14-4-2012:首爾濟州櫻花遊day 7.笨蛋的奇遇

我有諗過要唔要post呢篇blog,話晒都係將自己o既蠢事曝光,不過蠢事都係史實o既一部份,而家記錄低,將來懷念時可能係深刻o既經驗,蠢唔蠢到時都唔重要了~因為第六晚發高燒+周身痛+軟lai lai o既緣故,我哋第六晚本身想去酒店對面嗰間汗蒸幕,第七日原本想去南山公園、南山塔再睇櫻花的,冇辦法,行程要取消同埋我要同酒店張床為伴了,呀,仲有Panadol~酒店check out時間係中午,我哋係晚上機,所以day落去樓下extend多一晚酒店房間,預計休息到夠鐘至出發去機場,哇,房價係度俾同埋之前網上預訂差好好好大截丫﹗早、午兩餐都靠晒你了~可能因為我哋本身間房個view靚,佢要留番俾一早預訂房間o既客人吧,所以我哋搬咗落去低層冇景觀o既房間,好似大間咗啲添~

本來事情都係我哋預期咁發展,雖然仲係好病,但我哋都係正確時間之內去到機場、check in、過關…

但真係唔知發咩神經,我就懞下懞下,day又唔知點解都懞下懞下,我哋居然miss咗飛機,去到閘口時,國泰o既職員問我哋係咪去香港,佢話飛機已經開走了…但我當時連驚訝or慌張都冇,只係「哦~」,然後跟住佢哋辦手續了…後來先覺得奇怪o既係,乜平時啲人如果check in咗,航空公司唔係點都會開咪搵佢哋出嚟o既咩?唔通我哋真係懞到連廣播都聽唔到?

當晚已經冇其他班機返香港,我哋好擔心要俾錢買過機票,唔知咁樣情況會點,點知跟住國泰職員過番關、領番行李,期間搭過好多似電梯、過咗好多海關o既行李x光機,我哋出番去大堂附近o既國泰office,然後佢哋同我哋講,已經同我哋轉咗第二朝最早o既班機﹗﹗﹗吓?咁好o既?錯o既明明係我哋喎,唔駛罰添喎~總之我哋呢晚搵地方落腳就好了~

我哋先去arrival hall o既詢問處問下最近o既酒店有冇vacancy,但好似都已經full晒,第二朝又好早機喎,出番去首爾市中心好似唔係好值得,於是我哋試咗人生o既第一次「The Terminal」…

原來仁川國際機場有個有得俾人沖涼+休息o既地方,我終於可以一嚐類似汗蒸幕o既地方了,點解話類似,因為嗰度有淋浴,有浸浴,但又似冇各式各樣o既蒸,而且設計都好新穎嗰種,不過似o既地方係,分開男界女界,女人個個係入面赤條條,好似日本咁,就係浴池度浸,我因為都未係非常好精神,所以都唔敢浸咁耐~仲完涼就換上好似中學體育衫o既短衫短褲入去休息區,你可以拎張地蓆、硬硬的枕頭休息,入面好多男男女女,呢一部份最似韓劇入面o既汗蒸幕場景﹗雖然去唔成梨泰院嗰間,但總算有番啲補償(雖然本身係慘事…)~

係啲咁o既環境都唔方瞓得好喇,我哋過咗呢晚,兩個笨蛋第二朝終於成功返到香港了﹗

今次個trip其實好多地方都唔係好順利,天氣又凍又落雨,櫻花又未開,又病咗,又滯留,但同時又有好多特別o既經歷,旅行就係咁o架啦~好多唔完美o既地方先至有下次再去嘛~我哋後來迷上咗running man,day話下次o既韓國trip要跟著running man遊了~

首爾濟州櫻花遊完滿結束

前往其他韓國旅遊blog

Comments

comments

3 關於 “14-4-2012:首爾濟州櫻花遊day 7.笨蛋的奇遇” 的評論

  1. 主要原因是記錯左上機的時間….而在CHECK-IN時沒有番睇…
    人生又多件蠢事
    [版主回覆01/13/2013 20:11:23]雖然好似好蠢又好慘,但唔知點解又冇乜唔開心或者擔心o既感覺,可能又病到懞懞下,同埋又有少少因禍得福啦~

  2. 你們去旅行好像經常有蠢事發生~
    [版主回覆01/13/2013 20:11:35]因為係蠢材二人組﹗:p

  3. 大家都以為是這樣,大家一起來承擔,並且欣然接受,這就沒有甚麼不開心了。
    在機場過了不平凡的一晚,這卻是可遇不可求的,這次胡塗趣事,要忘記也不輕易呢!
    [版主回覆04/16/2013 14:34:29]係呀,我都覺得可遇不可求,再一次覺得塞翁失馬,焉知非福,仲有船到橋頭自然直﹗

發表迴響

你的電子郵件位址並不會被公開。 必要欄位標記為 *