行完海上聖母聖殿，我哋考慮到係Palau九點鐘開場o既結他演奏會，中間呢段時間去邊度好呢？既然去到舊城區，不如去逛逛嗰條最熱鬧o既街Las Ramblas啦~既然買咗三日任搭地鐵券，雖然近近地都搭車過去，省番少少力同埋時間~

一出站，哇，原來真係好熱鬧o架~好長o既林蔭大道步行街，橫跨三個地鐵站~好多嘢賣o架，最多係精品首飾啦，花店啦，紀念品啦，小食啦，目不暇給~

係La Ramblas仲有另一旅遊書o既景點，就係La Boqueria Market，呢個market有700年歷史o架啦，入面有濕貨，啲新鮮蔬菜水果海鮮肉類，亦有啲小食檔，即使入夜都人聲鼎沸~

都未入去就首先被火腿檔吸引咗了，有1歐羅o既火腿大雜燴，一次過試晒咁多款風乾火腿香腸，正~

入到去都好多人丫~

個market好乾淨企理，貨品擺得整整齊齊，色彩奪目繽紛~

呢張影得咁矇都要post出嚟，因為要記錄低呢杯好好味o既新榨果汁，係香港冇o既士多啤梨椰子汁丫，又濃郁有酸酸地幾清新，不過好杰，飲到底要倒出嚟~

我哋係market仲買咗第二朝o既早餐—-牛角飽~

離開market我哋沿住條大街繼續散步…

咦，瑪麗蓮夢露？睇真啲係個真人，條裙子真係飄呀飄o架，原來係為Erotic Museum招徠客人~

我哋都冇睇呢個museum，俾條link大家入下去參觀啦：

http://www.erotica-museum.com/

抬頭就係樹樹樹樹樹o既林蔭大道，諗起台東o既綠色隧道呢，日頭天氣好時一定好靚﹗﹗

經過見到間家樂福超市就入去逛逛，我哋嚟到西班牙都未行過超級市場呢，去親旅行我都好鍾意去逛當地人買嘢o既地方，感覺更加貼近佢哋真實o既生活~嚟到家樂福終於感受到人哋點解話西班牙係歐洲之中物價比較低o既了，確實，有好多日用品、食物都好平，好似0.75歐羅o既1kg裝白米啦，1.99歐羅o既超長方包啦，0.65歐羅o既1公升牛奶啦，呢幾樣係我記得之中仲平過香港o既嘢~

呢度當然都唔少得火腿部啦，雖然係平價大眾超市，但西班牙人o既火腿絕對唔能夠馬虎，都係有好多等級同埋品種﹗﹗

Las Ramblas好長，我哋中間呢段空隙時間只打算行一個地鐵站o既距離，我哋由Liceu行到Placa Catalunya，原來Placa Catalunya係夜晚非常熱鬧o既地方呢，感覺去咗銅鑼灣+旁邊o既維園嗰種feel~

好多人呀﹗﹗嚟到西班牙之後未見過咁多人(唔計Camp Nou嗰90000觀眾)~

睇咗呢張相你就明點解話似維園囉~

好多三五知己、情侶、一家大細係度吱喳下、坐下、玩下、跑下，而廣場四周就係「銅鑼灣」，有好多大百貨公司~我哋攰攰地都係附近坐咗一陣~

時間差不多，搭番地鐵返去Palau預備睇表演，路過pizza店，哇，果然西班牙人好熱愛足球，巴塞隆拿人好熱愛佢哋o既球隊﹗

我哋專登揀咗一層o既balcony位，平時好少機會坐到呢啲位嘛，不過個view其實麻麻地，好在係睇結他，個位僅僅睇到音樂家個表演位，如果係大choir或者大樂團，個位就見唔到晒咁多表演者lu~之前去睇波咪話啲劃位係一邊單數一邊雙數o既，原來佢哋真係興咁樣，呢度都一樣~

晚間o既Palau同日頭好唔同，少咗一份樹林般o既靈氣，多咗一份金碧輝煌o既瑰麗~

David Russell o既位置~

我哋兩個o既時差真係未適應到，其實真係彈得好聽o架，但我哋偏偏唔爭氣，不斷地釣魚…見到day釣魚時我搣一搣佢，但佢見到我釣時都唔叫我~真係好可惜呀~同埋俾啲當地人見到我哋兩個中國人咁唔俾面真係好丟假~David Russell彈o既係西班牙結他，所以同我哋平時常接觸o既pop或者rock o既結他好唔同，係咪真係比較容易「令人心境平靜」？不過，我返到嚟香港有睇番佢個youtube channel捧番場o架~

我哋完場至去搵食~

因為Palau嗰邊唔係好熟路，夜夜地都係返酒店附近搵食穩陣啲，反正有好多餐廳係左近，起碼我哋朝早食早餐嗰間我哋都知佢開到好夜~行過幾間鋪，揀咗呢間話有壽司食的，食品種類多元化啲~發現原來係亞洲人開o既呢，聽到(疑似)兩母女o既店員交談，講普通話的，原來係中國人~我哋叫咗漢堡飽同埋炸魚+花枝圈+薯條share食，都係油膩膩啦，但味道都算ok~

待續

前住其他西班牙旅遊blog

Comments

comments