二零二四年四月一日(星期一)
今年復活節假期要計劃外遊有點困難，去年報了名的變形金剛跑因天氣關係改期改到去3月31日(星期日)，即是不可能利用公眾假期去旅行。逸逸跳舞考試將於4月1日至4月14日期間進行，日期待定，所以我一早拎定4月2日至8日的大假陪逸逸放復活節假，直至3月14日確認考試在4月14日舉行，考慮埋唔好錯過星期四逸逸考試前的跳舞課及我們一家星期五的UKULELE課，我就立即開始安排一個四日三夜的行程。
今次旅程心目中是一定要去珠海的御溫泉，有研究過另外兩晚是否要去長隆度假區，不過又唔係太想玩主題樂園，後來發現澳門的酒店蠻便宜，於是最終決定來一趟珠海澳門之旅。
以前去御溫泉都係去中港城搭船去九洲港再轉酒店接駁車，依家開通了港珠澳大橋，拱北口岸旁的珠海站又有接駁車去酒店，所以今次繼續自駕去澳門，泊好車再過關去珠海。
之前兩次自駕去澳門都係免橋費，今次第一次要俾橋費CNY150元。
今日出門有點遲，結果成個過程都令我非常忐忑及心急如焚。我們預約好11:30AM在珠海站的酒店免費接駁車，來到澳門已經10:40AM了。
停車場好大，搵位泊車都要時間，泊好車預備過關是10:52AM。
我地要先入境澳門，再行去澳門珠海的關口出境澳門及入境珠海。因為大樓好大，其實真係要行好遠，好彩原來澳門珠海邊境係一地兩檢，即係出境澳門後行前兩步就直接珠海入境，加上無乜人用依個通道過境，最後我們在11:14AM到達珠海港珠澳大橋關口。
跟住我地直接跳上的士去珠海站，這時最擔心的是不知道御溫泉的接駁車等候區位置，唯一的資訊就係”出拱北關口後左邊行300米就是上車地點”。
原來珠海站非常大，好彩有上面的資訊，我們一落的士就向著拱北口岸直走，最後11:31AM來到接駁車站，已經開始上緊車喇~
其實我想講成個過程我一直同恆仔講我地應該趕得切、我地似乎趕唔切、我地好似又真係有機會趕得切……其實就算趕唔切，最壞的情況都係俾多百多元搭滴滴過去。
但係我地上到車實在太好喇﹗
由珠海站去位於斗門鎮的御溫泉車程大約45分鐘，途中見到縱橫交錯的道路建設，依度咁荒蕪好難想像點解要起到咁複雜。
因為周圍明明都係漁塘風光
大約12:20PM，我們來到御溫泉了﹗雖然中間有些令人緊張的枝節，但實在比以前出上環搭船再轉接駁車舒服得多。
我們下車的地方是入場辦理大廳，以前來的時候都沒有這個地方。
先取籌號然後就可以坐在大廳等候安排CHECK IN
等候期間有飲品、小蛋糕和軟雪糕可以免費享用。
起初逸逸怕羞唔敢自己去拎雪糕，後來見到比她小的小朋友都係自己拎，終於鼓起勇氣。
自己拎的雪糕有無好食啲？
CHECK IN時有兩個職員招呼，我們預約的是長盛莊2人上朝(早餐+無限次溫泉+廟會自助晚餐+單車券+遊戲券) – KLOOK價HK$1900，120CM-150CM兒童現場另加CNY240 (含溫泉+早餐+廟會，不佔床)。所有入住者要影相，食早餐及浸溫泉將透過人面識別進場，另外提供晚餐廟會入場券、遊戲券、煙花券和單車券。
搞掂晒CHECK IN我地都唔走住，因為大廳外面還有小花園可以看兔仔……
同埋鴨仔
大廳內又有佈景可以影下相，所以我地班接駁車的人散晒咁滯我地先走
我地搭接駁車去酒店區，沒有諗過連架接駁車都要佈置一番，逸逸猛咁話架車好靚。
御溫泉分別有三間酒店，分別是御瀛莊、雲來客棧和長盛莊酒店。職員在我們上車前會先問我們住哪家酒店，我們住的長盛莊酒店就在長盛口停車，不過這兒其實離長盛莊酒店入口還有一段距離。
由踏入長盛口開始，對於我們來說是全新的部份。我們首先要經過長長的走廊，沿著走廊放有各式各樣的玩意，例如氣墊球機、桌球、足球、康樂棋……也可以在這兒付費做不同種類的小手工。
轉個彎走到外面，竟然建了一個火車站，也實在太跨張了吧﹗
火車站仲有兩架火車，一架開往溫柔鄉，另一架開往靚仔坑，哈哈~
接下來就是酒吧街
酒吧街的盡頭就是我們今次入住的長盛莊酒店。因為下午3PM才可以進房間，我們先寄存好行李，但這時其實已經可以開始享用酒店的設施包括去浸溫泉，我們就選擇出去周圍逛下和吃午餐。
逸逸的康樂棋初體驗
剛才逸逸已經睇中依個坐著踢的足球，無諗過都幾刺激下，逸逸這兩天一有機會就嚷著要玩這個。
上網查過一下，原來坐著踢的足球係一個芬蘭設計師 JARNO 無意間創造的設計，真正的產品名叫SUBSOCCER。有一天JARNO 正坐在陽台上看電視轉播足球比賽，女兒希望能找爸爸一起玩。當時懶得起身、又想繼續看比賽的 JARNO，決定和女兒來場懶人版的足球遊戲。為了防止球被踢出陽台，或者需要不斷撿球，JARNO 用毛巾、泳衣、床單搭成一個足球賽場，隨意找了顆塑膠球，和女兒開始你一腳、我一腳地來回互踢。當 女兒成功突破防守、把球踢到JARNO的椅子下時，JARNO突然意識到──他們剛剛發現了一個全新的遊戲。
依個遊戲真係幾好玩架，最重要係唔會跑到氣喘呀嘛~
依架人力車都幾重，逸逸除咗坐係上面扮乘客，仲嘗試扮車夫，估唔到佢又夠力喎~
今天的午餐我們再次去了每次來御溫泉都在這兒吃午餐的御食坊。
入面裝修得好靚，跟我們上次來完全不同風格，好明顯有KEEP住保養。
我們點了鹽焗雞、咕嚕肉、蒜蓉炒油麥菜同埋炒飯，樣樣都好好味，不過特別要HIGHLIGHT的是咕嚕肉，好食到我已經飽到上心口都唔捨得食剩佢，仲要依餐埋單唔駛CNY200。
食完飯走出來，影下依個我們非常熟悉的人工湖先~
食完飯我地再玩多一陣坐著踢的足球，同埋玩下依個我小時候去XX樂園最鍾意玩的碌波仔遊戲，結果玩到個波碌咗落櫃底，要搵康樂棋支棍掃返佢出嚟。
時間差不多，我地可以上房喇~