家姐結婚後o既第一日，因為家姐結婚有爹媽遠自台灣o既朋友o黎o左香港觀禮，我o地呢日陪佢o地一家四口周圍逛逛，大川叔叔係爹媽係台灣時o既大學同學，爹爹同佢o地一家都好熟o架~今次o黎香港o既有佢九十幾歲o既媽媽，仲有佢大姐同埋三姐，佢o地係台灣o既山地人o黎o架~即是原住民~

叔叔一家人都係天主教徒，所以我o地朝早一齊去望彌撒，帶o左佢o地去堅道o既主教座堂，一來o個度宏偉D特別D，我paedi block時去過一次望彌撒，覺得特別感動呢~二來位置上都方便之後去其他地方逛o既~去尖沙咀接佢o地之後，我o地就坐天星小輪過海，我覺得天星小輪對於遊客o黎講真係幾值得坐，景又靚、又平、坐得又舒服﹗我自己都好鍾意坐~

彌撒後去o左明愛餐廳食午飯，其實都幾抵食啊，大約$80 o既set lunch已經有自助沙律同甜品、餐湯、主菜同埋飲品，而且樣樣味道都好好~環境都坐得好舒服~大家不妨一試﹗不過今日有D內地o黎o既教友，佢o地…umum…拎食物時未免心急o左少少…

之後o既時間由爹媽繼續陪佢o地，好似去o左山頂同埋沙灘，始終仲有兩日就考CCT，我都係溫下書好D，既然去到堅道，我索性番金風讀書，計起上o黎都有三個鐘o架~不過嘛…少少眼瞓﹗叫day 20分鐘後打電話叫我起身，點知…哎吔吔，佢唔記得o左，一瞓就瞓o左一個鐘﹗之後又整下第D o野，結果efficiency比較…低…

五點左右又要走lu，因為去機場同大川叔叔一家食晚飯+送機，去o左機場terminal 2 o既「潮樓」，食潮州菜o既，其實暗地裏佢都係一間稻香…亦因為咁，所以質素有保證﹗似乎大川叔叔o既媽媽好高興呢，因為佢只講山地話，基本上佢同我o地溝通唔到，但佢不住的笑咪咪，又向我爺嫲敬酒，佢應該幾高興~家姐同恒仔都有o黎呀~叫做食埋「回門」o個餐o羅~

係機場o既扭蛋店見到我所喜愛o既frog style扭蛋~但幾款之中抽到呢款最肉酸o既地球frog添~

點都好，家姐「回門」點都要番屋企「埋一埋周」(其實點寫？)，第一次坐姐夫o既車，幾好丫~架車都好定呀~家姐佢o地番到o黎坐o左一陣就番佢o地屋企lu~

星期一早上要番去大學o個邊落力溫書，預備CCT啦~

Comments

comments