對上一篇去海生館嘅blog，我應該花左幾個月嚟完成，去完台灣旅行返嚟，本來好有幹勁咁打呀打啲blog，去同一個旅行第三次時(第一次係準備行程時，第二次係真正去旅行時，第三次係去完返嚟打blog時)，我再次面臨需要面對颱風嘅低落心情~去完海生館，跟住就打風了，幾日留係酒店冇得外出，諗起都唔開心，所以連打接住落嚟嘅blog都卡住咗，卡到去多三個旅行(12月嘅沙巴、跨年嘅潮汕、同下一年3月底4月初嘅福建)先可以完成埋佢，嚟緊又就快暑假啦嘛，我要下定決心清埋佢，honeymoon時去Fiji嘅blog拖咗以年計，最後都完成得到，高雄墾丁呢個trip嘅blog都得嘅~
因為係閉關嘅day 1，對酒店嘅各種設施充滿好奇心，樣樣都想試下，另外亦要了解一下各種活動嘅時間，睇下點樣編排，務求留係酒店都有豐富多彩嘅節目~由知道會入住呢間酒店嘅嗰一刻開始，兩個小朋友已經好期待去遊戲室，已經再冇理由推遲去遊戲室了，第一次去好好奇，但後來就變成每日家常便飯，點都要入去幾轉~
酒店遊戲室都算幾大，除咗可以分別玩唔同嘅設施，我哋仲可以玩匿埋同埋玩捉~
遊戲室icon—-波波池
對你哋兩個嚟講係咪細咗少少呢？
要好消磨時間，都係呢啲創作類遊戲比較有效~
我哋一人一間屋仔，邊個砌得最靚呢？
自從去過好pro嘅Just Climb玩抱石之後，就覺得呢啲遊戲室嘅攀石設計得好求其，Just Climb嗰啲有唔同難度嘅路線，要玩真係有唔同技巧，所以呢度佢哋冇乜玩幾多次就唔再玩吧？
除咗小朋友好想玩遊戲室之外，我其實都企圖呢幾日閉關可以每日去gym運動，話晒我而家已經係「做gym嘅人」，對啲器材好熟悉了，即使只有啞鈴都可以做到好多運動~不過到最後，呢次都只係我唯一一次入去個gym囉，小朋友未夠秤唔准入去，佢哋當然唔想我成日入去玩啦~亦因為經歷呢個gym唔准入，後來我哋去住半島酒店個gym唔准小朋友入，佢哋對健身室真係好好奇，好在後來年尾去潮汕trip時，終於得償所願，可以入去gym試下呢樣試下嗰樣了(請參閱：31-12-2023：潮汕公公生日美食溫泉鴨仔團day 2(part 2)．清泉谷溫泉度假酒店upgrade大驚喜)~
酒店B1休閒中心仲可以免費租借乒乓球、桌球嚟玩，仲有呢款超細桌球，不過佢哋都係太細個吧，尤其係詩，唔太控制到支球桿，後來幾日我哋再租咗標準size嘅桌球嚟玩，我同爸爸兩個篤波時佢哋兩隻自己去遊戲室，居然有短暫嘅二人世界少少嘅拍拖感覺呢~
遊戲室出面有一個活動區，各種免費、收費嘅手作活動都係嗰度舉行，颱風期間我哋幾乎乜活動都join過了，至於冇活動進行時，就可以係度睇圖書，大人書小朋友書雜誌等都有好多選擇，俾著我自己一個人，應該可以每日係度泡好多個鐘都唔悶，不過嘛，佢哋鍾意聽我講故事，我就冇咁多精力同口水可以講咁耐了~
原本凱撒大飯店每日會舉行好多戶外、室內活動架，因為颱風，得番室內活動了~
DIY活動方面，酒店好貼心地安排單日同雙日有唔同節目，留多幾日都有新鮮感，呢兩款收費DIY我哋做齊晒啦，後來加多個臨時特別DIY我哋都join埋了，可見大家留係酒店幾日有幾無聊~至於免費嘅黏土同串珠，後來唔駛睇時間表都識得自動自覺行過去做了~
你好呀，機械人﹗你係咪去送餐呀？我哋結果都冇試過room service呢~
趁颱風正式嚟到之前，我哋出埋去食最後一個晚餐，墾丁大街上嘅夜市檔口都開得唔多了~
我哋去咗呢間叫做「熱炒100」嘅鋪頭食嘢，開頭以為真係碟碟都100蚊台幣，原來唔係，但都真係幾抵食~
樣樣都細細碟，可以試多幾款唔同嘅食物~味道樣樣都唔錯嘅，但未至於有驚喜嘅美味，因為比較平嘅定價，可以好似12蚊店，或者均一價嘅迴轉壽司一樣食得好開懷、好放心~但印象中，俾客人用嘅碗筷全部都係塑膠餐具，仲要係細細隻碗細細隻匙羹，食起嚟輕飄飄同裝得少少咁，有少少狼狽~
回程我哋去便利店買定「颱風餐」，雖然凱撒大飯店有幾間餐廳，足夠餵飽我哋+試試唔同口味，但我哋打算打風最勁嗰日食下「颱風餐」，更有風味~到時大家就知我哋買咗啲咩嚟食啦~
返到酒店，見到窗口貼晒膠紙，嚴陣以待，知道個風就快到了~返到房，露台嘅枱櫈都搬走埋添~我哋準備好接招啦﹗
墾丁凱撒大飯店：
https://kenting.caesarpark.com.tw/
待續
前往其他台灣旅遊blog