二零二三十二月十七日(星期日)
我地又去跑步喇~今次係參加由香港警察商業罪案調查科反詐騙協調中心舉辦的慈善反詐跑。
比賽係西九文化區藝術公園舉行，同場還舉行西九CHILL RUN冬日市集，跑完仲可以參加嘉年華會。
逸逸：嘩﹗有美食攤位，正呀~
依粒提子原來叫做提防騙子
佢就係反詐仔仔
要係嘉年華會換禮物，有好多儲代幣的方法，其中一個方法就係要喺會場各處尋找騙子，搵到答啱問題除咗獲得一個代幣之外，仲會有特製相框可以影相。
睇下我地搵到幾多騙子﹗
又話嚟跑步，點解搞咁耐都未開始跑？因為恆仔今次參加4KM賽事，我就同逸逸跑親子2KM。恆仔出發之後我咪繼續同逸逸周圍搵騙子囉~
根據恆仔的速度，差不多時間我地就去迎接佢順利完成賽事的一刻。
到我地喇﹗逸逸其實已經病咗接近一星期，亦因為肚疴半絕食咗一個星期，今朝早餐個包咬咗一啖就肚仔唔舒服唔肯再食，臨跑半個鐘話好肚餓，跑晒成個西九文化園終於係故宮博物館的麵包店買到個牛角包俾逸逸食咗一半先開跑。
西九的賽道係倉鼠跑的典範，所以2km繞一圈就剛剛好。
逸逸起步100米就話無力跑，好彩我有豐富應付逸逸的經驗，同佢玩跑馬仔的遊戲，佢打我PAT PAT我就會好跨張咁叫同埋跑得好快，同佢追下玩下，先至忘記軟弱的身軀。
影下聖誕樹先
無諗過跑2km都有水站
逸逸應該認為水站的意義係好似行山飲水咁，佢竟然斯斯然咁行咗去望海，依一幕超搞笑。
玩得幾開心
到終點喇~今次輪到恆仔迎接我地兩母女。
最後用咗20分51秒完成賽事，真係算係咁架啦！
跑完步就開始玩喇~依個係警方反詐騙協調中心守網者網站的防騙視伏器，可以協助公眾辨識詐騙及網絡陷阱。
今日活動的安排超級混亂，原先活動安排是下載手機遊戲參加防騙問答遊戲、在會場捉騙子或者參加防騙攤位遊戲來賺取代幣，然後再去獎品換領處憑代幣換領禮物或者參加免費工作坊。問題在於上述依個活動安排係盲目的跟人排隊，同埋周圍問咗好多人先知道。
我去了解代幣點樣用的時候，恆仔陪逸逸排隊玩吹氣彈床，點知原來要玩吹氣彈床都係要用代幣換遊戲券的，活動才剛剛開始，排隊的個個都還未有遊戲券，現場鼓譟之後最後排頭十個小朋友有遊戲券都可以玩一次，結果逸逸順利玩到吹氣彈床。
係兩父女仲係吹氣彈床排緊隊的時候，我已經搵到估計係換禮物的隊伍並開始排隊，同時發現原來剛才下載落嚟搵騙子的應用程式設有防騙問答遊戲，結果今日為咗儲代幣答咗超過120條同詐騙和反詐騙協調中心的問題，依家應該係專家。
恆仔接力排隊同埋下載程式答防騙問題儲代幣，我就帶逸逸玩下免費攤位遊戲繼續儲代幣。
原本係射足球遊戲，小朋友用手拋都可以。
依個係要用大鎚仔打走個求職騙案，原來都唔係咁易。
同聖誕老人影下相
蓋不同的印章組成一幅彩的的圖畫用來做明信片，都幾靚。
舞台上一直都有不同的節目，陣容最勁應該係音樂人伍仲衡及藝人區永權演唱防騙主題曲《凡事冇免費》，不過我都唔係好識佢兩個。
我同恆仔輪流排隊總共40分鐘，終於換到禮物了。我地換咗3份小食、3份飲品、3杯雪糕、唔記得幾多張扭蛋/夾公仔券、一張工作坊活動券、一隻反詐仔仔公仔、一個環保袋，同埋一大堆廁紙，今次真係又食又拎。
因為大家都未換到工作坊COUPON，所以完全唔駛排隊。可惜因為我下午要返工，所以只係換咗一張COUPON，逸逸揀咗整聖誕波波。
我地換咗三張小食COUPON三張飲品COUPON，可以去攤位換小食和飲品。
HELLO提子
提子真係幾可愛
之後我地去扭蛋，入面都係宣傳小禮物，唔太吸引，所以扭咗兩次之後其他券全部用來夾公仔。因為時間真係唔夠用，我地排隊夾公仔時，恆仔去咗另一個攤位換氣球。逸逸揀咗花花氣球。
依個夾公仔機中獎率好高，好多人都心滿意足咁離開。
當然都包括逸逸喇~佢又成功自己夾到公仔了~
我地仲換咗三張雪糕券，臨走可以去食雪糕。
我揀咗朱古力甜筒，好味道。
實在太趕時間了，我地一邊食雪糕一邊行去停車場攞車返屋企。