嚟巴塞隆拿旅行，如果你翻開任何一本旅遊書，一定會有建築師高第(Gaudi，或譯高迪)之旅，事關呢位十九至二十世紀o既西班牙建築師係巴塞隆拿有好多具美觀與實用並重o既作品，其中表表者非聖家堂莫屬，我哋今日除咗參觀聖家堂之外，仲去咗奎爾公園、米拉之家，雖然無法所有高第o既作品都睇過晒，但我哋呢啲建築門外漢都感受到佢o既熱情同埋天份﹗﹗

聖家堂係非去不可o既no.1，所以我哋排咗早上去咗先~我哋住o既Barcelona Princess Hotel唔包早餐，我哋尋日係Boqueria Market買咗牛角包，食完尋日o既奢侈早餐之後，今日食番個經濟早餐先~(不過都唔係香港啲包包咁平…要1.5歐羅一個囉…)

牛角包都算係西班牙人比較常食o既包，係街上賣o既，唔係tostada(圓圓地o既烘多士)就係bocadillo(類似法國長麵包，脆脆硬硬的，通上夾火腿芝士食)，其次就係牛角包了~我哋買咗一款原味一款朱古力，兩份share就可以試多款啦~ 🙂

地鐵月台發現呢張poster，係Museu Blau，呢個博物館咪正正係我哋酒店隔離，咦，佢話同poster合照入場有折扣喎，我哋點知會唔會去睇呢？影定先﹗﹗我哋最終都唔夠時間去，睇番個網站，原來主題係地球生物，內容應該幾有趣的，不過就唔知展覽會唔會得Catalan，冇英文的話我哋就唔知係乜啦？大家知道嗎，其實西班牙文都有所謂唔同方言，一般我哋學o既係Castellano，但係巴塞隆拿地區講o既係Catalan，所以我有時睇啲指示牌好簡單的都睇唔明，有啲就只差啲啲啦，好似博物館Museum嘛，Castellano係Museo，而Catalan就係Museu，但有啲字會完全唔同~

大家可以入去佢個website睇下：

http://w110.bcn.cat/portal/site/MuseuDeCiencies/?vgnextchannel=0000001438713694VgnV6CONT00000000000RCRD&lang=ca_ES

到咗聖家堂個地鐵站了，唔知邊個出口？唔識字都可以睇圖畫~~

「哇~」一出站就要哇一聲，因為大大座聖家堂馬上出現，工程進行中？？nonono，其實聖家堂咁耐都仲未起好o架~聖家堂1882年開始動工，但1883年原來嗰個建築師就用老闆意見不合，Gaudi就接手了，佢幾乎花咗畢生o既精力係呢個工程上，但係佢在生o既日子，直至1926年都未完成，後來憑住人o既捐款，工程得以繼續落去，到而家都仲起緊，預計今個世紀第三個十年之內會完成，即使而家仲係「地盤」，但足夠每年吸引千千萬萬來自世界各地o既旅客嚟參觀，包括我哋「兩粒塵」~

http://www.sagradafamilia.cat/

ok，買飛入場﹗…不過…我哋發現了一件不得了o既一件事﹗﹗﹗就係，只見到隊尾見唔到隊頭，睇到呢牌紅色banner，叫大家預早plan定行程上網買定飛，我哋更加心知不妙，派個探子(即係day)去睇下隊頭係邊，噢，要圍住聖家堂轉兩次彎至到，以西班牙人o既超低效率嚟計，要入到場真係好唔樂觀…>_<“

呢段時間我哋唯有自己開始參觀啦，邊睇住旅遊書o既介紹，邊欣賞下聖家堂o既外觀，仲可以慢慢睇添(自我安慰中…)~食咗牛角包，只飲水都係不太滿足，我瞄到附近有快餐店，過去買埋返嚟飲埋再掉埋垃圾應該都未有耐排得到，結果day排住先我去咗Burger King買咗兩杯咖啡~

排隊時有少少無聊的望下附近啲屋，見到其中有隻窗，入面個肥佬郁都唔郁下，我哋係度研究佢係真定假o既，哈，可能因為尋晚係Las Ramblas見到有啲宣傳會直接係個窗口度做啦，我哋兩個眼甘甘咁望住嗰隻窗，哈，佢郁咗啦，原來係真人一個~

