二零二四年二月十七日(星期六)
上星期六先係澳門返嚟，今日又出發去澳門來個一日遊。
點解？因為今日係春節「小型客車免費通行政策」的最後一天，我地上次買的澳門車保仲未過期，免來回橋費只係俾油錢，所以決定來一個快閃之旅。
今次第二次行港珠澳大橋去澳門，唔會再不知所措。
上次來的時候覺得坐酒店免費車耽誤了不少時間，今次來主要去澳門舊區，所以決定直接坐101X號巴士。
本來是打算坐巴士去大三巴那邊的，因為恆仔說過想去盛記白粥，因為疫情關係都唔知邊度有，搭巴士時上GOOGLE MAP搵見到關閘附近有分店就立即落車了。
見到依間心鮮出爐三文治專門店啲三文治款式好吸引，不過我地要去盛記白粥食芒果豆腐花。
下到去GOOGLE MAP所示的盛記白粥地址，吓？執咗？好彩根據門上張貼的搬遷啟示，原來都唔係搬到好完者。
又經過另一間超級引的小食店，樣樣都好似好好食咁~
終於來到盛記白粥的新店。
環境好舒服
盛記白粥始於1922年，原來佢都係百年老字號。
係依度一定要食乜？恆仔一定話係芒果豆腐花。我地今日仲叫皮蛋瘦肉粥、魚肉燒賣同埋芋頭糕，樣樣都好好味。後來又加多碟逸逸要求的蘿蔔糕(明明早餐都係食蘿蔔糕)，最後逸逸話今餐蘿蔔糕係NO.1，下次再去澳門問佢有無咩特別想食，佢竟然話係蘿蔔糕。
實在食得太飽，如果唔係其實我仲有好多嘢想食。
係附近老式超級市場尋到寶，依個係細個時食的無花果乾，好懷念呀~
我地慢慢行去關閘搭巴士，原來關閘有一個歷史建築 – 關閘拱門，這個凱旋門式關閘拱門建於1871年10月31日，門身刻有葡國詩人賈梅士詩句，及“22 Agosto 1849”、“25 Agosto 1849”、“31 Outubro 1871”等年月日，分別是亞馬留被刺、葡軍進攻關閘和關閘拱門興建等與關閘相關重大事件發生的時間。
平日去大三巴，我地只識係大馬路議事亭前地附近的巴士站落車，但係根據巴士站的介紹，原來新勝街站去大三巴最近，我地又試下。
等車的環境都好舒服
澳門巴士都可以用微信和支付寶收費，我地係總站上車有個專人掃CODE收錢，恆仔一次過俾晒三個人的車費就可以了。
原來落車的地方係大三巴後面，依度我地真係無乜嚟過，又見到一間吸引到我的食店 – 文哥鷄亦飽，我很好奇雞翼有骨點樣夾包？後來上網查一下，原來係夾的係去骨雞翼，而且依間店原來好有名氣，下次真係要試下。
依間舖頭好靚，我地入咗去打卡但係無幫趁。
我地食咗依間澳門老街小食，起初係俾佢個唔辣的咖啡雜丸所吸引，後來恆仔又忍唔住買咗豬扒包。舖頭有BANNER寫住舌尖上的”豬扒包”，味道都OK喇~