又係由出去到晚o既一日呢~
今個weekend聖堂搞o左個家庭營同青年營，全個贖世主堂走o左150人﹗所以彌撒都明顯少o左好多人參與，起碼11點彌撒就人人有位坐~成個choir都走o左咁滯呀，不過都有george細佬彈琴，所以我都唔駛彈~諗過早D番去練歌，點知都係撻o左皮﹗即使起到身，但都磨到夠鐘先去11點彌撒添~
下晝約好day去書展，我o地係屯門食完lunch就出發，但佢教會今日遲o左D完呀，差唔多1:30pm先開始食飯(食o左上菜好慢，但好好味o既「避風塘」~)，所以都好晏先去到o羅~
星期日去預o左好多人啦，書展D人流管制措施令大家行o黎行去、行o黎行去
，行o左好耐都入到去展館﹗今日時間唔多，我都只行o左最大o個個展覽館o既三分之二左右，不過都買o左唔少書，其實再行耐D都唔可以再買啦，一來彈藥已經用盡，二來已經拎得好辛苦了
~
等我展示下我今年書展o既收獲啦~
「C飲C食美食回憶」：講好多種童年時o既食物﹗作者將佢對每一種食物o既經歷、感情寫出o黎~似乎佢同我都係一個好鍾意食o野o既女生呢~睇落年紀應該差唔多~因為我細個時都係食呢D零食﹗
「偽科學鑑證2–殺出香港」：正式入面講咩我又唔係好知喎，但之前e-mail有收到人o地send俾我一篇名為「聾貓」o既漫畫，睇過超鍾意
，咁佢係收錄係呢本書入面家嘛，咪買o黎睇下o羅，全書都係彩色o既圖畫，唔知好唔好睇呢？
一套兩冊「烘焙教室」同埋「完美西點」：今年買o既食譜，套書好豪華呀
，都有少少肉痛o架，不過本書好靚，好多圖片，又教好多basic o野，「烘焙教室」花唔少篇幅講各種用具同埋材料，可以鞏固根基。
「家庭醫學手冊–伴我同行」：講fam med o既書﹗雖然個名叫「伴我同行」有少少老土，但我可以睇見我的志願﹗有係度講過麼，我將來想做一個家庭醫生~我淨係睇呢本書o既目錄，已有一份感動
，再一次證實，我真係想做個家庭醫生，我期望o既工作就係呢D，好似health education、mental health、contraceptive advice、cancer screening、chronic diseases…
「緊急救護999」：呢本係blog友小姑娘介紹的﹗其實我都有subscribe白衣遊俠個blog，不過平時好似追住睇，今次買o左本書可以慢慢睇~希望其他blog友將來都出下書啦(例如小姑娘
﹗)~
6:00pm左右都要離開會展lu，今晚我表哥新居入伙，大家上去佢度坐坐，同埋出去食飯~所以我衝番去荃灣o個頭~o個度D樓好高啊﹗有六十幾層
﹗我係今晚有去先可以見爸媽耐D咋，因為今個weekend佢o地入o左camp，聽日又出發去台灣了~冇得點見面呢~
爸媽聽日出發去台灣，一路順風
，玩得開心D~
睇嚟收獲唔錯wor~!
點解你咁想做家庭醫生既??
