哇，太好了，無啦啦多o左五日假，全賴CCT提早o左四日考﹗好good啊~而且組長已經透過surgery o既秘書小姐知道，我o地全組o既OSCE同埋CCT都pass晒lu~yeah yeah yeah~

今日當然要太撻特撻啦，零做o野﹗不過自己好唔爭氣呀，居然七點幾自然醒一次，平時慣o左早起嘛，跟住九點幾又再醒，而且係醒到唔想繼續賴床賴落去o個隻﹗算數啦，既然覺得瞓得夠了都無謂勉強啦~

一個早上做o左「電車女」，哈，食完早餐之後就窩o左係電腦前面上網做無謂o野，寫下blog、睇下blog、係facebook度遊蕩…上網上到唔知時間唔覺肚餓﹗直至一點半左右先發覺添~

出去食個飯，呢個時候已經係tea time lu~帶o左本小說出去，係鄭梓靈o既「閉上眼，便會相見」，一邊歎大快活下午茶一邊睇書，太悠閒了~本書好好睇呀，叫人一口氣想睇完佢﹗我有時覺得，鄭梓靈寫o既故事，有時或者係想表達一D，內心所渴望，但係現實生活之中唔會實現o既愛情故事，好似呢個故事o既男主角係一個好野性不覊o既人，但同時又好深情喎~anyway，一本好睇o既小說﹗10推介~

其實今日出去主要係想剪頭髮，一個rotation八星期，每個rotation之後需要剪一次頭髮，呢個間隔o岩o岩好﹗今次剪得比較短，唔係太似monchichi了，但反而我覺得有少少似我爸媽一個同事…呵呵~

番屋企煲埋本小說﹗之後都冇乜特別啦~今晚家姐番o黎食飯，但姐夫病病豬呀，得家姐一個番o黎咋~可惜可惜﹗

點解要影荷包蛋？呢D係新鮮農場雞蛋﹗家姐姐夫星期六晚係香港擺完酒之後，星期一晚要番大陸再擺酒﹗o個度男家D親戚送o左好多蛋俾佢o地﹗係佢o地養o既雞所生o既蛋o黎o架~家姐佢o地要o左十幾隻之後，俾o左廿幾隻我o地﹗哇~有呢D咁新鮮o既蛋，最適合o既煮法當然係最基本o既煮法啦，咁先可以將雞蛋o既鮮味表露無遺家嘛~

當佢o地一人夾o左一隻蛋之後，隻碟剩低一隻蛋，喚起我童年時o既回憶﹗細個時呢個時候我就會倒自己碗飯落去，哇，蛋汁、美極鮮醬油再加埋飯o既味道實在太good了~

飯後o既楊桃都係佢o地帶番o黎o既手信o黎o架~又係D親戚親手種o架﹗好好味~

今晚要早D瞓呢，聽日有好節目﹗

Comments

comments