終於到了﹗其實counter數目都唔算少，但真係郁得好慢囉…好喇，入到場，我哋領取咗audioguide，今次揀咗一個普通話一個英文(果然係大景點，有中文揀﹗後來去o既其他地方都再冇中文呢，包括馬德里o既皇宮同埋Granada o既阿爾汗布拉宮都冇~)，果然係明智o既選擇﹗我哋今個trip去好多地方都有租audioguide，發覺質素真係可以好參差，但最佳audioguide非聖家堂莫屬，悠揚悅耳o既音樂啦，雖然好多專有名詞，但都講得顯淺易明，唔會太累贅，講埋過多普遍遊客唔會有興趣o既嘢囉~

我哋跟住audioguide o既指引，先去受難立面(passion facade)，正如所有旅遊資料介紹一樣，聖家堂就似一本活o既聖經，一幕幕聖經入面o既經典場面，雕刻家用藝術展示俾你睇~對於基督徒嚟講更有意義呢~

左上：上半為耶穌基督被釘在十字架上，下半為婦女Veronica為耶穌抹面

右上：猶達斯親吻耶穌、出賣耶穌

左下：殮葬耶穌

右下：耶穌係苦路中跌倒

苦難立面係Gaudi去世後至建成，所以風格上同佢親自監督o既誕生立面(Nativity Facade)好唔似，大家睇落去就會知道了~

入去聖殿條路o既地下都好靚呢，係耶穌騎住驢仔入去耶路撒冷城~

入到去聖殿又係要哇一聲﹗好靚，感覺好平安、好舒適，聖家堂出名係以大自然為題材，一條條o既巨柱就好似森林入面o既參天古木一般~

彩色玻璃窗透入o既光線恰到好處~好多古老o既哥德式教堂通常裡面都比較暗，要好多人工照明，但Gaudi特別計算過要入幾多天然光，所以彩色玻璃唔係單單為咗靚o架~

點解連祭壇上o既十架都特別有美感o既呢？唔係刻版o既掛係牆上或座係地上，而係優美地半懸係空中，等會眾係四面八方都可以仰望主~

行到聖殿o既最尾尾有呢個模型，原來要撐起咁大座聖家堂，有好多柱子，但柱子o既分佈、大小粗幼、顏色都唔同的~

後面係天主經，而且係用咗世界各種語言嚟寫o既天主經，見到中文嘛？

聖詠團o既座位亦非一般o既一排排，而係環迴立體聲，有幾層，圍住聖殿咁唱，係度參與彌撒氣氛一定好好，不過就難為個指揮啦，唔知望住邊度好~

柱子上面有幾粒晶瑩發光o既圓珠，四種唔同顏色，我哋估計係代表四福音，但雖然上面寫o既唔係英文，但感覺好似顏色同埋四福音o既關係，同我哋中學時o既四社好似唔一樣？哈~

出到嚟正大門，亦即係誕生立面(Nativity Facade)了﹗

終於有位可以自拍王~

呢邊o既雕刻係咪同苦難立面o既風格好唔同呢？

係入面一樣好容易搵到熟悉o既聖經片段：右邊係耶鮮誕生啦，左邊分別係三皇來朝同埋牧羊人前來朝拜耶穌﹗

呢邊o既故事同埋欣賞度特別豐富，audioguide都好多資料，所以我哋同埋好多其他遊人都係度停留得最耐~

仲有博物館添﹗呢度講o既係Gaudi點樣係太自然攞到靈感，用於興建聖家堂上面~

三個模型係三個唔同時期o既聖家堂計劃，最右邊嗰個從來都冇興建過，中間嗰個已有少少而家o既聖家堂o既雛型，左邊o既就最接近現在o既聖家堂~最後一站，當然唔少得紀念品店啦，冇辦法帶成座聖家堂返去，day准我買一隻杯做紀念﹗(我最近幾次旅行已經變成「mugaholic」，哈，今個trip滿quota唔可以再買啦~)

待續

前住其他西班牙旅遊blog

Comments

comments