嚟到旅程o既尾聲lu，但都仲有另一個高潮，就係去Yala National Park參加safari啦﹗其實呢個都係當初想嚟斯里蘭卡旅行o既其中一個目的，所以都好期待啊~

先一日報好名參加天矇光出發o既safari，五點幾就要出大堂集合啦，好在酒店都安排少少小食咖啡茶俾大家填填肚子至出發~

我哋就係坐呢種jeep啦，有分一般版同埋豪華版，我哋呢種屬於豪華版，車身較高，有大窗子可以方便睇動物同影相，而且座椅都比較舒適﹗

車駛離酒店靠向國家公園入口時，開始見到唔同型號o既jeep，似乎有啲係嚟自Tissamaharama嗰邊o既tour，聽講同係一樣o既safari，係嗰邊出發會比係酒店o既平得多，但質素可能會參差啲~咪搞啦，都係跟酒店安全啲有保障啲吧？(雖然後來我哋架車成日死火…豪華jeep…哎吔吔~)

天漸漸光起來啦~

我哋排隊入場國家公園，酒店book tour時已經登記好資料俾晒錢，嚟到入口就唔駛我哋搞啲手續了~

手震震之指定動作招牌相~

首先迎接我哋o既係孔雀﹗

其實嚟Yala National Park最重要睇咩動物呢？睇過旅遊書同埋之前Galle買o既動物書就知道，最出名o既係睇豹，原來Yala入面豹o既密度係全世界之中最高o架，事關係其他洲其他森林，食物鏈裡面，豹之上仲有獅子老虎，但係斯里蘭卡呢個島國，豹就已經係食物鏈o既霸者(唔計人類，人類係最恐怖o既生物…)，所以佢哋繁殖得好好，亦因為唔需要躲避狩獵者，所以佢哋會斯斯然咁高調出現喎~雖然咁講，但我哋今個safari其實係冇見到豹o既~:p話比較易見啫，都唔係一定見到家嘛~之前去花蓮一次賞鯨、去宜蘭一次賞鯨，叫就叫「賞鯨」，但結果都係得海豚(26-6-2009：花蓮day 4．出海賞鯨去~、16-9-2010：台北宜蘭trip day 5．出海親親海豚+龜山島、返台北爸媽與老朋友相聚)，道理一樣啫~不過又唔會失望o既，因為見到其他動物都好興奮呢~

仲有好多其他雀鳥，不過鳥類要分辨太困難了，即使有雀仔書都搞唔掂~

今個safari之中，有啲動物好多見到，有啲就只難得見得一次…

比較容易見到o既就係小鹿斑比lu~哇，鹿群丫﹗佢哋好優雅、好可愛呢~

仲有多幾隻孔雀添~一直印象之中，孔雀係比較大比較笨重o既鳥，以前係印度見到o既都係地上面行，今次先第一次見到孔雀係樹上面，唔知佢哋飛上去時體態係點o既呢？

另外常見o既動物就係大水牛喇﹗

今次有近啲o既小鹿斑比丫﹗

但加埋我個頭落去就會變成咁遠了~^.^

嗱，動物書o既價值就係呢度喇﹗鹿就大家都認得啦，咁右邊嗰兩隻係乜呢？好似都係鹿咁o既樣bor，但如果你用英文叫佢哋做deer就唔啱了，佢哋係sambar，係體型大啲o既鹿~

