30-5-2014:三十登長城day 1.北京木棉花酒店

今年生日三十歲lu﹗三十歲生日係我心目中都係大日子,好似爹媽之前興致勃勃咁討論「登陸(登六)」,我覺得今個生日都要特別慶祝~係生日會同埋去旅行之中,有鑑於連住端午節連假,請一日可以放四日,星期五放工出發前後叫五日,我揀咗去旅行﹗之前睇「步步驚心」小說同電視劇時已經好想再去下北京,因為之前去已經係三歲時嘅事咯,冇乜印象~既然要特別啲,就三十歲生日去登長城做好漢啦~所以呢個行程就定落嚟啦,由古晉返來唔夠一個星期就再出發了,唔同嘅唔同嘅,之前係去學習去上堂,今次真係去玩丫嘛~IMG_4215 感覺上返工時已經開始旅行了,因為我哋搭晚上八點鐘飛機,放工就要直接去機場啦,所以我同day各自帶埋行李返工﹗

我比預期遲咗少少走,離開醫院時day話已經上咗機場巴士,我擔心啲車好疏,所以的士去機場,點知⋯day架巴士超慢丫﹗等到我心急如焚~原本想食啲嘢先上飛機,但佢哋到時已經要即check in,即過關,即去登機閘口lu~途中仲要轉咗登機閘口,我哋又要飛奔去新嘅閘口,諗起上次由西班牙返嚟時嘅狼狽⋯(請參閱:9-11-2013:西班牙day 10.西班牙足球的皇者風範@Madrid)結果只食咗少少零食就上飛機啦~

IMG_4220

指定動作﹗

今次搭嘅係中國國際航空公司,以前都搭過,但印象最深刻嘅一點就係有得儲Asiamiles,其他就唔係好記得了﹗呢程機唔知係咪因為星期五晚呢,有九成客人都似商務旅客,個個唔寄行李,帶住小黑色皮喼上飛機,著恤衫西裝,面上表情繃緊,而商務艙有大半乘客BMI都有30或35以上(當然係目測啦),所以我哋兩個就成為異類了,可能佢哋受工作壓力影響,對空姐都唔太好老脾,慘慘空姐~食物嘛,因為冇乜特別好我都費事拎相機出嚟影了,最深刻係好細份~anyway,去到就瞓覺了,算啦~係半睡半醒之間,我哋到咗北京啦﹗IMG_4289

北京首都機場好大好靚,大到要搭好多扶手電梯同接駁列車至到入境大堂﹗但我呢個過程講咗好多次「首都即係首都」,最重要一點係我過關非常順利﹗平時都多返下大陸,唔知點解我個名個字冇簡體字,總之一嘟就會出咗「?」係關員個screen度,day成日笑我叫做「胡問問」,然後我每次都要入去詢問室,等一陣至過到關,所以我搭直通巴士的話絕對會阻住成村人﹗但今次好順利就過到關了,回程時都一樣,所以「首都即係首都」﹗而等行李時亦有免費飲用水供應,唔係打開水喉嗰種喎,而係感覺良好嘅蒸餾水~

我哋咁夜至到當然只能搭的士返酒店啦,等的士嘅地方就返到我哋嘅記憶了,因為人好多,所以啲的士係一批一批咁埋站,可能一批有七八九架,然後大家就衝上心儀嘅的士,坐穩就開車,感覺有啲危險,但除咗我哋之外大家都習以為常了,今次我哋都冇大驚小怪,因為上次係杭州個高鐵站都見識過啦~(請參閱:27-4-2011:上海pre-wedding+杭州day 3(part 1).搭高鐵往杭州去、滿意的酒店)IMG_4290

首都機場離我哋住位於王府井嘅酒店都幾遠,好順嘅高速都衝咗十至十五分鐘﹗司機唔識我哋間酒店,好在睇定地圖,半估半靠記憶咁同司機一齊搵,好在都冇走寃枉路,到咗我哋住三晚嘅--木棉花酒店Hotel Kapok Wangfujing~SONY DSC

今次都係agoda.com預訂,酒店房好大好舒服,裝修好時尚,浴室又大,好滿意~今次又係唔明張床點解咁硬都咁舒服﹗﹗大家可以去酒店個website度睇睇:

http://www.kapokhotelbeijing.com/indexzh.phpSONY DSC

我訂嘅係貴幾十蚊嘅庭園房,我都好好奇點解咁多層樓嘅酒店都可以有庭園房﹗我哋個小庭園面向酒店內側,即是向住走廊﹗同鄰房貼實﹗所以我哋都冇係出面坐過呀,不過叫做有個地方多啲天然光滲入房間啦~

太太太太太累了,酒店有兩罐免費汽水,我哋share多一罐,食多少少百力滋,沖個涼就休息啦,瞓覺時都一兩點lu~

待續

前往其他中國旅遊blog

Comments

comments

在《30-5-2014:三十登長城day 1.北京木棉花酒店》中有 8 則留言

  1. 原來你一直無再去過北京,咁就真係同第一次去無乜分別。
    點解你地坐商務艙?
    北京既的士司機真係好差,又揀客又唔識路。

    • 係呀~就只有三歲嗰次咋﹗
      我哋冇坐商務艙,只係登機時經過見到啫~
      揀客嗰樣乞人憎,我哋最尾住嗰間四合院酒店多外國人住丫嘛,佢哋有個小tips,就係先坐個屁股上去,先交地址司機,避免拒載~

        • 因為你唔係鬼,佢拒絕到你,如果你丁點普通話都唔識講,佢要拒絕你都要努力一番~

  2. 過關順利有點令人驚喜,奇怪的是為何其他關卡沒用同一系統?是不是首都關員辦事比較靈活?

    • 唔知係咁啱個系統更新咗丫,定係北京真係勁啲?我去程時係高級有「花」職員,但回程時都係普通有「柴」職員咋,一樣咁順利﹗

  3. 幾時機場或旅遊景點搭的士,唔駛擔心被人拒載或賣豬仔,中國人那時就真的進步了。香港警方放蛇,偶然還會捉到司機濫收車資的。

    • 好多時旅客對城市嘅第一印象都係的士司機﹗可惜好多地方啲司機為求快賺錢就坑旅客,所以好多地方都用各種方法去限制司機,好似曼谷司機要先係櫃枱登記先可以載機場客人啦,古晉嘅定點收費啦,之前去印度嘅先付費後上車啦,如果唔係咁多「壞事」發生,又點駛咁多規矩呢~

發表迴響

你的電子郵件位址並不會被公開。 必要欄位標記為 *