27-5-2020:另外兩位醫生

曉雖然停課已經四個月,但因為學校有網上教學,所以都有繼續「返學」,上一個主題係講多謝唔同職業既人,其中有一份功課要小朋友畫將來大個想做咩工作,曉細個時曾經講過要開雪糕店、做空中小姐,但就從未講過要「繼承衣缽」學我做醫生,但今次佢畫咗要做醫生,究竟係得到邊個既inspiration呢?

就係佢﹗

玩具醫生—-麥芬醫生~

最近迷呢套卡通片,所以屋企長期都多咗兩個醫生—-曉醫生同詩醫生~

…check your ears, check your eyes, find out how much you’ve grown…

…listen to your heartbeat, fix you up, ready to go…

檢查時一定要一邊唱呢首「Time for your check up」,兩個唔太識聽啲英文,跟住嚟唱開頭唔係好知唱乜,聽過原本既版本慢慢知道了~

曉要我配音,扮除咗佢以外既其他角色,包括病人、護士同埋醫科學生既角色(我估我五歲時應該未聽過「醫科學生」呢個角色,係因為平時都有啲醫科學生跟住麥芬醫生,所以同樣有醫科學生跟住曉醫生)~但問題係我開頭講啲病癥,例如平時常見既發燒、肚痛、咳、出疹等等,曉醫生唔太識得醫,後來我先明白,麥芬醫生擅長係幫玩具治療,所以常見徵狀應該係電池冇電、螺絲鬆咗、爆線漏棉花等等,曉醫生先識得醫~

搞鬼既係,本身屋企係有醫生玩具套裝可以用嚟扮醫生,曉居然搵咗冬天戴既手襪出嚟,用嚟做手術時戴,咁我又平平地買咗啲繃帶同埋棉花球俾佢哋玩~

除咗日日夜夜都要診症之外,砌Lego都要砌醫院~

因為有媽媽醫生既監督,所以規模都似模似樣~

等候室

診症室

病房

手術室

所以即使係三十幾歲,我都好鍾意玩Lego Duplo,因為真係可以砌乜都得﹗除咗砌醫院,我哋又有砌髮型屋、學校、露營、觀光農場、餐廳、酒店、沙灘,總之諗得出乜都可以砌~

雖然而家好鍾意做醫生,但相信當麥芬醫生熱潮過去之後,佢哋又會做其他職業啦~

Comments

comments

發表迴響

你的電子郵件位址並不會被公開。 必要欄位標記為 *