好多朋友聽到我話去夏威夷都覺得只係陽光與海灘，我重申一次，雖然呢個係大家嘅最深印象，當然亦係佢嘅魅力，但夏威夷嘅吸引人之處遠遠多過只係陽光與海灘啦，如果只係要陽光與海灘，亞洲大把destinations都得，甚至係最近嘅海南島三亞都有呢個效果～一開始想去夏威夷，其實已經好想去睇下火山，見過遊客走過通紅熔岩嘅圖片，我就好想去一去呢個地方﹗因為我哋兩個都唔識駕車，要去火山國家公園有難度，因為火山係夏威夷大島，即是另一個島，而距離大島城市Hilo都遠遠地⋯多番研究之下，都係參加local tour最實際，而且有local tour由威基基出發(即是我哋stay嘅歐胡島)，咁連Hilo酒店都唔駛安排了～要即日搭飛機來回大島，所以local tour嘅pick up係七點幾，我哋要好早起身丫﹗係酒店食埋早餐先～

登登登登﹗

我哋嘅早餐係佢－－夏威夷名物－－musubi，即是午餐肉壽司﹗應該係受到日本人影響至創出嚟吧，出玩咗呢一道fusion菜式﹗我哋用微波爐翻熱嚟食～原本知道呢件東西沒甚好感，只覺得貪玩都一定要試一次，點知食過⋯會想再食﹗午餐肉壽司唔係單單放一片午餐肉係醋飯上面，第一，飯唔係醋飯，所以唔會有味道唔搭調嘅問題，第二，午餐肉係用燒汁醃過㗎，味道好豐富，第三，我冇放個銀仔係旁邊做scale，大家估唔到佢有幾大，其實⋯musubi好似一隻滑鼠咁大﹗﹗所以食過非常飽足～yeah～後來我仲買咗本午餐肉全書做紀念品添～

今次book嘅local tour係Roberts Hawaii嘅tour，因為係夏威夷旅遊官方網站有佢介紹，而你隨意用google search都好容易搵到佢，似乎都係比較大間嘅公司～網上booking有啲問題，結果拜託珊珊幫我book，結果都順利預訂到﹗我哋係第二組pick up嘅客人，之後再去多幾站先一齊去機場，Roberts Hawaii嘅職員係機場已經派晒來回程嘅登機證俾大家，大家跟時間上機咯，去到大島至有另外嘅職員接我哋﹗因為有講過只有一餐late lunch / early dinner嘅狀況，中間只有隨便食啲snacks嘅機會，所以我哋係機場Starbucks買定啲scones，需要時有得填下肚子吧～

檀香山國際機場嘅候機室都處於半開放狀態，好多雀仔走入嚟搵食﹗﹗令人諗起未有冷氣年代嘅陳瑞芝禮堂呢，以前係禮堂考試or集會時都有雀仔飛入嚟﹗

好靚嘅雲海～究竟係山高定係啲雲低呢？

我哋坐嘅係Hawaiian Airlines，短短嘅45分鐘機程都有飲品serve呢～

yeah，我哋抵埗夏威夷大島了，我哋搭成日嘅就係呢架大旅遊巴啦﹗原來去到大島仲要去啲Hilo嘅酒店接多幾個客人至出發～去到一間酒店，唔見要接嘅客人﹗好似我哋早咗？結果司機俾我哋增遊一個附近嘅景點，哈～

大家冇搞錯，呢個叫做Liliuokalani Gardens嘅日本庭園係位於夏威夷的﹗有拱橋、涼亭，簡直就好似去咗日本～當然美國人管理嘅就比日本粗糙少少啦，影相唔覺嘅～

日本鳥居～

我哋稍稍拖延時間之後再返去嗰間酒店，接到同行嘅客人了﹗我哋未去火山之前先有幾個附近嘅景點，帶大家睇睇咯～我哋今日嘅司機+導遊講嘢好有趣，唔單單講下啲歷史文化民生，仲有好多笑位，加上同行嘅鬼們都笑點甚低，全日嘅tour都充滿歡樂嘅氣氛～我記得嘅第一句搞好氣氛嘅說話就係，「You’ll be missing your ABC Stores in Waikiki soon!」