嘩~你買了好多書呀! 做買了我既推介書 仲提到我個名 …出書?我都想…有一本…呵呵~
i have gone to the book exhibition as well, and i bought 4 books about psyhology or psychiatry, i havent seen the book about family medicine as u do lei…otherwise, i might also bought it as i am now in family medicine rotation hahaha….. i still love buying books
Re墨西: 係呀，都買o左唔少，哇，大出血﹗ 咁你有冇去書展呢？
Re uHnsUi: 呢條問題，似乎係我兩年後去見工時要答o既問題呢~心裏面諗過好多次，但要答你嘛，又要好好組織一下~ 初初想做醫生時想做腫瘤科醫生，希望可以幫到cancer病人，但讀讀下發現，其實腫瘤科已經係幫D比較後期o既病o羅，醫得比較好o既，多數都係外科，用手術幫佢搞掂，所以cancer要醫得到，重要o既係early detection，即是越早發現，生存機會越高。呢個係誘因。 更重要o既係我想做一個primary care provider，primary care即是首先接觸病人o既醫生，佢有一個分流作用，一般o既病一個普通科醫生可以處理得好好，比較複雜的，就要運用專業知識去refer病人睇專科，一個好o既primary care o既醫生應該要認真咁問症、檢查，初步作出診斷，寫一封質素高o既轉介信，再refer去正確o既專科~所以唔係淨係識得「普通」o野，而係要乜都識o架~作為一個gate-keeper~ 做家庭醫生除o左醫病，可以做埋教育、俾意見，例如可以花多D時間幫病人戒煙啦，教育番佢o地對某D病o既誤解啦，俾夫婦關於避孕o既意見啦等等等等~ 家庭醫生可以花多D時間俾佢o既病人，唔單止關心佢身體o既毛病，仲要關心佢o既精神健康，即是開唔開心呀，有冇咩事情困擾呀，開導下咁啦~ 做家庭醫生可以有continuity of care，即是長時間照顧同一個病人，甚至係佢o既家人，咁可以建立長遠、互信o既關係，我覺得做到咁係好寶貴o架~ 大概我就係咁諗啦~
Re小姑娘: heehee，ok多啦~出o左幾滴血~(未至於流血不止o既…)不過都比我預算買得多o左，因為今年好多攤位可以用八達通呀，嘟下嘟下就花多o左了﹗ 冇錯~主要係你推介我先買o架咋~ 如果我o地合資，大家可以撈一筆﹗
Re魚美子: 唔，好多謝你特別o黎我個blog度將呢個好消息話我知，恭喜你﹗ 點解後來又會決定讀教育o既？之前讀law唔鍾意？anyway我都會支持你﹗希望你會有開心o既大學校園生活﹗我仲未畢業o架~你開學後得閒可以搵我食飯呀~
Re cindy: 其實我同你做緊相同o既o野﹗你想做psychiatrist，所以買o左psycho同psychi o既書﹗我想做family physician，所以買o左fam med o既書﹗我o地遲D可以交換o黎睇呢~
你同我合資?? 不如你都寫本"實習小醫生"呀!
Re小姑娘: 我個blog o既收視率都冇你咁高~出書邊度有人買喎~叫「黃綠」或者「維他命C醫生」出就差唔多~
d 菜真的來得慢gweg了少許! 但都幾好食啦! 當不想溫書時應看看"伴我同行"吧 那他住我高麼?!
Rita姐姐: 您同小姑娘合著一本書,有睇頭播!!!我一定支持!!
您都好,有咁多血唧……但我就……
錯錯錯,市面上太多醫生出的書,但就欠缺了實習醫生的,好多年前我只見過兩本,勁好睇…作者係知廣,唔知你有冇睇過呢?
小姑娘姐姐： 咁您可唔可以介紹吓ｌｅｅ本書，賣吓廣告呢？
今年冇去呀~ 見到新聞日日都話好多人，而且入場費又加咗，最緊要係唔多得閒，所以冇去lu~
Re day: 下次都再去丫~(不過可以拎埋爸張會員咭去﹗)慢之嘛，好食咪得o羅﹗ 好的~ 哦，我表哥住三十幾樓o羅~比起我住開o既都算好高o架~
Re穴居老人葉德龔： 你叫我做「姐姐」？但你係「老人」o黎o架喎~ 假住有一日我真係出o左書，我一定會大大宣傳的﹗ 乜你行書展冇乜收獲咩？
Re小姑娘:
你係咪講呢本呢~
我有個friend都借o左我睇呀~而家本書就係我手﹗我家姐比我先睇完，佢都話好睇﹗
我寫書呀…咁就唔可以用廣東話lu，要變番做語體文…
Re墨西: 要去書展，最起碼都要花一晝o既時間﹗行得唔耐、買得唔多書就唔抵嘛~ 我估我買o左咁多本，入場費應該都歸本啩？﹗
係呀!就係呢本…仲有一本叫『我仍是實習醫生』架~很好睇架 ~其實知廣仲出了另一本書,不過是創作小說黎,這本我睇了少少便覺得唔好睇,所以冇借 (當年睇佢既書係借回來的) 仲有一本叫『醫生扎記』係突破出的,都唔錯架!你有時間都睇下 唉~你出書唔可以口語化又有咩所謂喎~對你黎講,冇難道嘛
Re小姑娘: 好，等我留意下你講呢幾本書先~ 但要寫D可以出書o既文章，一定要用「主題」o黎做基礎啦，好似小姑娘你咁，每次寫一個topic，先係可以提高「收視率」o既方法~我之前都有諗過要唔要轉咁樣寫法o架，但後來我諗，我打diary主要都係想記錄自己o既日常生活，同朋友仔share下，收視率高係叫人高興，不過一般的話都冇問題o既~
多謝你的支持呀 好開心好開心好開心..hee
Re思詩: 咁你為o左各位讀者，繼續加油寫、加油畫啦﹗