大家留意下，佢哋咪好靠近水邊o既~

司機兼導遊叫我哋留意下池塘，我唔加個箭嘴落去大家一定唔知我講乜，我指住嗰條線其實係鱷魚嚟o架﹗﹗佢半浮係水面，對啲鹿虎視眈眈呢~

感受到危險性o既鹿們係我哋不知不覺間移咗去遠離池塘o既地方咯~佢哋好叻呢~

因為時不時司機都會叫我哋望下啲動物，所以好忙碌呢，有時左邊有時右邊~

呢度吊係樹上o既係鳥巢，但已經唔記得係屬於咩雀lu~

大家見到樹叢中o既jackal嘛？呢種豺狼之類o既動物我都係睇咗動物書先識個名咋，司機介紹起時都唔會傻更更咁~

其實天氣認真唔好，雨越落越大，我哋坐係窗邊其實都又濕又凍，我哋架jeep居然成日死火喎，搞到司機要冒住雨出去修理幾次，我哋架車都停咗好幾次，我諗七八次都唔止，最後司機為咗我哋著想，好抱歉咁將我哋交咗俾佢同事，即是賣豬仔去咗另一架jeep回程~意外o既嘢冇人想o既~去到另一架jeep更熱鬧呢，又有一家大細又有情侶又有外國遊客~

啲水牛離我哋好近呀，見到佢哋有稜有角o既結實身段就知道佢哋係野生o既牛~

又係好隱閉，見到隻鷹嘛？

好咯，safari結束咯，以孔雀開始，亦以孔雀作結束~

不過返到酒店範圍仲有動物睇呢，呢度成棵書都係猴子呀﹗其實都有少少恐怖，因為香港人對於猴子都係有啲怕怕吧，諗起馬騮山啲強盜馬騮時…我之前係浮羅交怡都俾馬騮搶掠過呢~(請參閱：27-12-2006：浮羅交怡island hopping．去到邊游到邊)不過呢度啲馬騮都冇對我哋做啲乜~

肚子餓了，好在早餐都預咗大家去完safari返嚟至食，雖然都晏晏地，但都未結束~動物tour仲未完呢，仲有隻小松鼠嚟探訪我哋~

去safari又淋過雨又塵土飛揚，好在我哋夠時間返房沖個靚涼先check out離開啫，可以乾淨清爽上飛機~

我哋一早搵咗酒店幫我哋安排司機載我哋返Colombo，今次唔駛經Galle，可以直剷大斜線返過去Colombo，所以行咗條新路呢，路經另一個國家公園Udawalawe o既邊緣，嗰度出名咩？

咪就係大象囉﹗我哋臨走前都仲可以同斯里蘭卡o既大象say多次hi呢~

因為路途遙遠，中間都有個休息站，難得的行咗個當地o既小商場，去咗個洗手間，買咗個我喜愛o既朱古力牛油曲奇(細個時兆康苑o既奧斯林餅店入面我o既最愛)同埋汽水上車食，正好鬆一鬆又解解悶~

我哋返到Colombo唔係即刻去機場呀，如果大家有留意之前o既blog，我話有個地方一定要再返嚟嘛，就係Odel百貨公司喇﹗我哋同司機約好時間，放低我哋係度個幾鐘，要好好shopping一下，買啲手信~果然不負我所望，自己要的紀念品，送俾人的都買好了，遺憾o既係之前見到好鍾意o既一件孔雀tee唔見咗，唯有揀咗另一件…點知返到香港先知原來媽咪買咗我原先鍾意嗰件，好在我買唔到啫~

我哋買完嘢再食埋個tea至搭車去機場~

其實去到都有啲太早，又未入得閘，我哋又怕等到瞓著咗過咗時間，所以輪流坐低同埋逛逛囉，我哋食埋最後一餐斯餐(唔知點解全國最大o既國際機場，一間似樣少少o既餐廳都冇，食咗個難食o既斯餐作結束…>.<鄉土味o既飯同埋凍冰冰o既餸…)，換番啲未用晒o既斯里蘭卡rupees，正好可以入閘了~去到候機o既地方，我哋兩個都超眼瞓了，去咗間cafe飲嘢，好在有得上下網消磨下時間~

完成一半路程，去到新加坡等轉機，但因為超眼瞓的，今次都冇周圍逛啦，歸心似箭了~

安全抵港﹗

斯里蘭卡之旅完滿結束

前往其他斯里蘭卡旅遊blog

Comments

comments