即使啱啱煲完17集嘅劇集(今日連睇3集至大結局)，我都仲未搞清楚劇名叫做「紅袖鑲衣邊」定咩，我Google search番「紅袖」，竟然都出到真正嘅劇名「衣袖紅鑲邊」﹗可想而知呢套劇幾受歡迎﹗本身有subscribe Netflix，家人有subscribe Disney+，本來排緊隊可以睇嘅劇集已經多到數唔晒，因為韓文老師嘅一句，「衣袖紅鑲邊」好受歡迎，我就想睇下，究竟韓國人鍾意嘅劇集係點嘅~
記得老師推薦(唔知算唔算推薦)完之後，我search下香港邊個平台有得睇，原來係Viu，我印象中Viu唔俾錢升級只係冇得download嚟睇，在線睇+睇廣告係暢通無阻，所以搭國泰由韓國返嚟，睇晒啲Running Man之後就開咗套劇嚟睇，第一集係幾吸引，恐怕自「大長今」之後，雖然韓國古裝劇睇得多，但好耐都冇睇過邊一套韓劇真係以宮女做主角~返到嚟香港發現原來Viu冇得免費睇﹗﹗我居然俾$28/月為咗要追埋佢~韓國返嚟，計埋搭飛機回程嗰日啱岩兩個星期，14日追完17集都算快啦~
一直睇一直睇，一直唔明點解韓國人咁鍾意睇，但我自己都係不停追…我平時鍾意睇啲一係就好sweet sweet，一係就輕鬆愉快嗰類韓劇，太多壞人太多暗算嗰啲我都唔太鍾意，呢套我一路話男主角慘，一路話女主角衰，但都咁快追完成套~
令我覺得更神奇嘅係，平時睇完一套好睇嘅劇，我多數都會打開wiki睇下嗰套劇嘅介紹，各個演員係邊個，有冇做過其他劇等等(後來我都有search，原來男主角係2PM成員，之前睇過一套「油膩的Melo」個中菜廚師男主角原來係佢﹗女主角呢，上次睇「成為王的男人」時，我就知道當年「大長今」入面嘅小今英長大了﹗)~我今次一煲完，居然打開wiki睇韓國歷史﹗﹗好有興趣究竟有幾多係真有幾多係假~另外神奇嘅係，我居然唔打韓國旅行blog住，而好想打呢一篇煲劇後感blog﹗
P.S.1 既然subscribe咗Viu $28/月，不如睇埋韓版「步步驚心」先cut啦~哈~
P.S.2 星期一同韓文老師上堂，一定要問下點解韓國人鍾意睇~