大約3PM，我們終於來到海洋博公園。
海洋博公園好大，有好多個停車場，不過因為我們主力係去美麗海水族館，所以當然係跟從前人的經驗，直接SET導航去最方便而且車位最多的P7停車場了。
海洋博公園的地圖
停車場一出來就會見到這個全沖繩最大的繩網遊樂場 – ちびっことりで，其設計以沖繩之海為主題。
無諗過平日乜都驚驚青青的逸逸咁勇猛
成個遊樂場佔地32000平方呎，逸逸竟然唔駛我陪，不過其實我都無能力陪。
我只係遠距離觀察住佢
係臨尾落地遇到少少困難，指點一下就可以了。
仲要玩埋平衡木，烈日之下係度原來只係玩咗15分鐘，唔係睇返啲相片的時間，我以為乾蒸了半個鐘以上。
所以大家都超級鍾意依隻會灑水的海豚
睇下逸逸玩到幾肉緊
美麗海水族館的入口，因為我地打算看5PM的DOLPHIN SHOW，所以先周圍行下，睇完SHOW先參觀水族館。
今日真係又曬又熱，亦因為有咁好的天氣，所以沖繩的風景更加靚~
好大的鯨魚
又係俾噴水吸引到唔捨得走
太陽實在太猛烈，連鍾意曬太陽的恆仔都要擔遮，我地決定行下海牛館和海龜館。
我們首先參觀海牛館，好多人都會誤會被錯認為美人魚的是海牛，其實真正被誤認為美人魚的是儒艮，海牛與儒艮最大的不同是儒艮有著像海豚般的魚尾，而海牛的尾鰭則是圓扇型的。
唔知點解我覺得海牛個樣好似樹獺，好可愛啊~
因為正在洗池的關係，海牛就唯有靜靜的待在水底。
海牛館旁邊有條小路通往沙灘，不過實在太熱，此地不易久留。
跟住我地去海龜館，露天位置可以看到大量小海龜。
落到水槽下面就可以見到大海龜了
我覺得依張相影得好靚
當天氣好熱的時候，時間過得特別慢，DOLPHIN SHOW仲有分鐘才開始，恆仔同逸逸係劇場坐下休息，我就繼續周圍EXPLORE下。
沿著海岸遊步道急步前行
依邊真係無乜人
好美的海
見到依條咁長的樓梯，我投降了﹗
見到美麗海水族館獨家限定的鹽味汽水，我依個期間限定控一定唔會錯過，點知第二日係機場飲品售賣機都見有得賣……
DOLPHIN SHOW開始喇，好耐無睇過真係覺得好精彩，依隻海豚識得拎返粒骰仔俾飼養員架。
一邊睇一邊好掛住以前海洋公園海洋劇場的表演。
去到表演中段主持人突然邀請大家唔知做乜，然後成班小朋友一邊舉手一邊行晒落去，逸逸又話要參加，於是我唯有跟埋落去。
以水平線高度欣賞海豚演出有乜嘢特別？
原來依度係Splash Zone，邊個濺起啲水花？咪海豚囉！
睇吓逸逸幾興奮！
可憐拎住手機影相的我，每次見到海豚預備入水就即刻要將手機收去身後。
之後仲有一個加強版，13歲以上先可以參加，逸逸覺得自己唔夠年齡參加好遺憾，猛咁叫我去，話媽媽你13歲以上呀，我梗係唔肯喇。
好彩無去到咋，原來係好似去水上樂園玩大水桶咁兜頭淋，肯定成身濕透。