前往(真正嘅)第一站黑沙海灘途中，見到好多露營嘅帳棚，原來路嘅左邊嘅露營人士，係住係路嘅右邊嘅居民嚟嘅～

到了Richardson Black Sand Beach﹗黑沙海灘唔算好大，而且可以話主要係石灘，不過都有啲大人小朋友係度嬉水晒太陽～

司機話因為某某礦物(好似係銅？)，黑色嘅沙之中會見到綠色嘅沙粒，仔細睇又真係有喎～

大島氣候同歐胡島唔同，雨水比較多，今日都少少天陰陰呢～by the way，我哋今個trip叫做有四部相機，一部大嘅Sony啦，一部潛水Nikon啦，仲有兩部iphone，我哋又冇自拍神器，用兩部真相機嘅自拍硬係影到遮住晒啲景or塊面冇咁一截，所以iphone5出場時就係要自拍時，我哋發現前後企可以影到最多嘅風景，所以⋯鳥居如是，黑沙海灘如是，之後嘅火山都有甚多類似嘅角度﹗:p

呢啲小景點旅行團當然唔會花好多時間啦，大家影啲相隨便逛一陣就夠鐘上車了﹗因為太早起身，我哋兩個都抵抗唔到睡魔嘅呼喚，到咗下一個景點都要團友叫醒我哋先識落車﹗﹗

下一站係Rainbow Falls－－彩虹瀑布﹗

今日彩虹就見唔到喇，瀑布景觀都好清新嘅～:)

Rainbow Falls

正因為落車時迷迷糊糊，我哋都唔知幾點鐘上番車，死啦，夠唔夠時間行過去瀑布嗰邊呢，呀，我哋跟住認得嘅團友咪得囉，佢哋行我哋又行佢哋走我哋又走，yeah～

瀑布嘅源頭嗰邊就去唔到，不過見到呢棵超大樹﹗﹗奇嘅唔係棵樹有幾大，而係有好多好勇敢爬樹嘅人﹗同一時間好似有成五六個人爬咗上去，而且仲要係爬到高過自己五六倍嘅高度﹗啲鬼佬父母真係好放心俾啲細路去試呢～香港父母可能個細路爬咗少少就會叫番佢落地了～

下一站係夏威夷果仁工廠，強制shopping？？司機提醒大家唔係要買買買，而係要記得去試食，因為免費﹗哈～同埋佢介紹咗自己最愛嘅味道，年紀大，原味比較健康，而Honey Roasted亦係佢嘅favourite﹗

果仁廠嘅網頁：

https://www.maunaloa.com/

由路牌到Visitor Center要經過3哩路嘅果仁樹田呢～

到咗大家可以任意花時間參觀工廠、試食、shopping or用餐，好趕呀好趕呀～

其實參觀工廠都只係由大玻璃望落去，不過有段好informative嘅短片幾好，仲有中文配音添呢～其實司機都有講過，夏威夷果仁最令人苦惱嘅就係點樣可以敲碎個殻得嚟唔敲碎粒果仁，用人手做當然可以掌握啦，但大規模生產又唔可以咁labour intensive喎，原來係先將果仁sort開唔同嘅size，然後同size嘅一齊crack，盡量減低整碎嘅機會，真係碎咗嘅，可以用嚟整其他product囉，曲奇餅又好，雪糕又好啦～

我哋一場嚟到，口味同貨品種類都齊全啲，趁機買埋手信啦～原味原味、蜜糖烘烤、朱古力⋯買多一罐洋葱蒜味即時開嚟食啦～滿載而歸﹗yeah～

點解時間好趕？因為司機預告咗有夏威夷果仁雪糕，聽到就覺得一定要試了，破戒吧～美國果然係美國，份量非常足﹗我哋兩個人share一杯雙球都飽到食late lunch﹗一款椰子一款朱古力，兩種都混入大量夏威夷果仁，正﹗我哋買嘅scones？唔怕，聽日做早餐咪得囉～

我哋參加嘅Roberts Hawaii嘅網頁：

https://www.robertshawaii.com/

待續

前往其他美國旅遊blog

Comments

comments