8-2-2008：年初二．去街街

每年o既年初二，行程大致上都一樣啦~朝早我D姑姐、阿叔、表兄弟姊妹們就會o黎到我屋企，同爺嫲拜年，大家食過開年飯，下晝就會浩浩蕩蕩出動去拜年﹗

我o地初二會去住係灣仔o既大姑婆度拜年，應該之前我都提過大姑婆好多次lu~佢係一個非一般，而且有品味o既阿婆﹗上次我代爸媽去派家姐張喜帖俾佢，佢就預備o左dreyer’s雪糕請我食﹗往年去拜年佢會煲定世界上最好味o既粥俾我o地食，不過而家年紀大o左就冇咁辛苦啦，犀利咯，佢叫o左pizza﹗仲要有最新款o個種海鮮片芥末汁pizza﹗大家都食得好興奮呢~

唔知由邊一年開始，年年去完大姑婆度之後，就會一家人去睇戲，今年家姐嫁o左啦，佢有其他活動，所以得番我o地三個去咋~

去到朗豪坊，有靚靚o既新年裝飾﹗

臨近考試喎，我梗係要呢個「心想事成」啦~仲要係同我最夾o既鼠鼠添﹗

健康都好緊要o架~

仲有呢個超級大桃花添~

我o地睇o既係「魔法奇緣(enchanted)」~

好睇呀~迪士尼出品一定有保證o既~故事橋段唔算好特別，但整體氣氛好好o羅，輕鬆有趣~又有得笑下~我最鍾意係個童話出o黎o既女孩子時時都唱歌﹗叫D小動物o黎幫手o既「家務歌」啦，又有叫個男主角同nancy示愛o既歌啦，係中央公園度唱，好多人載歌載舞，好熱鬧~故事背景係new york，好多好熟悉o既地方出現o左，我2006年時先o岩o岩去過之嘛~

推介﹗