去換衫,出嚟時有五六個團員跟音樂踏著舞步呢呢~至於每首歌之間嘅介紹都會由小男生團員親自負責,佢哋唱歌就好有自信好專業,但拎住咪高峰對住眾人講說話又係另一件事了,會緊張得食螺絲呢~不過大家都唔會介意嘅~

中場休息後,歌曲變化就更多了,因為去到「世界各地音樂」同埋「流行音樂」部份﹗我最surprised嘅係佢哋唱「月亮代表我的心」﹗﹗唱普通話嚟講,咬字都有八九成準確啦,但點解會比平時特別好聽呢,係因為個編曲--新嘅編曲、專登為兒童合唱團而寫嘅和音,係我平時講嘅迪士尼和音﹗我唔係好識專業嘅名詞,但唱出嚟嘅feel你就感覺似寧靜嘅晚上,天空掛起皎潔嘅月亮照亮大地,我哋好舒服咁係涼風之中坐係天台度,踢著雙腳,悏意地聽著音樂~另一首印象深刻嘅係ABBA入面嘅「Money Money Money」,係MamaMia入面,呢首歌充滿憤恨、埋怨、強烈嘅感情,換著純真嘅小男孩唱又會變成點?原來又係另一種feel,清新得多,哈~

完成晒所有場刊入面嘅曲目之後,當然有encore部份啦,其中一首encore係中國嘅民謠,邊一首我唔記得了,總之係我唔太熟悉的,令我諗起上次去北京時聽嘅管弦樂團,encore係「我的祖國」(請參閱:31-5-2014:三十登長城day 2(part 3).貝洛拉維克與捷克愛樂樂團@國家大劇院),外國樂團嚟到亞洲地方,都總想「冧fans」呢~正如CNBLUE開演唱會都練定幾句廣東話一樣﹗heehee~

原來維也納兒童合唱團係香港都有兒童音樂班呢﹗如果BB呱係男仔的話,睇下佢有冇興趣參加啦~呢啲團員嘅爸爸媽媽們一定好為佢哋嘅仔仔驕傲呢,細細個已經世界巡迴演唱,叻﹗

今晚個演出好正丫﹗睇得非常高興呢~果然繁忙生活之中都需要音樂藝術嚟調和一下﹗希望今年嘅「港樂.星夜.交響曲」可以拎到門票啦~

Comments

comments

在《4-10-2014:美妙歌聲.維也納兒童合唱團》中有 2 則留言

  1. 是晚演出,真精彩,童音似天籟。尤其聽到有部分熟悉的歌曲,有份親切感,聽得投入,收穫更豐,你的比喻生動,讓大家再次重溫這悠揚的妙音。

    • 其實嗰個唔係比喻嚟㗎,而係形象化嘅感受﹗當時我真係有呢個feel呢~

發表迴響

你的電子郵件位址並不會被公開。 必要欄位標記為 *