今日又節目豐富啊﹗十二月八號係我o地屯門贖世主堂孝女會o既會慶，慶祝活動決定去鄧修女屋企玩~鄧修女親自煮D印度菜俾我o地食呀，太令人期待了﹗我o地10:30am就係屯門集合了，修女住秀茂坪，我o地搭車出觀塘再轉車~

去到時都晏晏地，肚子開始餓啦~但食物仲有少少先整好呢~

今日有去o既得少少人咋，其中有兩個新會員小妹﹗歡迎你~希望你enjoy~

鄧修女仲係廚房度忙碌﹗好在有陸太幫手煎D印度薄餅，幫輕下~

另外一味餸係呢D煎魚塊啦~

陸太繼續煎埋最後o個幾塊薄餅，最尾o個幾塊薄餅係我搓我壓o架~修女俾我試下﹗都唔難o既，可能因為我平時都有整開cookies吧﹗修女話係重慶大廈可以買到呢D印度食品，呢D薄餅係一包粉，番到屋企加水加油o黎搓就ok o架啦，好簡單，我都想試下整啊~

食物都預備好了，影張大合照先~

睇下我o地今日o既菜式先~左邊開始有頭先見過o既煎魚塊啦，左上係煮雜菜，除o左有椰菜、洋葱、紅蘿蔔之外，仲有D似係豆o既蔬菜係入面~佢右邊就係頭先陸太煎o個D薄餅了，下面有咖喱雞，最右邊有另一款炒雜菜，呢個以椰菜花為主。我就覺得D餸好好味喇，但修女自己反而覺得唔好食，原來佢o地印度人覺得呢D印度菜唔放辣就非常別扭，古裏古怪的﹗但因為之前同修女講話我o地唔食得辣丫嘛，所以而家味味餸都唔辣o架~對修女o黎講D味道就好奇怪了~其實仲有D未出場o架，仲有第二D款式o既薄餅、炸米餅…飯後仲有印度糖水添，牛奶做base，裏面有D香料味，又有D短短的麵條，好似珍多冰入面咁，又有D乾果係入面喎，都幾特別~

分工合作洗乾淨D碗筷之後，我o地做o左個小小祈禱會，咁樣唔會話食完就走丫嘛，都有少少靈修成份﹗我o地唱歌啦、輪流讀經啦、自發性祈禱啦，氣氛都幾好，D新o既小妹都肯自發性祈禱啊~good﹗

三點幾我又滾水淥腳走啦，因為約o左爸媽番去樟木頭等﹗飛奔搭地鐵、東鐵…好在趕得上4:55pm o既火車，去到都係遲少少o者~要咁準時因為約o左時間做facial呀，呢個係番樟木頭o既重頭節目﹗做開o個間facial o既standard真係好高~大家如果去開樟木頭可以問我邊一間、點樣去~一個最基本o既面部護理都係$50咋~香港一般平o既都要過$100啦~而且仲已經包埋面肩頸按摩添lu~足足做個半鐘o架~

食埋我最愛o既昌記晚飯就番去康湖咯~當然叫o左招牌菜煎釀豆腐啦，超滑﹗另外又可以怒飲中湯喎~非常好+非常飽﹗

番到去我o地睇o左一套DVD，睇o左「五星級大鼠」，之前聽聞有D評價麻麻地，話咩「老鼠冇可能同人類做朋友」or「法國人要淪落到俾老鼠教煮o野食」之類…但我睇完之後覺得勁好喎﹗算係disney同pixar近年o既佳作，比得上「怪獸公司」，因為題材比較特別啦，而且D動畫好有創意，一貫的生動活潑，形容D思想感情時運用非常豐富同colourful o既畫面，10推介﹗

今日大致上差不多啦~

Comments

comments