一個美好o既早晨梗係要有美好o既早餐開始啦~我哋係馬德里只有一日full day，之前o既一個晚上同之後o既一個早上，只有咁少時間，要好好安排下~我哋打算早上去最出名o既普拉多美術館先，因為唔了解架步，都係早少少去到附近先搵食~我哋發覺呢間酒店附屬o既餐廳價格相宜，又多選擇，最重要o既係有熱嘢食﹗唔止係凍冰冰o既包，good~

坐係窗邊有靚靚景就更佳~我哋揀咗焦糖pancake同埋蕃茄醬多士，咖啡都好好味~除咗size細咗少少之外都幾好~ 🙂

行過去普拉多美術館(Museo Nacional del Prado)，影影個外觀先~

https://www.museodelprado.es/en/

旅遊書話呢個美術館o既館藏可以同羅浮宮齊名，雖然我哋都唔係愛畫之人，但都有啲期待~好在我之前睇咗旅遊書o既雞精導賞，所以對於邊啲名畫一定要睇一睇都心中有數~確實，如果自己隨便去睇，就只係，哇，畫得好精細，畫得好真實，好大幅畫唔知要花幾多功夫…但睇下啲睇畫指南就可以了解下當中o既趣味性同觀賞價值﹗

哇，係西班牙都欣賞到紅葉呀~雖然只係極少範圍，但都叫我哋好興奮了~記起第一次睇紅葉係係日本大阪呢，嗰次真係叫人超讚歎+要狂影相了~(請參閱：26-11-2009：大阪白浜day 3(part 1)．超讚的萬博公園紅葉)

正門﹗

館內唔可以影相，所以只能靠文字記錄啦﹗展覽主要有兩層，但gallery就有過百個，分一個個藝術家或者時代去劃分，不過好似話展品會時時變，所以啲特別o既名畫都唔係固定位置，要睇最update o既floor plan至知，我哋又拎咗floor plan guide，又傻傻地時買咗兩本導賞書仔，開始時都唔係好知點，都係想睇乜就睇住先，見近近地啲「target畫」又去搵下咁囉~不過我哋發現咗一個貼士，就係「問現場觀眾」﹗﹗yeah~見到啲導遊帶住一大群旅客駐足o既地方一定係特別的，有時撞正講英文仲可以R聽下~

畫其實都係油畫為主，另外有啲雕塑咁~好多都勁大幅，成幅牆咁大，平時真係冇幾可見到咁多咁大o既畫放埋一齊﹗我哋最後都有睇到旅遊書介紹o既Diego Velazquez o既「侍女圖」(要睇咁多人物之間o既interaction，空間光暗)、Francisco de Goya o既皇室畫「卡洛斯四世一家」(要睇任性o既畫家連皇室家庭之間o既微妙權勢高低都畫係人o既表情上面，同埋連自己都隱藏係畫o既入面)、「1808年5月3日的馬德里」(展示拿破崙軍隊占領西班牙o既殘酷，利用光暗、人o既表情，牽動到觀賞o既人o既情緒)、「裸體瑪哈」vs「穿衣瑪哈」(因為當時民風保守，唔准畫裸體畫，所以裸體版係私下欣賞作用，著衫版就係公開展示用，但構圖、動作、神情都完全一樣呢)、「農神噬子」(Goya晚年主要畫啲黑暗畫，成個展館都有陰森神怪o既感覺，我哋未見到農神噬子之前睇到其他畫都已經打晒冷震，大師即係大師)~

係侍女圖嗰度有一班幼稚園生跟學校嚟參觀美術館，真好~香港o既幼稚園生都有得去美術館嗎？有個職員用小朋友易明白o既方法去講解，我西班牙文唔精都聽得明啲，所以賞畫真係無分年齡呢~

Goya o既雕像~

果然係美術館附近，賣藝都充滿氣質~

美術館後面有間教堂，但都唔知係咩教堂了~

係馬德里發現教堂真係多得離譜，一條街行落去都可以有兩三間，即使全民都係信禱，係咪真係有咁強大o既服務需求呢？同埋有冇咁多神父開彌撒？

之後我哋去埋好近o既雷提洛公園(Parque del Retiro)，原本以前係皇室o既夏宮，到1868年先為民眾開放，而家成為老百姓假日休閒o既好去處咯~我諗就好似紐約o既中央公園咁俾城市人一個喘息o既空間吧(不過西班牙人咁識歎都冇乜壓力乎？)~(請參閱：22-6-2006：怡人的中央公園．重遊自然史博物館)

公園真係大得離譜，我結果都唔知我哋行咗邊度同埋邊度，恐怕只係cut咗個corner有公園o既呢個入口入，嗰個出口出之類~

自拍一下~

剪到咁o既？﹗

呢邊就係所謂法式庭園風格吧，公園更大o既範圍保留自然造景~

無窮無盡o既林蔭大道﹗

好適合俾人健步行、跑步呢~可惜香港冇咁大地方﹗不過係度跑步都要認路呀，如果天黑時搵唔到出口就糟之大糕了~

公園中間亦有體育設施~

我哋行行下就遇到今次西班牙之旅o既第一場雨啦，冇帶雨具o既我哋只能戴上外套o既帽急急腳行咯~其實真係好lucky呢，嚟到第九日先第一次落雨﹗西班牙好歡迎我﹗但咁講即是韓國好唔歡迎我了，連續兩年去，無論係濟州定釜山都落大雨丫~

我哋下午去皇宮，所以搭地鐵過去~

其實尋晚我都好唔滿意o架啦，係馬德里周圍都係垃圾﹗﹗我當時係度狂鬧做乜作為首都都咁污糟，然後就拎巴塞隆拿嚟同佢比，有幾乾淨啦，周圍幾多樹木幾舒服咁~後來返嚟香港先知寃枉咗馬德里呢，原來當時啲清潔工為咗爭取勞工利益罷緊工﹗﹗都係睇新聞至知，難怪難怪~我哋o既相片集之中不乏呢啲「垃圾相」﹗﹗

呀，馬德里o既路牌係咁o架，好靚o既瓷磚畫~而且係根據路名o既主題去設計呢~

我哋食埋lunch先入去皇宮﹗

皇宮附近有好多食肆，我哋揀咗呢間，因為個menu del dia幾抵食呀~而且又有英文餐牌~

係走時尚風格o既餐廳~我哋兩個人當然要試晒咁多款食物啦，第一道菜o既A&B，第二道菜o既A&B都叫一個，咁就有四道菜啦~不過呢間奇o既係，一般第一道菜都係湯or appetizer or沙律至係，但佢湯o既對選居然係肉醬意粉，而且係正常主菜size o既意粉，我哋正係度咕嚕邊度有人可以食完一碟意粉再食兩件扒之際，後面張枱o既一對肥夫婦就為我哋示範了﹗佢哋仲要食到埋麵包添呀~呢間樣樣食物都好味道~雖然menu del dia包飲品，即是叫酒叫sangria叫汽水就最抵，但我哋嚟咗咁多日，飲甜嘢飲到膩啦，唔爭氣哋叫咗水，但都係精美o既礦泉水喎~

ok，食飽飽可以參觀皇宮了~

待續

前住其他西班牙旅遊blog

Comments

comments