二零二四年一月二十八日(星期日)
今日參加咗公司康樂會的活動跟香港觀鳥會去米埔觀鳥。
今朝只有10度，我哋又唔記得要幫逸逸帶企鵝仔帽同手套，好彩有暖包。
米埔係禁區，唔可以自己來。印象中我中學的時候來過一次，恆仔同逸逸一樣都係第一次來。進入禁區無對名亦無任何識認，導賞員話如果入到去走失咗有職員查問只要話係跟香港觀鳥會來就可以了，原來依個禁區無想像中咁守衛深嚴。
周圍都係魚塘，魚塘屬於人工濕地，為大量候鳥提供食物，長滿植物的塘壆亦為雀鳥提供藏身之所，原來香港大部分魚塘不是被指定為「拉姆薩爾濕地」，便被城規會劃入「濕地保育區」或「濕地緩衝區」。
依度仲有好多楊氏烏頭的宣傳板。
香港觀鳥會預備咗大型單筒望遠鏡，依支鏡的牌子竟然係SWAROVSKI，後來我們逛街經過SWAROVSKI門市，恆仔話點解無望遠鏡DISPLAY喎~
用咗大型單筒望遠鏡嚟睇雀仔真係超級清
另外每個家庭都提供一個雙筒望遠鏡，依個都已經好正。今次我哋自己都帶咗一支雙筒一支單筒，不過都係淘寶貨渣渣地，好想升級。
開始之前要先進行望遠鏡使用教學
來到米埔，第一種看到的物種竟然係蝙蝠，佢哋毛絨絨的堆埋一齊又郁下郁下，有點毛骨悚然，跟在沖繩看到的感覺很不一樣。
佢哋係冬天先見到的東方白鶴
外型跟又稱送子鳥的西方白鶴很像，即係卡通片《寶寶快遞》入面的尚哥。
佢係池鷺
突然伸長個頭好搞笑
今次帶咗我地部可以ZOOM 50倍的SONY相機，影到好多靚相。
依隻雀仔好靚，不過已經唔記得叫咩名。
大白鷺的嘴呈黃色、腳趾呈黑色；小白鷺則相反，嘴呈黑色、腳趾呈黃色。我哋個相機唔夠勁，影到嘴同腳趾都係黑色，分唔到佢係大白鷺定小白鷺。
依隻雀仔有紅色臉珠DUM架，佢叫做紅耳鵯，咦，如果係咁紅色的可能係耳仔唔係臉珠DUM~
普通翠鳥成日郁嚟郁去又細細隻，真係好難影。
依隻雀好似戴左眼罩咁
依隻就係宮崎駿最新電影《蒼鷺與少年》的蒼鷺，突然好想去睇依套動畫。
前面係黑面琵鷺，後面係白面琵鷺。黑面琵鷺係瀕危物種，今日我哋已經見到香港的三分之一黑面琵鷺。
依個係咪俾候鳥睇的路牌？
原來香港係一個觀鳥的好地方，全球大約有11000種鳥類，係香港已經可以睇到當中的578種，據說不少觀鳥愛好者會特地來香港觀鳥。
影返張全家幅
臨走導賞員特地帶我們繞去後面看紅樹林的植物，佢叫做水筆仔，果實跌落時只要成功插進泥裏就可以繁殖。
我地仲見到緬甸蟒蛇，聽說係米埔會有機會見到豹貓添。
逸逸一直跟住導賞的哥哥聽故事。